ၶၢဝ်ႇမိူင်းႁူမ်ႈတုမ်

ပၢင်ၵုမ်ၸိူဝ်ႉၸၢတ်ႈမွၼ်း တုၵ်းယွၼ်းၵိုတ်း သိုၵ်းၸိုင်ႈမိူင်းပတ်းပိုၼ်ႉ

ငဝ်ႈငုၼ်းၸိူဝ်ႉၸၢတ်ႈမွၼ်း တုၵ်းယွၼ်းဝႃႈ သင်လူင်ပွင်ၸိုင်ႈ ဢၼ်ဢူးတဵင်းသဵင်ႇဢွၼ် ႁူဝ်ၼႆႉ မီးၵၢင်ၸႂ်ၶႂ်ႈလႆႈ လွင်ႈငမ်းယဵၼ်ၸႅတ်ႈၸၢင်ႇတေႉၸိုင် ႁႂ်ႈၵိုတ်းသိုၵ်းတင်းၸိုင်ႈမိူင်းပတ်း ပိုၼ်ႉ သေဢုပ်ႇဢူဝ်းၵႄႈၶႆၵၢၼ်မိူင်း ၽႂ်းၽႂ်း ၼႆ။

ၸုမ်းၶၢဝ်ႇ DVB ဢွၵ်ႇဝႃႈ ပၢင်ၵုမ်ၸိူဝ်ႉၸၢတ်ႈမွၼ်း (Mon National Conference) လႆႈၸတ်း ႁဵတ်းၼႂ်းၼႃႈ လိၼ်ၵုမ်းၵမ် ပႃႇတီႇမိူင်းမွၼ်းမႂ်ႇ (New Mon State Party) ၶၢဝ်းတၢင်းသၢမ်ဝၼ်း တင်ႈတႄႇဝၼ်းထိ 18-20.01.2012 ၼႂ်းလိူၼ်ၼႆႉသေ လႆႈဢုပ်ႇဢူဝ်း ထတ်းသၢင် လႅၵ်ႈလၢႆႈငဝ်းလၢႆး ၵၢၼ်မိူင်းမိူင်းႁူမ်ႈတုမ်မိူင်း မၢၼ်ႈ ယၢမ်းလဵဝ်။

ၼၢႆႊလေႊရေႃႊ ၽူႈၼမ်းၼႂ်းၵူႈလွင်ႈလွင်ႈ ငဝ်ႈငုၼ်းၸုမ်းၸိူဝ်ႉၸၢတ်ႈမွၼ်းလၢတ်ႈဝႃႈ“ မိူဝ်ႈလဵဝ် ၶဝ်(ၸုမ်းသိုၵ်း မၢၼ်ႈ) ဢုပ်ႇဢူဝ်းလွင်ႈ ငမ်း ယဵၼ်။ ၵူၺ်းၵႃႈထႅင်ႈၾၢႆႇၼိုင်ႈသမ်ႉတိုၵ်ႉတိုၵ်းၵၼ် ယူႇ။ၼႂ်းမိူင်းယၢင်းလႅင်ၵေႃႈ တိုၵ်း၊ ၼႂ်းမိူင်းၶၢင်ၵေႃႈတိုၵ်း။ ၽၢင်ႁၢင်ႈၸိူင်ႉၼႆ တေႁဵတ်းႁိုဝ် လၢတ်ႈလႆႈဝႃႈ လွင်ႈငမ်းယဵၼ်။ လွင်ႈငမ်းယဵၼ်၊ ၵိုတ်းသိုၵ်းၼႆၼၼ်ႉတၵ်းလႆႈၵိုတ်းသိုၵ်း တင်းၸိုင်ႈမိူင်းပတ်းပိုၼ်ႉ။ ပေႃးယဝ်ႉဢုပ်ႇဢူဝ်းၵၼ်ၼႆၸိူဝ်းၼႆႉၵူၺ်း ယဝ်ႉဢၼ်ၶႂ်ႈလႆႈ” ဝႃႈၼႆ။

