ၶၢဝ်ႇမိူင်းႁူမ်ႈတုမ်
KNU တင်းမၢၼ်ႈလႆႈၸႂ်ၵိုတ်းသိုၵ်း
- Details
- Published on Thursday, 12 January 2012 15:28
- Written by ၼဵတ်းသၢၼ်ႈ
ႁူမ်ႈတုမ်ၸိူဝ်ႉၸၢတ်ႈယၢင်းၽိူၵ်ႇ KNU တင်းၸုမ်းတူဝ်တႅၼ်းလူင်ပွင်ၸိုင်ႈၸေႈမိူင်းယၢင်း သွင်ၽၢႆႇ လႆႈၸႂ်ၵိုတ်းသိုၵ်းတေႃႇၵၼ်ယဝ်ႉၼႆ။
ၶၢဝ်ႇ DVB ဢွၵ်ႇၶၢဝ်ႇမိူဝ်ႈၼႆႉဝႃႈ ပၢင်ဢုပ်ႇဢူဝ်းပိူဝ်ႈတႃႇႁႃတၢင်းၵိုတ်းသိုၵ်း ၼႂ်းၵႄႈႁူမ်ႈတုမ် ၸိူဝ်ႉ ၸၢတ်ႈယၢင်းၽိူၵ်ႇ Karen National Union (KNU) တင်းလူင်ပွင်ၸိုင်ႈၸေႈမိူင်းယၢင်း ဢၼ်ၸတ်း တီႈႁူင်းသဝ်း (Hotel) တီႈၼိုင်ႈ ၼႂ်းဝဵင်းပႃႊဢၢၼ်ႊ ၸေႈမိူင်းယၢင်း မိူဝ်ႈၼႆႉ 12.1.2012 ယၢမ်း ၵၢင်ၼႂ်ၼၼ်ႉ လႆႈၶေႃႈလႆႈၸႂ်ၵိုတ်းသိုၵ်း 4 ၶေႃႈ ဝႃႈၼႆ။
ၶေႃႈလႆႈၸႂ် 4 ၶေႃႈၼၼ်ႉ 1 ၵိုတ်းသိုၵ်းတေႃႇၵၼ်၊ 2 ပိုတ်ႇလုမ်းၵပ်းသိုပ်ႇၵၼ်၊ 3 ဢမ်ႇပႃးၵွင်ႈ ၵၢင်ႇသေ ၵႂႃႇမႃးလႆႈလွတ်ႈလွတ်ႈလႅဝ်းလႅဝ်းၼႂ်းၸိုင်ႈမိူင်းပတ်းပိုၼ်ႉ၊ 4 တေသိုပ်ႇဢုပ်ႇဢူဝ်း တၢင်ႇၶၼ်ႉတွၼ်ႈ ၵႂႃႇထႅင်ႈ ၸိူဝ်းၼႆႉၼႆယဝ်ႉ။
ၵႅမ်ႁူဝ်ပဝ်ႈ KNU တေႊပိတ်ႊတႃႊၵပေႃႊ (The KNU’s vice-chairman, David Thakabaw) လၢတ်ႈဝႃႈ“ မိူဝ်ႈၼႆႉယၢမ်းဝၢႆးဝၼ်း တေၵႂႃႇတီႈ ငဝ်ႈငုၼ်းတိူင်းသိုၵ်း ဝၼ်းဢွၵ်ႇ ဢၼ်မီးၸမ် မျေႃႊလမျၢႆႊ ဝဵင်းလူင် ၸေႈမိူင်းမွၼ်း သေ ႁႃတၢင်းဢုပ်ႇဢူဝ်းလွင်ႈ ၵၢၼ်သိုၵ်းၵၼ်” ဝႃႈၼႆ ယဝ်ႉ။
ၸုမ်းႁူမ်ႈတုမ်ၸိူဝ်ႉၸၢတ်ႈယၢင်းၽိူၵ်ႇ KNU ပဵၼ်ၸုမ်းဢၼ်တေႃႇသူႈၸုမ်းသိုၵ်းမၢၼ်ႈႁိုင်ယၢဝ်း ၶၢဝ်း ႁိုင် 60 ပီပၢႆပိူဝ်ႈတႃႇလႆႈ သုၼ်ႇ လႆႈ သုၼ်ႇပဵၼ်ၽဵင်ႇပဵင်းလႄႈလွင်ႈၽွင်းငမ်းတူဝ်ၵဝ်ႇမႃး၊ ယွၼ်ႉပၢင်တိုၵ်းလႄႈ ႁဵတ်းႁႂ်ႈမီးၵူၼ်းမိူင်းပၢႆႈၽေးသိုၵ်းသိူဝ်ၼပ်ႉသႅၼ်ပၢႆ ပၢႆႈသေႃႉႁူမ်ႈပၢႆႈၽေး ယူႇ ၸွမ်းပၢင်သဝ်းၵူၼ်းပၢႆႈၽေး ၸွမ်းလႅၼ်လိၼ် ထႆး-မၢၼ်ႈ။
