joomla templates Youth Power Media

ပႃႇတီႇသိူဝ်ၽိူၵ်ႇဢၼ်ပၵ်းသဝ်းယူႇတီႈဝဵင်းမိူင်းပၼ်ႇ ၼႂ်းၸိုင်ႈတႆးပွတ်းၸၢၼ်းမီး တိုဝ်ႉတၢင်းလီ ယွၼ်ႉၵူၼ်း မိူင်း ဢွၼ်ၵၼ်ၵမ်ႉထႅမ်ပၼ်ႁႅင်းၼမ်။

ၼၢင်းၸၢမ်ၼူၼ်း (ၸိုဝ်ႈလဵၼ်ႈ) ဢၼ်လုၵ်ႉတီႈ မိူင်းပၼ်ႇ မႃးၽႅဝ်ၵဵင်းမႂ်ႇ မိူဝ်ႈဝၼ်းထီႉ 3/10/2010 ၼၼ်ႉ လၢတ်ႈဝႃႈ ၼႂ်းဝဵင်းမိူင်းပၼ်ႇၼႆႉ မီးပႃႇတီႇသိူဝ်ၽိူၵ်ႇ လႄႈ ပႃႇတီႇသၢင်ႇသီႈ ၵူၺ်းၼႆ။ မၼ်းၼၢင်း လၢတ်ႈဝႃႈ “ ၽူႈဢွၼ်ႁူဝ်ပႃႇတီႇသိူဝ်ၽိူၵ်ႇၼႂ်း မိူင်းပၼ်ႇ ပဵၼ်လုင်းမူဝ်းၵျီႇ။ မၼ်းၵေႃႈပဵၼ် ၵူၼ်း လူင်ၵဝ်ႇဢၼ်ႁဵတ်းၵၢၼ် ၵဵဝ်ႇလူၺ်ႈလွင်ႈတီႊမူဝ်ႊၶရေႊသီႊ ၵေႃႉၼိုင်ႈ ၼင်ႇၵဝ်ႇ။ ၸုမ်းပႃႇတီႇသၢင်ႇသီႈၶဝ်တႄႉပဵၼ် လုင်းၶမ်းၸိုၼ်ႈ ဢွၼ်ႁူဝ် ။ ၵမ်ႈၼမ်ဢၼ်ၶႃႈလႆႈႁၼ်တႄႉပႃႇတီႇသၢင်ႇသီႈၶဝ်တေဢမ်ႇပေႃးၵႆႉႁွင်ႉၵူၼ်းမိူင်းဢုပ်ႇၵုမ် ၼမ်။ ၵူၼ်းၶဝ်ႈၸုမ်း သၢင်ႇသီႈဢမ်ႇပေႃးမီးၼမ်သင်။

ၸုမ်းပႃႇတီႇသိူဝ်ၽိူၵ်ႇၶဝ်တႄႉၵႆႉၵႆႉသူၼ်းတုမ်ၵူၼ်းမိူင်း၊ လူင်းသူၼ်းတုမ် ၵူၼ်းမိူင်းၼင်ႇႁိုဝ်ပႃႇတီႇတေပေႉလိူၵ်ႈ တင်ႈယူႇ။ ၵူၼ်းမိူင်းၼႂ်းမိူင်းႁဝ်းၶႃႈတႄႉ ပဵၼ်ၸႂ်ပႃႇတီႇသိူဝ်ၽိူၵ်ႇၵမ်ႈၼမ် ” ဝႃႈၼႆ။မၼ်းၼၢင်းသိုပ်ႇလၢတ်ႈ ထႅင်ႈဝႃႈ “မိူဝ်ႈလဵဝ်ၼႂ်းမိူင်းႁဝ်းၶႃႈၼႆႉ ႁဵတ်းပၼ်ဝႂ်ၵပ်းတူဝ် ၼိုင်ႈၵေႃႉလႂ်လႆႈသဵင်ႈ 3ႇ000 ပျႃးၵူၺ်း။ယွၼ်ႉၶႂ်ႈ ႁႂ်ႈၵူၼ်းမိူင်းၶဝ်ႈလိူၵ်ႈတင်ႈလႄႈ ၶဝ်ၸင်ႇႁဵတ်းပၼ်ဝႂ်ၵပ်းတူဝ်ၸိူဝ်းပႆႇမီးၸိူဝ်း ၼၼ်ႉ။ ၸုမ်းၶဝ်လၢတ်ႈဝႃႈ“သင် ႁွင်ႉမႃးလႆႈၵူၼ်းမိူင်းႁဝ်း ၸိူဝ်းဢၼ်ၵႂႃႇ ႁဵတ်းၵၢၼ်ယူႇ ၼႂ်းမိူင်းထႆး ၸိူဝ်း ၼၼ်ႉတင်းမူတ်းၶႅၼ််းလီယဝ်ႉ။ ၵူၼ်းတႆးႁဝ်း ၼမ်ၵႃႈႁိုဝ်ၵေႃႈ ၸုမ်းတႆးႁဝ်းမီးတိုဝ်ႉတၢင်းတေဢွင်ႇပေႉၼမ် ၵႃႈၼၼ်ႉ ” ၼႆ။

