ပွင်ႈၵႂၢမ်း
ၶၢဝ်းတၢင်းပီမႂ်ႇတႆး 2106 ၼီႈ တီႈၼွင်ဢုၵ်း
- Details
- Published on Friday, 09 December 2011 14:28
- Written by သႅင်ႁႃႈၼမ်ႉ
မိုဝ်ႉလီၵမ်ႈႁဝ်းတၼ်း ဝၼ်းလီမီးၵူႈမိူဝ်ႈၼႆၼင်ႇၵႂၢမ်းၵပ်းထုၵ်ႇဢၼ်မွၵ်ႇလၢတ်ႈပၼ်ၾၢင်ႉ ႁဝ်း ႁႃးဝႃႈတေႁဵတ်းသင်ၵေႃႈယႃႇ ပေပႂ်ႉမိုဝ်ႉပႂ်ႉယၢမ်း ႁဝ်းလူဝ်ႇမေႃဢဝ်တိုဝ်ႉတၢင်းလီ သေႁဵတ်း သၢင်ႈ ၵႂႃႇႁႂ်ႈႁွတ်ႈယိူင်းမၢႆႁဝ်းၵူၺ်းၼႆ။
ယွၼ်ႉၶၢဝ်းယၢမ်းဢမ်ႇတွၼ်ႉပႂ်ႉၵူၼ်း လႄႈ ဝၼ်းယဝ်ႉဝူင်ႈ၊ ဝူင်ႈယဝ်ႉလိူၼ်၊ လိူၼ်ယဝ်ႉပီ၊ လႅၵ်ႈလၢႆႈၶၢႆႉပုတ်ႈ
ပၼ်ႇ ႁွပ်ႈ ၶိုၼ်းၶွပ်ႈထိုင်ၶၢဝ်းၵတ်း ပီမႂ်ႇၶွင်တႆးႁဝ်းထႅင်ႈပီၼိုင်ႈ ဢၼ်ထူၼ်ႈထိုင် 2106 ၼီႈထႅင်ႈယူႇယဝ်ႉ။
ၼင်ႇၵူၼ်း ၵူႈၸၢဝ်းၶိူဝ်းၼႂ်းလုမ်ႈၾႃႉမီးပီမႂ်ႇ ၽႂ်မၼ်းၼၼ်ႉသေ ပေႃးထိုင်ၶၢဝ်းပီမႂ်ႇမႃးၵေႃႈၼင်ႇၾိင်ႈထုင်း
ၽႂ်မၼ်း မီးၼၼ်ႉ ဢွၼ်ၸတ်းပၢင်သူင်ႇသင်ႇပီၵဝ်ႇ ႁပ်ႉတွၼ်ႈပီမႂ်ႇၽႂ်မၼ်းယူႇ။
လႆႈယိၼ်းဝႃႈ တီႈၼွင်ဢုၵ်း ဢိူင်ႇမိူင်းၼႃႉ ၸႄႈဝဵင်းၵဵင်းလၢဝ် ၸႄႈတွၼ်ႈၵဵင်းမႆႇ ၸိုင်ႈထႆးၵေႃႈတေမီးပွႆးပီမႂ်ႇ
တႆးၼႆ သေၽိတ်ႈမွၵ်ႇဝူင်းၼူဝ်းၼဵမ်း ၵႂႃႇႁႆႇတိုင်ႈမူၼ်ႈၸႂ်ပၼ်တီႈပၢင်ပွႆးပီမႂ်ႇတႆး ၼွင်ဢုၵ်းၼႆလႄႈၸင်ႇတႅပ်း
တတ်းဝႃႈ တေ ၵႂႃႇၶဝ်ႈႁူမ်ႈပွႆးပီမႂ်ႇတႆးတီႈၼွင်ဢုၵ်းၸွမ်း ဝူင်းႁႆႇတိုင်ႈၶဝ်ယူႇယဝ်ႉ။ မိူဝ်ႈၼႃႈတေၵႂႃႇၼၼ်ႉၽူႈ