ၼႂ်းၶၢဝ်းတၢင်းပၢင်ၵုမ်သၢမ်ဝၼ်းၼၼ်ႉ မီးၸၢဝ်းမွၼ်းၼႂ်းမိူင်း/ၼွၵ်ႈမိူင်းႁူမ်ႈၵၼ်ဢွၵ်ႇၶေႃႈ ပိုၼ်ၽၢဝ်ႇတိုၵ်း သူၼ်း တုၵ်းယွၼ်းႁႂ်ႈပႃႇတီႇ ၵၢၼ်မိူင်းမွၼ်းသွင်ဢၼ်(ပႃႇတီႇတီႇမူဝ်ႇၶရေႇသီႇ ၸေႈမိူင်းမွၼ်း ပတ်းပိုၼ်ႉ၊ ပႃႇတီႇ တီႇမူဝ်ႇၶရေႇသီႇ ၸိူဝ်ႉၸၢတ်ႈမွၼ်း)  ႁူမ်ႈပဵၼ်ပႃႇ တီႇ လဵဝ် ၵၼ်ၸိူဝ်းၼႆႉ ၼႆယဝ်ႉ။

သိုပ်ႇလၢတ်ႈဝႃႈ“ ၽူႈတႅၼ်းၸိူဝ်းမႃးၶဝ်ႈႁူမ်ႈၼႂ်းပၢင်ၵုမ်ၸိူဝ်ႉၸၢတ်ႈမွၼ်းၼႆႉ ပိူင်လူင်မၼ်းဢၼ်ၶဝ်ၶႂ်ႈပဵၼ်ၼႂ်း ၸေႈမိူင်းမွၼ်းၼႆႉပေႃးထိုင် ပၢင်လိူၵ်ႈတင်ႈ မိူဝ်းၼႃႈမႃးၶႂ်ႈႁႂ်ႈပႃႇတီႇမွၼ်းသွင် ဢၼ် ႁူမ်ႈၵၼ်ပဵၼ်ဢၼ်လဵဝ်။ သင်ဝႃႈပဵၼ်သွင်ပႃႇတီႇၸိုင် ဢဵၼ်ႁႅင်းတၵ်းယူပ်ႈ ယွမ်း လူင်းၵႂႃႇ။ ၵွပ်ႈၼၼ် လႄႈ ၼင်ႇႁိုဝ်ပႃႇမွၼ်းသွင်ဢၼ် တေပဵၼ်မႃးပႃႇတီႇ ဢၼ်လဵဝ်ၼၼ်ႉ ႁဝ်းတေလႆႈ ပၼ်ၶေႃႈၺၢၼ်ႇ ပၢႆးဝူၼ်ႉၶဝ်၊ တေလႆႈတိုၵ်းသူၼ်းၶဝ်ၸဵမ် ၸိူဝ်းၼႆႉ” ၼႆယဝ်ႉ။

ၼွၵ်ႈသေၼၼ်ႉ ၼႂ်းပၢင်ၵုမ်ၸိူဝ်ႉၸၢတ်ႈမွၼ်းၼႆႉလႆႈၸႂ်ၵၼ်ဝႃႈ တေဢဝ်ယုၵ်းယၢင်ႇပိူင်ငဝ်ႈ ပိုင်းမိူင်း (Mon State Drafting Constitution) ၸေႈမိူင်းမွၼ်း မႃးသပ်းလႅင်းပၼ်တၢင်း ႁူႉၵူၼ်းမိူင်း လႄႈတေယုၵ်ႉၸၼ်ႉငဝ်ႈငုၼ်း ၸိူဝ်ႉၸၢတ်ႈမွၼ်း မိူၼ်ၼႂ်းသၽႃး ၵူၼ်းမိူင်း ၸဵမ်ၸိူဝ်းၼႆႉၵႂႃႇ ၼႆယဝ်ႉ။

ပၢင်ၵုမ်ပွၵ်ႈၵမ်းၼႆႉ ၼွၵ်ႈသေဢုပ်ႇဢူဝ်းၵၼ်လွင်ႈၸိူဝ်ႉၸၢတ်ႈ ၵၢၼ်မိူင်းမွၼ်း၊ ပၢႆးသိုၵ်း၊ ပၢႆးပိင်ႇၺႃႇပႃႈတႂ်ႈလွင်ႈ ဢွၼ်ႁူဝ်ၸုမ်းၸိူဝ်ႉ ၸၢတ်ႈ မွၼ်းယဝ်ႉ ယင်းၶိုၼ်းထတ်းသၢင်ယုၵ်းယၢင်ႇ ပိူင်ငဝ်ႈပိုင်း မိူင်းမွၼ်းၸိူဝ်း ၼၼ်ႉ ပႃးၼႆယဝ်ႉ။