ၸၢႆးယႃႇၸိင်ႇ (ၸိုဝ်ႈလဵၼ်ႈ) လၢတ်ႈဝႃႈ “ၸုမ်းပႃႇတီႇ သိူဝ်ၽိူၵ်ႇၼႆႉ ပိုၼ်ၽေပႃး VCD လွင်ႈ တူင်ႉၼိုင် ၶဝ် ဢၼ် လႆႈလူင်းသူၼ်းတုမ် ၵူႈမိူင်းမိူင်း ၼႂ်းၸိုင်ႈတႆး။ လိၵ်ႈၽိုဝ်ၶၢဝ်ႇၶဝ်ၵေႃႈၼိုင်ႈလိူၼ် ၶဝ်ပိုၼ်ၽေ သွင်ပွၵ်ႈ။ ၼႂ်းလိၵ်ႈၽိုၼ်ၶၢဝ်ႇၶဝ်ၼၼ်ႉ တေမီးလွင်ႈတူင်ႉၼိုင်ၶဝ်ၸိူဝ်းၼႆႉ ၼင်ႇၵဝ်ႇ”ဝႃႈၼႆ။ မိူဝ်ႈလဵဝ် ၼႂ်း မိူင်းပၼ်ႇၼႆႉ ၸုမ်းပႃႇတီႇၸိူဝ်းတေၶဝ်ႈလိူၵ်ႈတင်ႈၶဝ်လူင်းၽိုၵ်းၽွၼ်ႉပၼ်ၵူၼ်းမိူင်းတႃႇၶဝ်ႈလိူၵ်ႈ ပႃႇတီႈဢၼ်ၵူၼ်းမိူင်းလႆႈ ၸႂ်ယူႇ။

ၸၢႆးယႃႇၸိင်ႇသိုပ်ႇလၢတ်ႈထႅင်ႈဝႃႈ “ ၽူႈတေလိူၵ်ႈလႆႈၼၼ်ႉ ဢႃႇယု 18 ၶိုၼ်ႈၼိူဝ်၊ ဝၼ်းပၢင်လိူၵ်ႈတင်ႈ ၼၼ်ႉ ပဵၼ် 7/11/2010။ ပုင်းတေတွတ်ႈဝႂ်ၵၢင်ၸႂ်ၼၼ်ႉတေဝႆႉ 100 သေ ၵူၼ်းပႂ်ႉမၼ်းၵေႃႈ 100 ယဝ်ႉ။ၵူၼ်းၸိူဝ်း ယူႇၸွမ်းဝၢၼ်ႈၼွၵ်ႈၼႃးပၢင်ႇ ၸိူဝ်းၼၼ်ႉၵေႃႈပေႃးၸမ်ထိုင်ဝၼ်းလိူၵ်ႈတင်ႈ ႁႂ်ႈမႃးၼွၼ်းၼႂ်း ဝဵင်းတင်းမူတ်း။ မိူင်းႁဝ်းတႄႉဢွၵ်ႇ ၶၢဝ်ႇဝႆႉဝႃႈ ၼႃႈတေလိူၵ်ႈတင်ႈ 15 ဝၼ်းၼႆႉတေဢမ်ႇပၼ်မီးၵူၼ်း ၶဝ်ႈ ၵူၼ်းဢွၵ်ႈၼႂ်းမိူင်း။ သင်မီး ၵူၼ်းၶႂ်ႈမႃးႁဵတ်းဝႂ်ၵပ်းတူဝ်ၵေႃႈ လူဝ်ႇမႃးဝႆးဝႆးယဝ်ႉ။သင်မႃးႁဵတ်းဝႂ်ၵပ်း တူဝ် ၵေႃႈတေလႆၶဝ်ႈလိူၵ်ႈတင်ႈပႃး” ဝႃႈၼႆ။

သိုပ်ႇလၢတ်ႈထႅင်ႈဝႃႈ ၼႂ်းမိူင်းပၼ်ႇၼႆႉမီးလွင်ႈထၢင်ႇႁၢင်ႈမႃးၵမ်ႈၽွင်ႈသေတႃႉ တေႃႇထိုင်မိူဝ်ႈလဵဝ်မိူၼ် ၼင်ႇၵဵပ်း ၶွၼ်ႇၵႃႈၸၢၵ်ႈထႆၼႃး ၼိုင်ႈပီလႂ် 5ႇ000 ၵျၢပ်ႈ၊ ပႂ်ႉယၢမ်းၽၵ်းတူတၢင်းၶဝ်ႈ ဢွၵ်ႇမိူင်းၼိုင်ႈ လိူၼ် 1 ပွၵ်ႈတေႃႇ ႁိူၼ်းၸိူဝ်းၼႆႉတႄႉတိုၵ်ႉမီးယူႇ ဝႃႈၼႆယဝ်ႉ။