တႅမ်ႈယင်းဢမ်ႇ ယၢမ်ႈလႆႈႁူႉဝႃႈ ဝၢၼ်ႈၼွင်ဢုၵ်းၼႆႉ မၼ်းပဵၼ်ၸိူင်ႉႁိုဝ်ၵူၺ်းၵႃႈယွၼ်ႉၼွင်ဢုၵ်းပဵၼ်လႅၼ်
လိၼ်တႆး-ထႆး ဢၼ်ပဵၼ် သဵၼ်ႈတၢင်းၵႂႃႇမႃး (ပဵၼ်လၢၼ်ႇ)တီႈၼိုင်ႈၼႆလႄႈ ၽူႈတႅမ်ႈဝူၼ်ႉဝႃႈတေမီးပီႈၼွင်ႉ
တႆးၼမ်တေႉတေႉၼႆၵူၺ်း ၼႂ်းတႃ ၵေႃႈႁၼ်ဝႃႈ ပဵၼ်မူႇဝၢၼ်ႈတႆးၼႆယူႇ။
ၵူၼ်းၸိူဝ်းတေၵႂႃႇၸွမ်းၵၼ်မီးမွၵ်ႈသိပ်းပၢႆ မၢင်ၵေႃႉ ၶီႇလူတ်ႉၶိူင်ႈၵႂႃႇ မၢင်ၸိူဝ်းၵေႃႈ ၵႂႃႇၸွမ်းလူတ်ႉလူင်သေ
ၽတ်း (ၼတ်ႉ-လၢတ်ႈ)ၵၼ် တေၵႂႃႇႁူပ်ႉတီႈဝၢၼ်ႈၼွင်ဢုၵ်းၼႆယူႇ။ ယွၼ်ႉဝႃႈတေလႆႈ ၵႂႃႇလဵၼ်ႈၽဵင်းႁွင်ႉ
ၵႂၢမ်း လႄႈ ဝၼ်းထိ 22 November 2011 ၼၼ်ႉ တေႇဢွၵ်ႇၶၢဝ်းတၢင်းၵႂႃႇမွၵ်ႈ 10:00 မူင်းပၢႆပၢႆ သေမိူဝ်ႈ
တေ ထိုင်ၼွင်ဢုၵ်းၼၼ်ႉ ယွၼ်ႉၸုမ်းပီႈၶဝ်ဢၼ် ၶီႇလူတ်ႉလူင်မႃးၸွမ်းတၢင်းလင်ပႆႇမႃးၶိုတ်းလႄႈၸိူဝ်းႁဝ်း
လူတ်ႉ သၢမ်သီႇၵၼ်း ဢၼ်ဢွၵ်ႇမႃးပႂ်ႉဢွၼ်တၢင်းၼၼ်ႉ ဢွၼ်ၵၼ်ပႂ်ႉဝႆႉတီႈဝၢၼ်ႈၼႃးဝၢႆ ၵွၼ်ႇတေထိုင်ၼွင်
ဢုၵ်းထႅင်ႈ မွၵ်ႈ 5 လူဝ်းၼၼ်ႉသေ ၽိူဝ်ႇထိုင်ၼွင်ဢုၵ်းၵေႃႈပေႃးမီးမွၵ်ႈ 5:00 မူင်းယဝ်ႉ။
ၽွင်းၸုမ်းၽူႈတႅမ်ႈၶဝ် တေႇၶဝ်ႈဝၢၼ်ႈၼွင်ဢုၵ်းၵႂႃႇၼၼ်ႉ ၸွမ်းၶၢင်ႈတၢင်းလႆႈႁၼ်ၵွင်ၶဝ်ႈၶႄႇ(ၶဝ်ႈၵၢပ်ႇ) လႄႈ
သူၼ်ထူဝ်ႇ သူၼ်ၽၵ်းၸိူဝ်းၼၼ်ႉ မိူၼ်သၽႃဝမိူင်းတႆးဝႆႉလႄႈ ၼႂ်းၸႂ်မိူၼ်ထိုင်ၶိုၼ်းမိူင်းတႆးတေႉတေႉ။ၽိူဝ်ႇ
ၸုမ်းၽူႈတႅမ်ႈၶဝ်ၶဝ်ႈဝၢၼ်ႈၼွင်ဢုၵ်း ၵႂႃႇထိုင်ၼႂ်းဝၢင်းၵျွင်း (ဝတ်ႉသၢႆလႅင်းထမ်း) ၼၼ်ႉပီႈၼွင်ႉၼွင်ဢုၵ်းၶဝ်
