ၶၢဝ်ႇမိူင်းႁူမ်ႈတုမ်

မွၼ်းတင်း ၸုမ်းတူဝ်တႅၼ်းလူင်ပွင်ၸိုင်ႈမၢၼ်ႈ တူၵ်းလူင်းလႆႈၸႂ် 5 ၶေႃႈ

ၸုမ်းၶိုင်ပွင်လွင်ႈငမ်းယဵၼ်လူင်ပွင်ၸိုင်ႈမၢၼ်ႈ ဢၼ်ဢူးဢွင်ႇမိၼ်း ၽွင်းလူင်ၽၢႆႇတေႃႉသူင်ႇ သဵၼ်ႈ တၢင်းလူတ်ႉလဵၼ်း(ၾႆး) ဢွၼ်ႁူဝ်တင်းၸုမ်းပႃႇတီႇမိူင်းမွၼ်းမႂ်ႇ New Mon State Party (NMSP) လႆႈႁူပ်ႉထူပ်းဢုပ်ႇဢူဝ်းၵၼ်ၸၼ်ႉၸေႈမိူင်း ၼႂ်းဝဵင်းမေႃႇလမျၢႆႇ ၸေႈမိူင်း မွၼ်း သေတူၵ်းလူင်းလႆႈၸႂ်ၶၼ်ႉပိုၼ်ႉထၢၼ် 5 ၶေႃႈၼႆ။

ၼၢႆႊသူဝ်ႊမျိၼ်ႉ တူဝ်တႅၼ်းၽၢႆႇ ၸုမ်းပႃႇတီႇမိူင်းမွၼ်းမႂ်ႇ New Mon State Party (NMSP) လၢတ်ႈ တင်းသိုဝ်ႇၶၢဝ်ႇ ဢေႊရႃႊဝတီႊ ဝႃႈ ၶေႃႈတူၵ်းလူင်းလႆႈၸႂ်ၸိူဝ်းၼၼ်ႉ ၵိုတ်းသိုၵ်း တေႃႇၵၼ်၊ ၶွတ်ႇၽွတ်ႈၸုမ်းတူဝ်တႅၼ်းပိူဝ်ႈတႃႇဢုပ်ႇဢူဝ်း လွင်ႈငမ်းယဵၼ်ၸွမ်းၸၼ်ႉၸိုင်ႈမိူင်း ႁူမ်ႈတုမ်၊ ပိုတ်ႇလုမ်းၵပ်းသိုပ်ႇၵပ်းသၢၼ်ၵၼ်၊ တေဢမ်ႇလႆႈပႃးၵွင်ႈၵၢင်ႇဢွၵ်ႇၼွၵ်ႈပိုၼ်ႉ တီႈ ဢၼ်တတ်းမၵ်းဝႆႉ၊ တေလႆႈယူႇၼႂ်းပိုၼ်ႉတီႈဢၼ်သွင်ၽၢႆႇတူၵ်းလူင်းလႆႈၸႂ်ၵၼ်ဝႆႉၸိူဝ်းၼႆႉ ယဝ်ႉ ဝႃႈၼႆ။

ၵူၺ်းၵႃႈၶေႃႈလႆႈၸႂ် ၶၼ်ႉပိုၼ်ႉထၢၼ်ၸိူဝ်းၼႆႉ ၽၢႆႇ ၸုမ်းပႃႇတီႇမိူင်းမွၼ်းမႂ်ႇ New Mon State
Party (NMSP) ပႆႇလူင်းလၢႆးမိုဝ်း၊ တေၶိုၼ်းဢဝ်တၢင်ႇၼႄ ၵေႃႊမတီႊငဝ်ႈငုၼ်းသေ ၸင်ႇၶိုၼ်း ပွင်ႇပၼ်တၢင်းၾၢႆႇမၢၼ်ႈ ၼႂ်းပၢတ်ႈထိသၢမ် လိူၼ်ၾေႊၾေႃႊဝရီႊ ၼႆႉၼႆယဝ်ႉ။

ပၢင်ဢုပ်ႇဢူဝ်းပွၵ်ႈၼႆႉၸတ်းၶိုၼ်ႈတီႈႁူင်းသဝ်း (Hotel) ၵၼ်ႊၼႃႊ ဝၼ်းထိ 1.2.2012 ၼႂ်းၸေႈမိူင်းမွၼ်း။ ၽၢႆႇမွၼ်းမီး ၵႅမ်ႁူဝ်ပဝ်ႈ ၼၢႆႊရေႃႊသ လႄႈၽူႈၼမ်းပႃႇတီႇ 7 ၵေႃႉ၊ ႁူဝ်ၼႃႈၵူၼ်းမိူင်းမွၼ်း 4 ၵေႃႉ၊ တင်းသင်ႇၶႃႇ မွၼ်း 3 တူၼ် ၸိူဝ်းၼႆႉၶဝ်ႈႁူမ်ႈဢုပ်ႇဢူဝ်းၸွမ်း ၼႆယဝ်ႉ။

