ပၢႆးယူႇလီ
သိုဝ်ႇႁႅင်းၼုမ်ႇၸတ်းဝၼ်း ၶွပ်ႈၶူပ်ႇတဵမ် 9 ပီ
- Details
- Published on Monday, 15 August 2011 21:06
- Written by Super User
ဝၼ်းသဝ်ပူၼ်ႉမႃးၼႆႉသိုဝ်ႇႁႅင်းၼုမ်ႇလႆႈၸတ်းဝၼ်းၶွပ်ႈၶူပ်ႇတဵမ် 9 ပီ လႄႈလႆႈၼႄ ပႃးလွင်ႈၶိုပ်ႈၼႃႈၵၢၼ်ဢၼ်လႆႈတေႇ မႃးမိူဝ်ႈ 2002 ထိုင် 2011 ဢိၵ်ႇ တင်းပိုတ်ႇ ၼင် ဢၼ်ၶူင်းၵၢၼ်ပၢႆးပိင်ႇၺႃႇ ဢွၼ်ႁဵတ်းမႃး။
ဝၼ်းထီႉ 13.8.2011 ၶၢဝ်းယၢမ်း 13:00-16:00 သိုဝ်ႇႁႅင်းၼုမ်ႇလႆႈၸတ်းဝၼ်း ၶွပ်ႈၶူပ်ႇတႅမ် 9 ပီတီႈၼႂ်းလႅၼ်လိၼ်ထႆး တီႈၼိုင်ႈ။ ၼႂ်းၼၼ်ႉလႆႈၼႄပႃးၵၢၼ် ဢၼ်ႁဵတ်းဢွၼ်တၢင်းသုတ်း မီးၶူင်းၵၢၼ်ၶၢဝ်ႇဢၼ်လဵဝ်။ ဝၢႆးၼၼ်ႉဢိင်ၼိူဝ်ႁႅင်း လုၼ်ႈၼွင်ႉ ၶဝ်ႈမႃးႁူမ်ႈၸွမ်းသေလႄႈၸင်ႇလႆႈၶႂၢၵ်ႈၶူင်းၵၢၼ်ၽိူမ်ႉၶိုၼ်ႈထႅင်ႈမိူၼ် ၼင်ၽၢႆႇၶၢဝ်ႇ၊ ပၢႆးပိင်ႇၺႃႇ၊ ၶွမ်ႇပိဝ်ႇ တႃႇ၊ IT ၊ ပၢႆးယူႇလီ၊ ပၢႆးပိင်ႇၺႃႇ လႄႈ ပူၵ်းပွင် မူႇဝၢၼ်ႈ ၸိူဝ်းၼႆႉယူႇယဝ်ႉ။
ၸၢႆးလၢၼ်တႆး ၽူႈပွင်ၵၢၼ်ၸုမ်းသိုဝ်ႇႁႅင်းမွၵ်ႇလၢတ်ႈဝႃႈ " လွင်ႈဢၼ်လႆႈၵေႃႇတင်ႈ ၸုမ်းမႃးၼႆႉဢိင်ၼိူဝ်ၵူၼ်းၼုမ်ႇတႆး ႁဝ်းၶႃႈလႆႈမႃးႁဵၼ်းလိၵ်ႈၼႂ်းမိူင်းထႆး၊ ၵူၼ်းၼုမ်ႇ ဢၼ်ယူႇၼႂ်းမိူင်းတႆးပွတ်းႁွင်ႇ၊ ပွတ်းၸၢၼ်း လႄႈ ပွတ်းဢွၵ်ႇႁဝ်းၶႃႈလႆႈ မႃးႁူမ်ႈၵၼ် သေၵေႃႇတင်ႈမႃးၸုမ်းသိုဝ်ႇႁႅင်းၼုမ်ႇမိူဝ်ႈပီ 2002" ဝႃႈၼႆ။
ဝၢႆးသေၼၼ်ႉလႆႈၼေပႃး လွင်ႈတူင်ႉၼိုင် ဢၼ်ၸုမ်းသိုဝ်ႇႁႅင်းၼုမ်ႇလႆႈႁဵတ်းသၢင်ႈ မႃးလႄႈၽၢင်ႁၢင်ႈဝႅပ်ႉသၢႆႊဢၼ်တေ လၢႆႈမႂ်ႇ၊ ႁဵတ်းဢွၵ်ႇၽႅၼ်ႇ(မူၼ်ႉ(ၶူၺ်ႇ) CD၊ ပပ်ႉၶၢဝ်ႇ၊ ပပ်ႉလၢႆးငၢၼ်းၵဵဝ်ႇလူၺ်ႈပၢႆးပၺႃႇလုၵ်ႈဢွၼ်ႇၼႂ်းမိူင်းထႆး- မိူင်းတႆး လႄႈ ၸိူင်းပွတ်း(ၼင်ပွတ်း)ဢၼ်လုၵ်ႈႁဵၼ်းၶူင်းၵၢၼ်ပၢႆးပိင်ႇၺႃႇႁဵတ်းဝႆႉ ဢၼ်ႁွင်ႉၸိုဝ်ႈ ဝႃႈ "လွင်ႈယုင်ႈယၢင်ႈ လုၵ်ႈ ဢွၼ်ႇယၢၼ်မိူင်း ၼႂ်းဝၼ်းလိုဝ်ႈႁဵၼ်း" ၼႆၸိူဝ်းၼႆႉ ယဝ်ႉ။