ပႂ်ႉႁပ်ႉတွၼ်ႈတဵမ်ထူၼ်ႈလီတေႉတေႉ။ ဝၢႆးၼၼ်ႉ ၽူႈၸတ်းၵၢၼ်ပၢင်ပွႆးၸင်ႇဢွၼ်ၵႂႃႇ တူင်ႉတၵ်ႉ ၸဝ်ႈသြႃႇ
ၼင်ႈၵျွင်း (ဝတ်ႉသၢႆလႅင်းထမ်း) သေ ဝၢႆးၼၼ်ႉထႅင်ႈ ၸၢႆးၼုမ်ႇၶိူဝ်း ၽူႈၸတ်းၵၢၼ်ႁူင်းႁဵၼ်းတီႈမုင်ႈမွင်း
ဢၼ် ပိုတ်ႇသွၼ်ပၼ်လုၵ်ႈဢွၼ်ႇတႆးယၢၼ်ဝၢၼ်ႈမိူင်းတူဝ်ၵဝ်ႇမႃးတူၵ်းမိူင်းပိူၼ်ႈၼၼ်ႉဢွၼ်ၵႂႃႇလႄႇလဵပ်ႈ
တူၺ်းႁူင်း ႁဵၼ်းသေ ယူႇၸူဝ်ႈၼိုင်ႈ လုၵ်ႈဢွၼ်ႇပွၵ်ႈႁူင်းႁဵၼ်းထႆးမႃးလႄႈ မႃးတူင်ႉတၵ်ႉမႂ်ႇသုင်။လႆႈႁၼ်ၸိူဝ်း
ၶဝ်မီး ပၵ်းပိူင် လႄႈမေႃတူင်ႉတၵ်ႉ ၶႅၵ်ႇတီႈၵႆတေႉတေႉ။
ထိုင်ၵၢင်ၶမ်ႈမႃး ဝၢႆးသေၵိၼ်ၶဝ်ႈၶမ်ႈယဝ်ႉ ၸုမ်းႁႆႇတိုင်ႈၶဝ်ၸင်ႇဢွၼ်ၵၼ်သွမ်ႈ(ၵျၢင်ႉ)ၽဵင်းၵႂၢမ်းပၼ်ပီႈၼွင်ႉ
ၼွင်ဢုၵ်း ၸိူဝ်းယိူင်းဢၢၼ်းမူၼ်ႈၸႂ်ပၼ်ၵူၼ်းမႃးၶဝ်ႈပွႆးၶဝ်။ ၽူႈတႅမ်ႈလႆႈႁၼ်ၸုမ်းမႄႈဝၢၼ်ႈ (မႄႈႁိူၼ်း) ၶဝ်
ပဵၵ်ႉသမ်ႉမႃးတူၵ်းမိူင်းပိူၼ်ႈသေတႃႉ ဢွၼ်ၵၼ်မႃးႁွင်ႉၵႂၢမ်း မူၼ်ႈမူၼ်ႈသိူဝ်းသိူဝ်း။ ပေႃးတွၼ်ႈတႃႇ ႁၵ်ႉႁွမ်
လုမ်းလႃး ၾိင်ႈငႄႈၾိင်ႈထုင်းႁဝ်းတႄႉ ပီႈၼွင်ႉတႆးႁဝ်းမေႃၵျေႃႇမေႃမူၼ်ႈၸွမ်းၵၼ်ၼင်ႇၼႆဢၼ်ႁိူဝ်ႉမူၺ်ႈ
မႃး တၢင်းဝၼ်းၼၼ်ႉပေႃးႁၢႆၵႂႃႇမူတ်းယဝ်ႉ။ ဝၢႆးသေႁွင်ႉၵႂၢမ်းယဝ်ႉၵေႃႈ ၸုမ်းမႄႈဝၢၼ်ႈၶဝ် ဢွၼ်ၵၼ်သူင်ႇသင်ႇ
ႁဝ်းႁႃးသေ ပွၵ်ႈမိူဝ်းၵႂႃႇႁင်းၽႂ်ႁင်းမၼ်း၊ ၸုမ်းၽူႈတႅမ်ႈၶဝ်ၵေႃႈၶိုၼ်းပွၵ်ႈတီႈသဝ်း ဢၼ်ၸဝ်ႈပွႆးၶဝ် ႁၢင်ႈႁႅၼ်း
