ပၢႆးယူႇလီ
ယိင်ႊလၵ်ႊ ၶိုၼ်ႈပဵၼ် ၸွမ်ၽွင်းလူင်ထႆး ၵေႃႉထိ 28
- Details
- Published on Tuesday, 09 August 2011 09:22
- Written by သိုဝ်ႇႁႅင်းၼုမ်ႇ
မိူဝ်ႈဝၼ်းထိ 8.8.2011 မိူဝ်ႈဝႃးယၢမ်း 6:45 မူင်းဝၢႆးဝၼ်းၶုၼ်ႊယိင်ႊလၵ်ႊ ၶျိၼ်ႊ ၼဝတ်ႊ ႁိုဝ်ၼၢင်း သၢဝ် ယိင်ႊလၵ်ႊ ၶျိၼ်ႊၼဝတ်ႊ(นางสาวยิ่งลักษณ์ ชินวัตร) ပႃႇတီႇ (ၽၵ်း)ၽိူဝ်ႊထႆး (တႃႇၵူၼ်းမိူင်းထႆး) လႆႈႁပ်ႉတၼ်းႁဵင်းပဵၼ်ၸွမ် ၽွင်းလူင်ၸိုင်ႈ ထႆးၵေႃႉထိ 28 ပဵၼ်ၼၢင်းယိင်းၵေႃႉဢွၼ်တၢင်းသုတ်းၼႂ်းၸိုင်ႈထႆးဝၢႆးပႃႇတီႇမၼ်း ၼၢင်းပေႉလိူၵ်ႈတင်ႈ မိူဝ်ႈဝၼ်းထိ 3.7.2011 ပူၼ်ႉမႃး။
ၼၢႆႊၽိထုၼ်ႊ ၽုမ်ႊႁီႊရၼ်ႊ ၵႅမ်ႁူဝ်ပဝ်ႈသၽႃး ၸိုင်ႈထႆးလႆႈႁွတ်ႈထိုင်ဢွင်ႈတီႈပႃႇ တီႇၽိူဝ်ႊထႆး ဢၼ်ႁၢင်ႈႁႅၼ်းဝႆႉ တႃႇတႅင်ႇတင်ႈၼၢင်းသၢဝ်ယိင်ႊလၵ်ႊ ၶျိၼ်ႊၼဝတ်ႊ ႁပ်ႉတၼ်းႁဵင်းပဵၼ် ၸွမ်ၽွင်းလူင် ထႆးသေလူဢၢၼ်ႇၽိုၼ်လိၵ်ႈ ဢၼ်ၸဝ်ႈႁေႃၶမ်း ထႆး မွပ်ႈဢၢပ်ႈတႅင်ႇတင်ႈၼၢင်းသၢဝ် ယိင်ႊလၵ်ႊ ၶျိၼ်ႊၼဝတ်ႊ ၶိုၼ်ႈပဵၼ်ၸွမ်ၽွင်း လူင်ၸိုင်ႈထႆး ၵေႃႉထိ 28 ၵႂႃႇယူႇယဝ်ႉ။
ဝၢႆးၼၼ်ႉၼၢင်းသၢဝ်ယိင်ႊလၵ်ႊ ၶျိၼ်ႊၼဝတ်ႊ ႁပ်ႉတၼ်းႁဵင်းပဵၼ်ၸွမ်ၽွင်းလူင် ပဵၼ်တၢင်းၵၢၼ်သေ ၵၢဝ်ႇမွၵ်ႇလၢတ်ႈ ၶေႃႈၵႂၢမ်း ၶိုၼ်ႈပဵၼ်ၸွမ်ၽွင်းလူင်ၸိုင်ႈထႆး။
မၼ်းၼၢင်းလၢတ်ႈဝႃႈ “ၼပ်ႉယမ်ထိုင်ပီႈၼွင်ႉၵူၼ်းမိူင်းထႆးတင်းသဵင်ႈ ယၢမ်းလဵဝ် ၸဝ်ႈႁေႃၶမ်း ၽူႊမိၽူၼ်ႊ ဢတုၼ်ႊ ယတဵတ်ႊၶျ် (ภูมิพลอดุลยเดช พระบาทสมเด็จพระเจ้าอยู่หัว) ၽရႃႊ ၸဝ်ႈယူႇႁူဝ် ႁဝ်းၶႃႈ လႆႈမွပ်ႇဢၢပ်ႈႁႂ်ႈၶႃႈၼၢင်း ပဵၼ်ၸွမ်ၽွင်း လူင်မိူင်းထႆးယဝ်ႉလႄႈ ၶႃႈၼၢင်းႁူမ်ၸူမ်း ၼပ်ႉထိုဝ် ထိုင်ၸဝ်ႈႁေႃၶမ်းႁဝ်းၶႃႈပေႃး ဢမ်ႇသုတ်းဢမ်ႇသဵင်ႈ သေ တေသိုပ်ႇႁဵတ်းၵၢၼ်ပုၼ်ႈ ၸိူဝ်ႉ ၸၢတ်ႈဝၢၼ်ႈမိူင်းလႄႈ ၽွၼ်းလီပုၼ်ႈပီႈၼွင်ႉၵူၼ်းမိူင်းတင်းသဵင်ႈ။ ၶႃႈၼၢင်းၽွမ်ႉ တႃႇႁဵတ်းၵၢၼ်ၸွမ်းလၢႆ ၽၢႆႇလၢႆတၢင်းလႄႈတေဢမ်ႇႁဵတ်းၵၢၼ်တႃႇ ၸုမ်းလႂ်ၸုမ်းၼိုင်ႈတေႁဵတ်းၵၢၼ်တႃႇ ပုၼ်ႈၵူၼ်း တင်းၼမ် ပိူဝ်ႈတႃႇၸိူဝ်ႉၸၢတ်ႈ ဝၢၼ်ႈမိူင်းႁဝ်းသေတေသၢၼ်ၶတ်းလွင်ႈ ၵိၼ်သူးၵိၼ်လၢပ်ႈ၊ ပဵၵ်ႉသမ်ႉၶႃႈၼၢင်းပဵၼ် ၼၢင်း ယိင်းသေတႃႉတေဢမ်ႇပဵၼ် လွင်ႈဢၼ်တေႁဵတ်းႁႂ်ႈၵိူတ်ႇပၼ်ႁႃၶိုၼ်ႈ” ဝႃႈၼႆယဝ်ႉ။
ၼၢင်းသၢဝ်ယိင်ႊလၵ်ႊ ၶျိၼ်ႊၼဝတ်ႊ ပဵၼ်ၼွင်ႉယိင်းၸွမ်ၽွင်းလူင်ၵဝ်ႇ ထၵ်းသိၼ်ႊ ၶျိၼ်ႊၼဝတ်ႊဢၼ်ထုၵ်ႇတပ်ႉ သိုၵ်းယိုတ်းဢၢမ်းၼၢတ်ႈၽွင်းၵႂႃႇၶိုၼ်ႈပၢင်ၵုမ်လူင် ၵူႈလွင်ႈလွင်ႈၸၢတ်ႈၸိုင်ႈလုမ်ႈၾႃႉ မိူဝ်ႈပီ 2006။ ယၢမ်းလဵဝ်ၶုၼ်ႊ ထၵ်းသိၼ်ႊ ၶျိၼ်ႊၼဝတ်ႊ ယူႇသဝ်းဝႆႉၼွၵ်ႈမိူင်း။