ၸၢႆးမဵဝ်းဢွင်ႇ ၽူႈပွင်ၵၢၼ်ပၢႆးပၺႃႇလၢတ်ႈဝႃႈ "လွင်ႈႁဵတ်းဢွၵ်ႇ ၼင်ပွတ်းၼႆႉ ၶႂ်ႈႁႂ်ႈလုၵ်ႈဢွၼ်ႇဢၼ်ယူႇၼႂ်းမိူင်းတႆးႁူႉ လွင်ႈယူႇၵိၼ်ၶွင်လုၵ်ႈ ဢွၼ်ႇယၢၼ်မိူင်း ၼႂ်းမိူင်းထႆး။ သၢင်ႈႁႂ်ႈလုၵ်ႈဢွၼ်ႇလႆႈႁဵၼ်းႁူႉ လွၵ်းလၢႆးႁဵတ်းဢွၵ်ႇၼင်၊ ႁႂ်ႈၶဝ် ႁဵၼ်း ႁူႉလွင်ႈသိင်ႇဝႅတ်ႉလွမ်ႉ၊ လွင်ႈပၢႆးၼပ်ႉ လႄႈလွင်ႈၾိင်ႈထုင်းၸိူဝ်းၼႆႉ" ဝႃႈၼႆယဝ်ႉ။
ဝၢႆးၼၼ်ႉ ပေႃႈထဝ်ႈၵၼ်းၸဵတ်းၾၢၵ်ႇလၢတ်ႈၶေႃႈၵႂၢမ်းၼႂ်းဝၼ်းၵိူတ်ႇသိုဝ်ႇႁႅင်း ၼုမ်ႇ ဝႃႈ" ၸုမ်းသိုဝ်ႇႁႅင်းၼုမ်ႇၼႆႉဢမ်ႇ ၸႂ်ႈဝႃႈမီးငိုၼ်းမီးတွင်းသေၵေႃႇတင်ႈ ၶိုၼ်ႈမႃး၊ လုၵ်ႉတီႈဢမ်ႇမီးဢီသင်သေၶိုၼ်ႈမႃးတေႃႇပေႃးပဵၼ်ၸိူင်ႉၼႆၼႆႉဢဝ်ၵုင်ႇ မုၼ်ၸုမ်း သိုဝ်ႇႁႅင်းၼုမ်ႇတေႉတေႉ။ လွင်ႈတၢင်းယၢပ်ႇၽိုတ်ႇၼႆႉ ႁဝ်းႁဵတ်းၵၢၼ်သင်ၵေႃႈပေႃး ဢမ်ႇမီးတၢင်းယၢပ်ႇၽိုတ်ႇ ၼႆႉမၼ်းဢမ်ႇမီးတၢင်းဢွင်ႇမႅင်ႇ၊ တေဢမ်ႇမီးတၢင်း ၶတ်းၸႂ်။ ပေႃးဢမ်ႇမီးတၢင်းၶတ်းၸႂ်၊ တၢင်းယၢပ်ႇၽိုတ်ႇၼႆႉမၼ်းတေ ဢမ်ႇထိုင်တီႈ ပဝ်ႉမၢႆ ဢၼ်ႁဝ်းယိူင်းဢၢၼ်းဝႆႉၼၼ်ႉ။ မိူၼ်ၼင်ႇ ပေႃးႁဝ်းတေ ၶိုၼ်ႈလွႆသုင်သုင်ၼႆ ပေႃးဝႃႈႁဝ်းတေႁႅၼ် ႁူဝ်သေၶိုၼ်ႈၼၼ်ႉမၼ်းတေ ၼၢၼ်း ၶိုၼ်ႈထိုင် ႁဝ်းၵေႃႈဢမ်ႇ လူဝ်ႇယၵ်ႉတူၺ်းၸိၵ်းလွႆသေၶိုၼ်ႈ ႁဝ်းၵေႃႈလူဝ်ႇၶတ်း ၸႂ်သေၶိုၼ်ႈၵႂႃႇတိၵ်းတိၵ်းၼႆ မၼ်းတေၸဵဝ်းၽႅဝ်လႆႈယူႇ" ဝႃႈၼႆယဝ်ႉ။
သိုဝ်ႇႁႅင်းၼုမ်ႇလႆႈတေႇတင်ႈမိူဝ်ႈဝၼ်းထီႉ 5 လိူၼ် August 2002 ၶွပ်ႈၶူပ်ႇ 9 ပီတဵမ်ၼႂ်းပီၼႆႉ၊ ယွၼ်ႉငဝ်းလၢႆးလၢႆလၢႆလွင်ႈ လႄႈလႆႈမႃးၸတ်းၼႂ်းဝၼ်းထီႉ 13 ၼႆႉယဝ်ႉ ။ ၸုမ်းသိုဝ်ႇႁႅင်းၼုမ်ႇၼႆႉမိူဝ်ႈလဵဝ် တူင်ႉၼိုင်ႁဵတ်းသၢင်ႈလူၺ်ႈၶူင်းၵၢၼ် သိုဝ်ႇၶၢဝ်ႇ၊ ၶူင်းၵၢၼ်ပၢႆးပၺႃႇ၊ ၶူင်းၵၢၼ်သွၼ်ၶွမ်ႊပိဝ်ႊတိူဝ်ႊ၊ ၶူင်းၵၢၼ်ပၢႆးယူႇလီ လႄႈ ၶူင်းၵၢၼ်ပူၵ်းပွင်မူႇဝၢၼ်ႈ ၸဵမ်ၸိူဝ်းၼႆႉယဝ်ႉ။