ဝႆႉပၼ်ၼၼ်ႉသေလိုဝ်ႈႁိူဝ်ႉၽႂ်မၼ်းယူႇ။
ထိုင်ၵၢင်ၼႂ်မိူင်းလႅင်းမႃး ၽူႈၸတ်းၵၢၼ်ပၢင်ပၢင်ပွႆးဢဝ်ၼမ်ႉထူဝ်ႇၼဝ်ႈ လႄႈ ပႃႊထွင်ႊၵူဝ်ႊ(ဢီႇၵျႃႇၵူၺ်ႉ) မႃး
ပၼ်ၸဵမ်ၸဝ်ႉ။ ၸုမ်းၽူႈတႅမ်ႈၶဝ် ဢွၼ်လုၵ်ႉၵႂႃႇဢၢပ်ႇၼမ်ႉလၢႆႈၶူဝ်းၵိၼ် တၢင်းၵိၼ်ယဝ်ႉယႃႇယဝ်ႉ ဝူင်းၼူဝ်း
ၼဵမ်းၶဝ် ဢွၼ်ၵၼ်သွမ်ႉၽဵင်းထႅင်ႈယူႇ။ ယွၼ်ႉဢမ်ႇၸၢင်ႈႁဵတ်းသင်လႄႈ ၽူႈတႅမ်ႈၸင်ႇၵႂႃႇဢႅဝ်ႇ တူၺ်းၼႂ်း
ဝၢင်းၵျွင်းသေ ၵႂႃႇတူၺ်းတၢင်းႁွင်ႈမိုဝ်ႉ၊ လႆႈႁၼ်ၸုမ်းမႄႈဝၢၼ်ႈၶဝ် မိုဝ်ႉၵႅင်ၶဝ်ႈၽၵ်းၸွမ်းၵၼ်မူၼ်ႈမူၼ်ႈသိူဝ်း
သိူဝ်းယူႇ။ ၽူႈတႅမ်ႈၸင်ႇၶဝ်ႈၵႂႃႇတူင်ႉတၵ်ႉလၢတ်ႈတေႃႇၸိူဝ်းၶဝ်သေ ပဵၼ်ဢၼ်မိုတ်ႈၵိုဝ်းၵၼ်ၵႂႃႇတေႉတေႉ။
ဝၢႆးႁဵတ်းၶဝ်ႈၽၵ်းယဝ်ႉ ၸင်ႇၵၢပ်ႈသွမ်းသင်ႇၶႃႇၸဝ်ႈ။ ၽူႈၸတ်းၵၢၼ်ပၢင်ပွႆးၸင်ႇႁႂ်ႈမႄႈဝၢၼ်ႈ ႁၢင်ႈႁႅၼ်းပၼ်
ၶဝ်ႈဝၼ်းၸုမ်းၽူႈတႅမ်ႈၶဝ်ၵမ်းလဵဝ်။ ယူႇပႂ်ႉထႅင်ႈၸူဝ်ႈၼိုင်ႈ ဝူင်းႁႆႇတိုင်ႈၶဝ်ၵေႃႈႁွတ်ႈၽႅဝ်မႃး သေဢွၼ်ၵၼ်
ၵိၼ်ၶဝ်ႈႁူမ်ႈၵၼ်ယူႇ။ ဝၢႆးၸုမ်းႁဝ်းၵိၼ်ၶဝ်ႈယဝ်ႉ ဝူင်းႁႆႇတိုင်ႈ ၶဝ်ၶိုၼ်းမိူဝ်းသွမ်ႉၽဵင်းထႅင်ႈ ၵူၺ်းၽူႈတႅမ်ႈတႄႉ
ပႂ်ႉၵဵပ်းၽိူၼ်ၶဝ်ႈသေ ၶိုၼ်းႁႅၼ်းပၼ် ၽူႈၸတ်းပၢင်ပွႆးလႄႈ ၽူႈဢဝ်ပုၼ်ႈၽွၼ်း ၸတ်းၵၢၼ်ပၢင်ပွႆးၶဝ်၊ ၽူႈ
တႅမ်ႈ လႆႈႁၼ်ၼင်ႇၼၼ်တိုၼ်းၼေလႆႈဝႃႈ ပီႈၼွင်ႉၼွင်ဢုၵ်း ႁပ်ႉတွၼ်ႈၶႅၵ်ႇလီငၢမ်းတေႉတေႉ။
