ပၢႆးယူႇလီ

ၵူတ်ႇၸႅတ်ႈပႃႈၼႂ်းႁူင်းလုၵ်ႈ သၢဝ်ၶဝ်ဢမ်ႇထုၵ်ႇလီဢၢႆ

တႃႇတေၵူတ်ႇၸႅတ်ႈပႃႈၼႂ်း(ၽႆးၼႂ်း)ၼၼ်ႉ ယွၼ်ႉမၼ်းပဵၼ်ၽွၼ်းလီပုၼ်ႈသုၼ်ႇတူဝ်ၼၢင်းယိင်းလႄႈဢမ်ႇၸႂ်ႈ လွင်ႈလီဢၢႆ၊  ထုၵ်ႇလီႁၵ်ႉတူဝ်ၵဝ်ႇလႄႈပၢႆးယူႇလီတူဝ်ၵဝ်ႇၼင်ႇႁိုဝ်ပေႃးတေဢမ်ႇပဵၼ်တၢင်း ပဵၼ် ဢၼ်ၸွမ်းၵၢပ်ႈ မိူၼ်ၼင်ႇမၢၵ်ႇႁႅင်း(ၵႅၼ်ႇသႃႇ) ႁူင်းလုၵ်ႈလႄႈၵႅၼ်ႇသႃႇတဝ်ႈၼူမ်းၼၼ်ႉ ယဝ်ႉ။

လွင်ႈဝႆႉၼမ်ႉၼၵ်း သႂ်ႇၸႂ်ပၢႆးယူႇလီတူဝ်ၵဝ်ႇဢွၼ်တၢင်းၼၼ်ႉပဵၼ်လွင်ႈလီသုတ်းယဝ်ႉ။  ပေႃးတေၵုမ်ႇ ဢၢႆသေ ဝူၼ်ႉ ဝႃႈမေႃၶဝ်တေႁၼ်ၶွင်လီၶွင်ငၢမ်းတူဝ်ၵဝ်ႇ ၸဝ်ႈၵဝ်ႇယူႇၸိုင်ဢမ်ႇပဵၼ်ပၢင်ယဝ်ႉ ယွၼ်ႉဝႃႈ ၵၢပ်ႇပၢၼ်မိူဝ်ႈ လဵဝ်တၢင်းပဵၼ်ၵေႃႈမႃးၸွမ်းၵၢပ်ႈၸွမ်းပၢၼ်မၼ်းတိၵ်းတိၵ်း။ တၢင်းပဵၼ်မၢင်မဵဝ်းၼႆႉယင်း ပႆႇယၢမ်ႈငိၼ်းၸိုဝ်ႈမၼ်း သေပွၵ်ႈလူးၵွၼ်ႇ။ သင်တေၵုမ်ႇဢၢႆယူႇၵူၺ်းတႄႉတေယၢပ်ႇ တႃႇတူဝ်ၸဝ်ႈၵဝ်ႇ ယဝ်ႉ။ ၵွပ်ႈၼၼ်ယွမ်းပႅတ်ႈတၢင်း ဢူၵ်းဢၢႆၸဝ်ႈၵဝ်ႇသေ ႁႂ်ႈမေႃၶဝ်ၵူတ်ႇၸႅတ်ႈပႃႈၼႂ်း (ၽၢႆးၼႂ်း) 1 ပီႊ 1 ပွၵ်ႈၼၼ်ႉပဵၼ်ၽွၼ်းလီတႃႇႁၢင်ၵႆတၢင်း ပဵၼ်မၢၵ်ႇႁႅင်း(ၵႅၼ်ႇသႃႇ)ၼႂ်းၼၢင်းယိင်း တႄႉတႄႉ။

