ၶၢဝ်ႇမိူင်းႁူမ်ႈတုမ်

ၽွင်း​လူင်​ၾၢႆႇ​ၼွၵ်ႈ​မိူင်း မိူင်း​ၾ​ရင်ႊ​သဵတ်ႊ​လၢတ်ႈ- လူဝ်ႇ​ဢုပ်ႇ​ဢူဝ်း​ၵၢၼ်​မိူင်း

မိတ်ႊ​သ​တိူဝ်ႊ ဢႃႊ​လႅၼ်ႊ​ယၼ်ႊ ၸူႊ​ပီႊ (Alain Juppe) ၽွင်း​လူင်​ၾၢႆႇ​ၼွၵ်ႈ​မိူင်း မိူင်း​ၾ​ရင်ႊ​သဵတ်ႊ (French Foreign Minister) လၢတ်ႈ​ဝႃႈ လွင်ႈ​လူင်​ပွင် ၸိုင်ႈ​မိူင်း​ႁူမ်ႈ တုမ်​မၢၼ်ႈ ပွႆႇ​ပၼ်​ၽူႈ​တူၵ်း​ၶွၵ်ႈ ၵၢၼ်​မိူင်း​ၼၼ်ႉ​ထုၵ်ႇ မႅၼ်ႈ​ၸွမ်း​သဵၼ်ႈ တၢင်း​ယဝ်ႉ၊ ၵူၺ်း​ပိူဝ်ႈ တႃႇ​လႆႈ​လွင်ႈ​ငမ်း​ယဵၼ်​မၼ်ႈ​ၵိုမ်း ယိုၼ်း​ယၢဝ်း​ၼၼ်ႉ​တၵ်း​လူဝ်ႇ​လႆႈ​ဢုပ်ႇ ဢူဝ်း​ၵၢၼ်​မိူင်း ၸွမ်း​ၸုမ်း​ၸၢဝ်း​ၶိူဝ်း​ၵူႈ​ၾၢႆႇ ၼႆ။

ၵေႃ​ၶၢဝ်ႇ RFA ဢွၵ်ႇ​ၶၢဝ်ႇ​ဝႃႈ​ဢႃႊ​လႅၼ်ႊ​ယၼ်ႊ ၸူႊ​ပီႊ​လၢတ်ႈ​ဝႃႈ“ တေ​ႁဵတ်း​ႁိုဝ်​ၶိုၼ်း ႁူမ်ႈ​ၵၼ်​ၵႃႉ​ၶၢႆ​ႁဵတ်း​ပၢႆး​မၢၵ်ႈ​မီး ၼႆ​ၼၼ်ႉ တေ​ၶိုၼ်း​ဝူၼ်ႉ​ၵွၼ်ႇ။ ထႅင်ႈ​လွင်ႈ​ၼိုင်ႈ​လွင်ႈ​ႁႅတ်ႉ​ပၢႆး မၢၵ်ႈ​မီး မိူင်း​မၢၼ်ႈ​ဝႆႉ ၼၼ်ႉ​ၵေႃႈ​တေ​ဝူၼ်ႉ​ၶႆႈၸႂ် တူၺ်း​သေ လူတ်း​လူင်း​ၵႂႃႇ​ၵမ်း​သင်ႉ​သင်ႉ” ဝႃႈ​ၼႆ။

သိုပ်ႇ​လၢတ်ႈ​ဝႃႈ ဢၼ်​တိုၵ်ႉ​ပဵၼ်​လွင်ႈ​မႆႈ​ဢူၵ်း မႆႈၸႂ်​ၸွမ်း​လူင်​လၢင်​ယူႇ​ၼႆႉ ပဵၼ်​လွင်ႈ​ပၢင်​တိုၵ်း ဢၼ်​တိုၵ်ႉ​ပိုတ်ႇ​ၼႃႈ သိုၵ်း​တေႃႇ​ၸၢဝ်း​ၶိူဝ်း၊ တေ​လႆႈ​ၵိုတ်း​ပႅတ်ႈ​ပၢင်​တိုၵ်း​ဢၼ်​ပိုတ်ႇ​တေႃႇ ၸၢဝ်း​ၶိူဝ်း​ၼႆ​ယဝ်ႉ။

ၼွၵ်ႈ​သေ​ၼၼ်ႉ ဢႃႊ​လႅၼ်ႊ​ယၼ်ႊ ၸူႊ​ပီႊ လႆႈ​ႁူပ်ႉ​ထူပ်း​ၽူႈ​တူၵ်း​ၶွၵ်ႈ​ၵၢၼ်​မိူင်း ဢၼ်​ၸင်ႇ ႁႃ​ထုၵ်ႇ​ပွႆႇ ဢွၵ်ႇ ၸဝ်ႈ ၶုၼ်​ထုၼ်း​ဢူး ႁူဝ်​ပဝ်ႈ​ပႃႇ​တီႇ ငဝ်ႈ​ငုၼ်း​တီႊ​မူဝ်ႊ ၶ​ရေႊ​သီႊ​ၸိူဝ်ႉ​ၶိူဝ်း​တႆး၊ ၽူႈ​ၼမ်း​လုၵ်ႈ ႁဵၼ်း​သႅၼ်း​ႁုၼ်ႈ 88ၸိူဝ်း ပဵၼ် ၵူဝ်ႇ⁠ၵူဝ်ႇ​ၵျီး၊ ၵူဝ်ႇ​မျႃႉ​ဢေး ၶဝ်​တီႈ လုမ်း​ၽွင်း တၢင်​ၾ​ရင်ႊ​သဵတ်ႊ ဢၼ်​မီးၼႂ်း​တႃႈ​ၵုင်ႈ မိူဝ်ႈ​ၶၢဝ်း​ယၢမ်း 8:00 ၵၢင်​ၶမ်ႈ​ဝၼ်း​ထိ 14.12012 ၼႆ​ယဝ်ႉ။