ၽူႈတႅမ်ႈသိုပ်ႇဢုပ်ႇတေႃႇ ၸုမ်းမႄႈဝၢၼ်ႈၶဝ်သေၸင်ႇထၢမ်ၺႃးၵူၼ်းမိူင်းလဵဝ်ၵၼ် လႄႈယိုင်ႈၶႅၼ်းပဵၼ်တၢင်း
သိူဝ်း ၸႂ်လိူဝ်ၵဝ်ႇ၊ ပဵၵ်ႉသမ်ႉဝႃႈ မိူဝ်ႈယူႇမိူင်းတႆးဢမ်ႇယၢမ်ႈႁူႉၸၵ်းၵၼ် သေတႃႉပေႃးတူၵ်းထိုင်မိူင်းပိူၼ်ႈမႃး
ယဝ်ႉ ႁူပ်ႉ ၺႃး ၵူၼ်းမိူင်းလဵဝ်ၵၼ်ၼႆ မီးတၢင်းၸူမ်းသိူဝ်းတေႉတေႉ။ ထၢင်ႇၽူႈဢၢၼ်ႇႁဝ်းၶဝ်ၵေႃႈတေမိူၼ်
ၼင်ႇၼႆယူႇ။
ဢုပ်ႇၵၼ်ၵႂႃႇမႃးသေၽူႈတႅမ်ႈလႆႈႁူႉထႅင်ႈဝႃႈ ၶဝ်မႃးမိူင်းထႆးၸဵမ်မိူဝ်ႈပီ 1995-96 ၽွင်းဝၢၼ်ႈမိူင်းတိုၵ်ႉသုၵ်ႉသေ
ထုၵ်ႇလိုပ်ႈၶၢႆႉဝၢၼ်ႈလႄႈ ၸင်ႇၶဝ်ႈမႃးမိူင်းထႆးၸဵမ်မိူဝ်ႈၼၼ်ႉ။တင်ႈတႄႇၼၼ်ႉမႃးဢမ်ႇပဵၼ်ပွၵ်ႈမိူဝ်းၶိုၼ်း
ႁၢၼ်ႉ တေႃႇမိူဝ်ႈလဵဝ် ဝႃႈၼႆ။ ၽူႈတႅမ်ႈယင်းတွင်းလႆႈယူႇ ၽွင်းပိူၼ်ႈလိုပ်ႈၶၢႆႉဝၢၼ်ႈၼၼ်ႉမီးၵူၼ်းပၢႆႈမႃးတီႈ
ဝၢၼ်ႈၽူႈ တႅမ်ႈၶဝ်ၼမ်တေႉတေႉ။ ၽွင်းၼၼ်ႉယွၼ်ႉတိုၵ်ႉၵေႃႉလဵၵ်ႉလႄႈ ၽူႈတႅမ်ႈတႄႉမီးတၢင်းသိူဝ်းယွၼ်ႉ
မီးၵေႃႉၼမ် ၼၼ်ႉယဝ်ႉ၊ ၽွင်းၼၼ်ႉတၢင်းၶီတၢင်းမႆႈ ဢမ်ႇႁွၼ်ႇမေႃဝူၼ်ႉႁူႉၸွမ်းသင်။ယၢမ်းလဵၼ်ႈၵေႃႉၵၼ်
ၼၼ်ႉလႆႈႁၼ် ဢူၺ်းၵေႃႉၶဝ် ၵိၼ်ၶဝ်ႈပဵမ် (ၶဝ်ႈဢၼ်ၽတ်းဢဝ်မႃးတီႈၵႅပ်ႇ) ၽူႈတႅမ်ႈၶႂ်ႈၵိၼ်သေၵိၼ်ၸွမ်း
ၶဝ်ယူႇ။ မၢင်ၼႃႈ ႁိူၼ်းၵေႃႈ ၼွၼ်းတႂ်ႈၶႃႇၽၵ်းပၵ်ႉ၊ ၶႃႇထူဝ်ႇ လႄႈ မၢင်ၼႃႈႁိူၼ်းပေႃးမီးပီႈၼွင်ႉၵေႃႈယူႇ ဢမ်ႇ
မီးၵၢၼ်လႄႈလႆႈမႃးမိူင်းထႆးၵမ်းသိုဝ်ႈသေ ႁၢၼ်ႉတေႃႇမိူဝ်ႈ လဵဝ် ယင်းပႆႇ လႆႈ ပွၵ်ႈမိူဝ်းၶိုၼ်းမိူၼ်ၼင်ႇၸုမ်းမႄႈ