ၼွၵ်ႈသေၼႆႉ ၵွပ်ႈၽူႈၼမ်းပႃႇတီႇမွၼ်းၶဝ်တုၵ်းယွၼ်း ဢူးဢွင်ႇမိၼ်းလႄႈ လူင်ပွင်ၸိုင်ႈမၢၼ်ႈ
တေပၼ်သွၼ်လိၵ်ႈမွၼ်း ၼႂ်းၸေႈမိူင်းမွၼ်း၊ လိူဝ်ၼၼ်ႉတေပွႆႇပၼ်ၽူႈတူၵ်းၶွၵ်ႈၵၢၼ်မိူင်း မွၼ်း 2 သွင်ၵေႃႉ မိၼ်းၼေႇဝိၼ်း(ၼၢႆႊယႅၵ်ႊၶ) တင်းမိၼ်းမဵဝ်းတူၺ်း ဢၼ်ၺႃးတၢမ်ႇၶွၵ်ႈ တေႃႇၸူဝ်ႈ ၼၼ်ႉပႃးၼႆယဝ်ႉ။

ဢူးဢူင်းမျိၼ်ႉ ၸွမ်ၽွင်းလူင်ၸေႈမိူင်းမွၼ်းလၢတ်ႈ ၽွင်းၵိၼ်ၶဝ်ႈၶမ်ႈၸွမ်းၵၼ်ဝႃႈ လူင်ပွင် ၸိုင်ႈတေ ၸွႆႈၶပ်းၶိုင်ပၼ် ပိူဝ်ႈတႃႇလႆႈႁဵၼ်းသွၼ်လိၵ်ႈၽႃႇသႃႇမွၼ်း ၼႂ်းႁူင်းႁဵၼ်းၸေႈမိူင်း မွၼ်း ဝႃႈၼႆ။

ၽၢႆႇမွၼ်းလႆႈတုၵ်းယွၼ်းတၢင်းလူင်ပွင်ၸိုင်ႈမၢၼ်ႈဝႃႈ ႁႂ်ႈၵိုတ်းသိုၵ်းတင်းၸိုင်ႈမိူင်းပတ်းပိုၼ်ႉ၊
ႁႂ်ႈၸတ်း ပၢင်ဢုပ်ႇဢူဝ်းၵၢၼ်မိူင်းၸွမ်း ပႃႇတီႇမိူင်းမွၼ်းမႂ်ႇ New Mon State Party (NMSP)
ၼႂ်းၶၢဝ်းတၢင်း 45 ဝၼ်းသေ ၼႂ်းပၢင်ဢုပ်ႇဢူဝ်းၼၼ်ႉႁႂ်ႈပၼ်ၽူႈသူၼ်ၸႂ်လဵပ်ႈႁဵၼ်းၶဝ်ၶဝ်ႈ ႁူမ်ႈၸွမ်း ၸိူဝ်းၼႆႉ ၼႆယဝ်ႉ။

ၼွၵ်ႈသေၼၼ်ႉ ၽၢႆႇမွၼ်းလၢတ်ႈဝႃႈ သင်ဝႃႈပၢင်ဢုပ်ႇဢူဝ်းၵၢၼ်မိူင်းၸွမ်းလူင်ပွင်ၸိုင်ႈမၢၼ်ႈမီး လွင်ႈ ၶိုပ်ႈၼႃႈၶိုၼ်ႈမႃးၸိုင် တေယွၼ်းႁႂ်ႈ NLD တင်းပႃႇတီႇၵၢၼ်မိူင်းၵူႈၸုမ်း၊ ၸုမ်းၸၢဝ်းၶိူဝ်း ၵူႈမူႇ ၸိူဝ်းၼႆႉ ၶဝ်ႈႁူမ်ႈၵၼ်ၵႄႈၶႆပၼ်ႁႃ ဢၼ်ယိုတ်ႈယၢဝ်းမႃးႁိုင် ဝႃႈၼႆ။

ၸုမ်းပႃႇတီႇမိူင်းမွၼ်းမႂ်ႇ New Mon State Party (NMSP) ဢမ်ႇႁပ်ႉလႆႈပိူင်ငဝ်ႈပိုင်းမိူင်း သိုၵ်းမၢၼ်ႈ 2008 လႄႈ သင်ဝႃႈဢမ်ႇၶိုၼ်းမႄးၵႄႈၶႆၸိုင်တိုၼ်းတေဢမ်ႇၶဝ်ႈႁူမ်ႈၼႂ်း သၽႃး ဝႃႈၼႆယဝ်ႉ။