- Details
- Published on Wednesday, 22 December 2010 11:18
ၸုမ်းႁွင်ႈၵၢၼ်သိုဝ်ႇၵူၼ်းမိူင်းထႆး (Thai PBS) ၸတ်းပၢင်ဢုပ်ႇဢူဝ်းၸွမ်းၽူႈသိုဝ်ႇၶၢဝ်ႇၼႂ်းမိူင်းထႆးပတ်းပိုၼ်ႉ ၵဵဝ်ႇလူၺ်ႈ လွင်ႈတူင်ႉၼိုင်ႁဵတ်း သၢင်ႈၵၢၼ်ငၢၼ်း TV Thai သေ ၸုမ်းတႆးၶဝ်ႈႁူမ်ႈၸွမ်း။
ႁွင်ႈၵၢၼ်ႁူင်းပွႆႇသဵင်လႄႈ ငဝ်းႁၢင်ႈတူင်ႉၵူၼ်းမိူင်းထႆး Thai PBS (Thai Public Broadcasting Service) TV Thai ၸတ်းပၢင်ဢုပ်ႇ ဢူဝ်းၶၢဝ်းတၢင်းသွင်ဝၼ်း တင်ႈတႄႇဝၼ်းထီႉ 18 - 19 ၼႂ်းလိူၼ် တီႊသႅမ်ႊပိူဝ်ႊ 2010 ၼႆႉသေၽိတ်ႈႁွင်ႉၽူႈဢဝ်ၶၢဝ်ႇၶဝ်ႈႁူမ်ႈ ဢုပ်ႇဢူဝ်း ပၼ်တၢင်းႁၼ်ထိုင်။
ၼႂ်းၼၼ်ႉၸုမ်းတႆးမိူၼ်ၼင်ႇၸုမ်းသိုဝ်ႇႁႅင်းၼုမ်ႇလႄႈ ၸုမ်းၵပ်းသၢၼ်လွင်ႈၼၢင်းယိင်းတႆး (SWAN)ၵေႃႈၶဝ်ႈ ႁူမ်ႈလဵပ်ႈ ႁဵၼ်းဢုပ်ႇဢူဝ်းၸွမ်း။
ဢွင်ႈတီႈဢုပ်ႇဢူဝ်းၵၼ်ၼၼ်ႉလႆႈၸတ်းတီႈ ၸၼ်ႉၸွမ်ထမ်မသၢတ်ႇ (Thamasat) မိူင်းၵွၵ်ႇ(ၵုင်းထဵပ်ႈ)ၸိုင်ႈ ထႆး။ ၵူၼ်းၸိူဝ်းၶဝ်ႈႁူမ်ႈလဵပ်ႈႁဵၼ်း လုၵ်ႉတၢင်းမိူင်းထႆးပွတ်းဢွၵ်ႇ၊ ပွတ်းၵၢင်၊ ပွတ်းၸၢၼ်း၊ ပွတ်းႁွင်ႇၸိူဝ်းၼႆႉ မႃး။
ႁူဝ်ၶေႃႈၸိူဝ်းလႆႈဢုပ်ႇဢူဝ်း ၼၼ်ႉ လွင်ႈပၼ်ႁႃၼႂ်းပိုၼ်ႉတီႈ ၼႂ်းမူႇဝၢၼ်ႈ၊ ၼႂ်းသူၼ်ႁႆႈၼႃးၼင်ႁိုဝ်ၽူႈသိုဝ်ႇၶၢဝ်ႇ တင်းလၢႆ ၸၢင်ႈႁႃတၢင်းၸွႆႈထႅမ်လႆႈ။ ဝၢႆးၼၼ်ႉႁႃတၢင်းၵႄႈၶႆ လွင်ႈပၼ်ႁႃၸွမ်းၵၼ်သေပၼ်တၢင်းႁၼ် ဝႃႈ TV Thai ၶၢဝ်ႇၽူၼ်းလႃးမိူင်း(ၶၢဝ်ႇၵူၼ်းမိူင်း) ဢၼ်ဢွၵ်ႇၸိူဝ်းၼၼ်ႉ ပွတ်းဢိတ်း ၼိုင်ႈ (3 ၼႃးထီးၵူၺ်း) လႄႈ ၽူႈၶဝ်ႈႁူမ်ႈတင်းသဵင်ႈတုၵ်းယွၼ်း ႁႂ်ႈၽိူမ်ႉၶၢဝ်းယၢမ်းႁိုင်မွၵ်ႈ 5 ၼႃးထီး ဝႃႈၼႆ။
ၵူၼ်းၼုမ်ႇတႆးၽူႈၶဝ်ႈလဵပ်ႈႁဵၼ်းၵေႃႉၼိုင်ႈလၢတ်ႈဝႃႈ “ ၶႃႈလႆႈလဵပ်ႈႁဵၼ်းမႃးၵေႃႈၸူမ်းတေႉတေႉ။ မိူဝ်ႈပႆႇလႆႈၵႂႃႇ တႄႉ ဢမ်ႇထၢင်ႇဝႃႈ တေလႆႈမႃးၵႂၢမ်းႁူႉ ၼမ်တၢၼ်ႇၼႆႉ။ ဝၢႆးလဵပ်ႈႁဵၼ်းယဝ်ႉ ၶႃႈလႆႈၵႂၢမ်းႁူႉမႃးၼမ်ၼႃႇလႆႈ ႁၼ် ၶိူင်ႈၸႂ်ႉတႃႇၶၢဝ်ႇ TV Thai ၶဝ်မီးသင်လၢႆလၢႆ၊ လၢႆးထၢႆႇ၊ လၢႆးၸႂ်ႉၶိူင်ႈ၊ လၢႆးထၢႆႇ သူတ်းဢဝ်ၶိုၼ်ႈ TV ဢွၵ်ႇ ၵမ်းလဵဝ်ၸိူဝ်းၼႆႉ” ဝႃႈၼႆ။
ၵူၼ်းၼုမ်ႇတႆးၽူႈၶဝ်ႈလဵပ်ႈႁဵၼ်းၼၼ်ႉ သိုပ်ႇလၢတ်ႈဝႃႈ ၽူႈၶဝ်ႈလဵပ်ႈႁဵၼ်း ဢုပ်ႇဢူဝ်းတင်းသဵင်ႈလႆႈလဵပ်ႈႁဵၼ်း ပႃး ႁွင်ႈတီႈ TV Thai ၶဝ်ႁဵတ်းၵၢၼ်၊ တီႈတတ်းတေႃႇဝီးတီးဢူဝ်း၊ ႁွင်ႈသူင်ႇၶၢဝ်ႇ၊ ႁွင်ႈပပ်ႉ၊ ႁွင်ႈၵဵပ်းၶေႃႈ မုၼ်း လႄႈ ႁွင်ႈထၢႆႇ TV ၸိူဝ်းၼႆႉဝႃႈၼႆယဝ်ႉ။
ဢၼ်ၸုမ်းႁွင်ႈၵၢၼ်သိုဝ်ႇၵူၼ်းမိူင်းထႆး Thai PBS ဢၼ်ၸတ်းပၢင်ဢုပ်ႇဢူဝ်းၸွမ်းၽူႈသိုဝ်ႇၶၢဝ်ႇၼႂ်းမိူင်းထႆး ပတ်းပိုၼ်ႉၼႆႉ ပွၵ်ႈၼႆႉ ပဵၼ်ပွၵ်ႈယႂ်ႇသုတ်း ဝႃႈၼႆယဝ်ႉ။