ဝၢၼ်ႈ ၼွင်ဢုၵ်းႁဝ်းၼႆႉယဝ်ႉ။
ဝၢၼ်ႈၼွင်ဢုၵ်းၼႆႉ လင်ႁိူၼ်းမီး 3,000 ပၢႆ ၵမ်ႈၼမ်ပဵၼ်ၶႄႇ၊ တႆးတေမီးမွၵ်ႈ 200 ပၢႆလင်ၶႃးႁိူၼ်း။ၵူၺ်းၵမ်ႈ
ၽွင်ႈ ၸိူဝ်းၶၢတ်ႈႁွင်ႈယူႇၵေႃႈမီး။ ပီႈၼွင်ႉတႆးမၢင်ၵေႃႉၵေႃႈ သမ်ႉပေႃးမေႃၵႂၢမ်းၶႄႇသေပီႈၼွင်ႉၶႄႇမၢင်ၸိူဝ်း
ၵေႃႈ လၢတ်ႈ ၵႂၢမ်းတႆးလႆႈမိူၼ်ၵၼ်၊ ၽႃႇသႃႇၵၢင်ဢၼ်ၵပ်းသိုပ်ႇၵၼ်ၼႂ်းမူႇဝၢၼ်ႈၼႆႉၸႂ်ႉၵႂၢမ်းထႆး။ၵူၺ်းပေႃး
ၵူၼ်းထဝ်ႈ၊ ၵူၼ်း ၶၢဝ်ႉ မၢင်ၵေႃႉဢမ်ႇမေႃၵႂၢမ်းထႆးလႄႈ မၢင်ပွၵ်ႈ လႆႈၸႂ်ႉလုၵ်ႈဢွၼ်ႇပဵၼ်ႇ(ပႄ)ပၼ်ၼႆယဝ်ႉ။
ၽူႈတႅမ်ႈလႆႈယိၼ်းၵူၼ်းထဝ်ႈ ၼႂ်းဝၢၼ်ႈလၢတ်ႈဝႃႈၼွင်ဢုၵ်း ပဵၼ်ဝၢၼ်ႈၵဝ်ႇတႆး။ ၵူၺ်းၵႃႈပေႃးမႃးတူၺ်းယၢမ်း
လဵဝ် သမ်ႉ တီႈလိၼ်ဢၼ်ပီႈၼွင်ႉတႆးႁဵတ်းႁိူၼ်းယူႇၵၼ်ယူႇယၢမ်းလဵဝ်ၼႆႉသမ်ႉလႆႈသိုဝ်ႉဢဝ်တီႈပီႈၼွင်ႉၶႄႇ
ၶဝ်လၢႆလၢႆ ၼႆယဝ်ႉ။ မိူဝ်ႈၵွၼ်ႇ ၼိုင်ႈဝႃး လႆႈပၼ် 10,000 ဝၢတ်ႇ ၵူၺ်းယၢမ်းလဵဝ်သမ်ႉၶိုၼ်ႈၵႃႈၶၼ်မၼ်းမႃး
ထႅင်ႈလႄႈၼိုင်ႈ ဝႃးလႆႈပၼ် 15,000 ဝၢတ်ႇၼႆယဝ်ႉ။ ပၢႆႉလိၵ်ႈၸွမ်းတၢင်းၵေႃႈလႆႈႁၼ်ပဵၼ်လိၵ်ႈထႆး လႄႈ
လိၵ်ႈၶႄႇ ၵမ်ႈၼမ်ယဝ်ႉ။
လုၵ်ႈဢွၼ်ႇဢၼ်ၶဝ်ႈႁူင်းႁဵၼ်းထႆးတီႈၼွင်ဢုၵ်းၼႆႉ ပေႃးၸူပ်း(ပူၼ်ႉ)ၸၼ်ႉသုင်ယဝ်ႉတႃႇသိုပ်ႇၶိုၼ်ႈၸၼ်ႉ
ၸွမ်ၼၼ်ႉလႆႈမႃးၶိုၼ်ႈတီႈၵဵင်းမႆႇ။ ပီႈၼွင်ႉၶႄႇတီႈၼႆႈၵမ်ႈၼမ် တေၼမ်ႉထိုဝ် ၽႃႇသႃႇၶရိတ်ႉ။ တႃႇႁူင်းႁဵၼ်း