ယၢမ်ႈမီးၼၢင်းယိင်းၵေႃႉၼိုင်ႈ ငိၼ်းလီတႃႇတေလႅၵ်ႈလၢႆႈပၼ်လွင်ႈဢၼ်တူဝ် မၼ်းၼၢင်းလႆႈထူပ်းမႃး ၵူၺ်းၵႃႈ မၼ်းၼၢင်းဢမ်ႇၽွမ်ႉတႃႇတေမွၵ်ႇလၢတ်ႈၸိုဝ်ႈတူဝ်ၵဝ်ႇဝႃႈပဵၼ်ၽႂ်။ ဢႃႇယုမၼ်းၼၢင်းလႆႈ 35 ပီႊ မၼ်းၼၢင်း တိတ်းၸပ်းၸိူဝ်ႉမႅင်းဢဵတ်ႇသ်ဝႆႉယူႇယဝ်ႉ။ မၼ်းၼၢင်းလၢတ်ႈ ၼႄဝႃႈ “မိူဝ်ႈမၼ်းၼၢင်း ပႆႇယၢမ်ႈၵူတ်ႇၸႅတ်ႈၼၼ်ႉ ဢွၼ်တၢင်းသုတ်းမၼ်းၼၢင်းဝူၼ်ႉဝႃႈ ပေႃးယွမ်းပႅတ်ႈတၢင်းဢၢႆသေၵူတ်ႇ ၸႅတ်ႈ ႁႂ်ႈႁူႉလမ်ႁူႉလႅင်ၸိုင် တေလီသေ ၵူတ်ႇၸႅတ်ႈယဝ်ႉႁူႉဝႃႈတူဝ်ၵဝ်ႇပဵၼ်မၢၵ်ႇႁႅင်း (ၵႅၼ်ႇသႃႇ) ယဝ်ႉ ၵမ်းၵမ်းလႆႈၵႂႃႇႁႂ်ႈမေႃၶဝ်တူၺ်းသေၵူတ်ႇၸႅတ်ႈယူႇ၊ ဢၢႆဢၼ်ဝႃႈၼၼ်ႉ ၶဝ်ႈၸႂ်ႁၼ်ၸႂ်ၼၢင်းယိင်းၵူႈၵေႃႉ ယူႇ”ၼႆ မၼ်းၼၢင်းၶႂ်ႈသင်ႇလၢတ်ႈဝႆႉၸိူင်ႉၼႆ ယူႇယဝ်ႉ။

ယင်းမီးၼၢင်းယိင်းထႅင်ႈၵေႃႉၼိုင်ႈၸိုဝ်ႈၼၢင်းပိၼ်ႇ ပဵၼ်ၵူၼ်းႁဵတ်းၵၢၼ်ၼႂ်းၶွမ်ႊပၼီႊၵေႃႉၼိုင်ႈမၼ်းၼၢင်းပဵၼ် ၼၢင်း ယိင်းဢၼ်တၢင်းဢၢႆယႂ်ႇမိူၼ်ၵၼ်ၼင်ႇၵဝ်ႇ ဢမ်ႇႁတ်းၵႂႃႇၵူတ်ႇၸႅတ်ႈ ယွၼ်ႉဝႃႈ ဢၢႆ။ မၼ်းၼၢင်းမီးတၢင်း ပဵၼ်တွင်ႉၸဵပ်းလိူတ်ႈႁူဝ်လိူၼ်ႁၢဝ်ႉႁႅင်းသေဢမ်ႇၵႃး ၵူဝ်တၢင်းပဵၼ်ၼမ်လိူဝ်တၢင်း ဢၢႆလႄႈ ၸင်ႇတႅပ်းတတ်း သဵၼ်ႈ ၸႂ်ယွမ်း ပႅတ်ႈတၢင်းဢၢႆသေၵူတ်ႇၸႅတ်ႈ။ ဝၢႆးသေၵူတ်ႇၸႅတ်ႈ ယဝ်ႉႁၼ် ၵွၼ်ႈၼိူဝ်ႉလိူဝ်ၼႂ်းႁူင်းလုၵ်ႈမၼ်း ၼၢင်းၼၼ်ႉလႄႈ မၼ်းၼၢင်းလႆႈၵူတ်ႇၸႅတ်ႈၸွမ်းမေႃၵေႃႉၼိုင်ႈ ယဝ်ႉ ၵေႃႉၼိုင်ႈတင်းမေႃၽူႈယိင်းလႄႈၽူႈၸၢႆး ၸဵမ်ၸိူဝ်းၼႆႉယူႇယဝ်ႉ။

ၵွပ်ႈၼၼ် တၢင်းဢူၵ်းတၢင်းဢၢႆ ၼၼ်ႉလိုမ်းပႅတ်ႈၵမ်းၼိုင်ႈသေ ၶႅၼ်းတေႃႈဝႆႉလွင်ႈပၢႆးယူႇလီၸဝ်ႈၵဝ်ႇၶိုၵ်ႉၶႅမ်ႉသေ ၵမ်း မိူၼ်ၼင်ႇၵႂၢမ်းတႆးမီးဝႆႉဝႃႈ “ၵွတ်းငိုၼ်းဢမ်ႇလူဝ်ႇၶီ ပေႃးယူႇလီႁႃလႆႈ၊ ၵွင်ငိုၼ်းတၢၼ်ႇလွႆႁႆႈ ပေႃးႁူဝ်ၶႆႈတေ ႁဵတ်းႁိုဝ်သိူဝ်း” ၼႆၼၼ်ႉယဝ်ႉ။