ၶၢဝ်ႇမိူင်းႁူမ်ႈတုမ်
Mc Cain လၢတ်ႈ- ဢမ်ႇတၢပ်ႈႁိပ်ႈၼႅတ်ႈ ယူၵ်ႉပႅတ်ႈၵၢၼ်ႁႅတ်ႉပၢႆးမၢၵ်ႈမီး
- Details
- Published on Tuesday, 24 January 2012 10:06
- Written by ၼဵတ်းသၢၼ်ႈ
ၸွၼ်ႊမႅၵ်ႊၶဵၼ်ႊ ၽွင်းတႅၼ်း မိူင်းဢမေႊရိၵၢၼ်ႊ (US Senator John McCain) လၢတ်ႈဝႃႈ လူင်ပွင်ၸိုင်ႈမိူင်းဢမေႊရိၵၢၼ်ႊ ဢူဝ်ႊပႃႊမႃႊ ဢမ်ႇထုၵ်ႇလီႁိပ်ႈၼႅတ်ႈ ယူၵ်ႉပႅတ်ႈလွင်ႈႁႅတ်ႉ ပၢႆးမၢၵ်ႈမီးၼိူဝ် မိူင်းမၢၼ်ႈၼႆ။
ၸုမ်းၶၢဝ်ႇ irrawaddy ဢွၵ်ႇၶၢဝ်ႇဝႃႈ ၸွၼ်ႊမႅၵ်ႊၶဵၼ်ႊ ၽွင်းတႅၼ်း မိူင်းဢမေႊရိၵၢၼ်ႊ (US Senator John McCain) ဢၼ်မိူဝ်းလေႇယဵမ်ႈမိူင်းမၢၼ်ႈလႆႈႁူမ်ႈၵၼ်တင်းၼၢင်းဢွင်ႇသၢၼ်း သုၵျီႇသေ ႁဵတ်း ပၢင်သပ်းလႅင်း(ၸႅင်ႈၶၢဝ်ႇ) မိူဝ်ႈဝၼ်းထိ 22.1.2012 တီႈတႃႈၵုင်ႈ ဝႃႈလူင်ပွင် ၸိုင်ႈမိူင်း ဢမေႊရိ ၵၢၼ်ႊ ဢၼ်ဢူဝ်ႊပႃႊမႃႊ ဢွၼ်ႁူဝ်ဢမ်ႇထုၵ်ႇ လီႁိပ်ႈၼႅတ်ႈ ယူၵ်ႉပႅတ်ႈ လွင်ႈႁႅတ်ႉ ပၢႆးမၢၵ်ႈမီးၼိူဝ် မိူင်းႁူမ်ႈတုမ်မၢၼ်ႈ တေႃႇထိုင်ပေႃးႁူႉ ၽွၼ်းၵၢၼ်လိူၵ်ႈတင်ႈသွမ်ႈ(Results) ၼႂ်းလိူၼ် April ဢၼ်တေၸတ်းၶိုၼ်ႈၼႆႉဝႃႈၼႆ။
ၸွၼ်ႊမႅၵ်ႊၶဵၼ်ႊ လၢတ်ႈဝႃႈ“ ပေႃးဢဝ်တၢင်းႁၼ်ထိုင်သူၼ်ႇတူဝ်ၵဝ်ၶႃႈဝႃႈတႄႉ ႁဝ်းပႆႇၵိုင်ႇလီ ယူၵ်ႉပႅတ်ႈလွင်ႈႁႅတ်ႉပၢႆးမၢၵ်ႈမီးၼိူဝ်မိူင်းႁူမ်ႈတုမ်မၢၼ်ႈသင်သေၸိူဝ်ႉသေပိူင်တေႃႇထိုင်လိူၼ် April။ ၼွၵ်ႈသေၼႆႉထႅင်ႈပႆႇၵိုင်ႇလီယူၵ်ႉပႅတ်ႈ သင်ဝႃႈပႆႇမီးလွင်ႈလႅၵ်ႈလၢႆႈ ဢၼ်ၶိုၼ်ႈယႂ်ႇ ပဵင်းပေႃး ႁၢၼ်ႉၸႂ်ၶိုၼ်ႈမႃး” ဝႃႈၼႆယဝ်ႉ။
ၸွၼ်ႊမႅၵ်ႊၶဵၼ်ႊ လႆႈဢွၵ်ႇၶၢဝ်းတၢင်းမိူဝ်းလေႇယဵမ်ႈမိူင်းႁူမ်ႈတုမ်မၢၼ်ႈပိူဝ်ႈတႃႇမိူဝ်းပဵၼ်သဵင် ၵမ်ႉ ထႅမ်ႁႂ်ႈ ပၢင်လိူၵ်ႈတင်ႈ မီးလွင်ႈလွတ်ႈလႅဝ်း လႄႈၽဵင်ႇပဵင်း( free and fair) သေလႆႈ ႁူပ်ႉထူပ်း ၸွမ်ၸိုင်ႈတဵင်းသဵင်ႇ လႄႈၼၢင်းဢွင်ႇသၢၼ်းသုၵျီႇ ၸိူဝ်းၼႆႉမႃး။