ၶႄႇတႄႉတေသွၼ်ပၼ် ဝၢႆးပွၵ်ႈႁူင်းႁဵၼ်ထႆး 5:00 ႁူဝ်ၶမ်ႈ ထိုင် 8:00 မူင်း။ ႁူင်းႁဵၼ်ၶႄႇၼႂ်းဝၢၼ်ႈၼွင်ဢုၵ်း
မီး 5 လင် ထႅင်ႈလင်ၼိုင်ႈတိုၵ်ႉတေသၢင်ႈထႅင်ႈယင်းပႆႇယဝ်ႉ။ ပေႃးႁဵၼ်းၸူပ်းႁူင်းႁဵၼ်းၶႄႇ ထိုင်ၸၼ်ႉသုင်
(မေႃးႁူၵ်း) ၸိုင် သင်ၶႂ်ႈၵႂႃႇမိူင်းဝဵတ်ႉၼၢမ်းၵေႃႈၶဝ်တေသူင်ႇပၼ်ၼႆယဝ်ႉ။ ၼႆႉပဵၼ်လွၵ်းလၢႆးပီႈၼွင်ႉၶႄႇၶဝ်
ႁၵ်ႉသႃၽႃႇသႃႇ လိၵ်ႈလၢႆး တိုတ်ႉတၢႆးၸိူဝ်ႉၶိူဝ်းပိူၼ်ႈယဝ်ႉ။ တႃႇပီႈၼွင်ႉၸိူဝ်ႉၶိူဝ်းတႆးႁဝ်းလူး? …….
ဢၼ်လီၶေႃးၶူမ်တႄႉ တႃႇႁူင်းႁဵၼ်းတႆးသမ်ႉမီးႁူင်းႁဵၼ်းဢၼ်သႂ်ႇၸိုဝ်ႈဝႃႈ “ႁူင်းႁဵၼ်းတီႈမုင်ႈမွင်း”
ၼႆတီႈလဵဝ်ၵူၺ်း ဢမ်ႇၵႃး ဝတ်ႉဝႃး တႃႇပူၵ်းပွင်ၾၢႆႇသႃႇသၼႃႇႁဝ်း ၵေႃႈမီးဝတ်ႉသၢႆလႅင်းထမ်း ဝတ်ႉလဵဝ်ၵူၺ်း။
ၸိူင်ႉႁိုဝ်ၵေႃႈလီတေ လႆႈဝႃႈ ၶႅၼ်းသေဢမ်ႇမီးသေဢိတ်းၼၼ်ႉလႄႈ လႆႈဝႃႈပဵၼ်တီႈၵမ်ႉထႅမ် လႄႈ
တီႈပိုင်ႈဢိင် ပီႈၼွင်ႉတႆးၼွင် ဢုၵ်းၶဝ်တေႉတေႉယူႇ။
ပေႃးယူႇတီႈႁိမ်းၸဵင်ႇဝတ်ႉၼၼ်ႉသေ မုင်ႈလူင်းၵႂႃႇ တၢင်းတူၵ်းၸဵင်ႇတႂ်ႈၸိုင် တေလႆႈႁၼ် ၼွင်လူင်ၵႂၢင်ႈယႂ်ႇ
သွင် လုၵ်ႈၶၢင်းၵၼ်ဝႆႉယူႇ။ ၼမ်ႉၼွင်ၵေႃႈၸိုၼ်ႈသႂ်လီ ဢမ်ႇမီးယုၵ်းယၢၵ်း ယိူဝ်ႈယႃႈသင်သေဢိတ်း မွၵ်ႇမူဝ်
ၵေႃႈယင်း ဢမ်ႇမီးလႄႈႁၼ်ၸိုၼ်ႈသႂ်လီတေႉတေႉ။ မိူဝ်ႈၵွၼ်ႇတီႈႁိမ်းၾင်ႇၼွင်တေမီးၵၢတ်ႇၼတ်(ၵတ်ႇႁႃႈ
ဝၼ်း) မီးၵူၼ်း မႃးၶၢႆၶူဝ်းၶွင်ၵူၼ်းၵိုၼ်းတေႉတေႉၼႆယဝ်ႉ။ ၵူၺ်းမိူဝ်ႈလဵဝ်တႄႉၶၢႆႉၵႂႃႇႁဵတ်းၼႂ်းဝၢၼ်ႈယဝ်ႉလႄႈ
တီႈၾင်ႇၼွင် ဢမ်ႇမီးၵၢတ်ႇၼတ်ႉယဝ်ႉ။
ဢၼ်လီသူၼ်ၸႂ်လိူဝ်သေၼႆႉၵေႃႈ တီႈဝၢၼ်ႈၼွင်ဢုၵ်းၼႆႉ တိုၼ်းႁဵတ်းပွႆး ၾိင်ႈငႄႈ ၾိင်ႈထုင်း ၸွမ်းၶိင်ႇၸွမ်း
ၶၢဝ်း ၼၼ်ႉတႃႇသေႇ မိူၼ်ၼင်ႇပွႆးတဵၼ်း၊ ပွႆးဢွၵ်ႇဝႃႇ၊ လိူၼ်သိပ်းသွင် ပွႆးသၢင်ႇလွင်း ၸိူဝ်းၼႆႉ ဝၢၼ်ႈႁိမ်းႁွမ်း
ၸဵမ်ၸမ် ၸဵမ်ၵႆဢၼ်ယူႇႁိမ်းၼွင်ဢုၵ်းၼၼ်ႉၵေႃႈ မႃးၶဝ်ႈႁူမ်ႈၼႄတၢင်းၵႃႈ တၢင်းဝႅၼ်။ ၼွၵ်ႈသေၼၼ်ႉ
ဝၢၼ်ႈ ဢၼ်ယူႇ ၼႂ်းလႅၼ်လိၼ်ပုင်ႇပႃႇၶႅမ် မၢင်ပွၵ်ႈမိူင်းတူၼ် ၼႂ်းၸိုင်ႈတႆးၸိူဝ်းၼၼ်ႉၵေႃႈမႃးၶဝ်ႈႁူမ်ႈၸွမ်း
ၼႆယဝ်ႉ။
ၸိူင်ႉႁိူဝ်ၵေႃႈလီ တႃႇၽူႈတႅမ်ႈတႄႉ ဢၼ်လႆႈမႃးၽွင်းၶဝ်ႈပွႆးပီမႂ်ႇတႆး 2106 ၼီႈ တီႈၼွင်ဢုၵ်းၼႂ်းၶၢဝ်းတၢင်း
ႁႃႈ ဝၼ်းၼႆႉလႆႈႁဵၼ်းႁူႉပႃးလၢႆလၢႆလွင်ႈ ၸဵမ်ၵၢၼ်ယူႇ ၵၢၼ်ၵိၼ် လိူဝ်ၼၼ်ႉ လႆႈမိုတ်ႈၵိုဝ်းဝႆႉပႃးပီႈၼွင်ႉၼွင်
ဢုၵ်းၶဝ်။ ပဵၵ်ႉသမ်ႉပဵၼ်ၶၢဝ်းယၢမ်းပွတ်းပွတ်းဢွၼ်ႇ ၵူၺ်းသေတႃႉ ပဵၼ်တီႈမၢႆတွင်းၽူႈတႅမ်ႈဢၼ်ဢမ်ႇၸၢင်ႈ
မေႃလိုမ်းလႆႈ သေပွၵ်ႈၼၼ်ႉယဝ်ႉ။ ၼႂ်းတိုဝ်ႉတၢင်းပီမႂ်ႇၼႆႉ ယွၼ်းႁႂ်ႈ ၵူႈၵေႃႉ မီးတၢင်းၶတ်းၸႂ် လႄႈလူင်းမိုဝ်း
ႁဵတ်းသၢင်ႈ တႃႇ ယၢင်ႈႁွတ်ႈထိုင်ယိူင်းမၢႆ ၸဝ်ႈၵဝ်ႇသေၵမ်းၼႆယွၼ်းဢဝ်ပွင်ႈၵႂၢမ်းဢွၼ်ႇႁူဝ်ၼႆႉပဵၼ်ၶူဝ်းတွၼ်ႈ
ပီမႂ်ႇတႆးပီ 2106 ၼီႈ ယိုၼ်ႈထိုင်ပီႈၼွင်ႉၸိူဝ်ႉၶိူဝ်းတႆးႁဝ်းၶဝ်ယဝ်ႉ။
