ၶၢဝ်ႇမိူင်းႁူမ်ႈတုမ်

ငၢဝ်းလၢႆးပဵၼ်ၼီႈ လႄႈ လွင်ႈတေ ၶၢႆၸုမ်းၶွင် Liverpool

ၽွင်းမိူဝ်ႈလဵဝ် ဢမ်ႇဝႃႈၸုမ်းဢၼ်မီးၸိုဝ်ႈသဵင်ယႂ်ႇလိုဝ်းလင်တၼ်ႇႁိုဝ်ၵေႃႈ ဢမ်ႇၸႂ်ႈတေလွတ်ႈပူၼ်ႉလွင်ႈပဵၼ်ၼီႈ ၼၼ်ႉယူႇ ပိူင်တႅၵ်ႈမၼ်း မိူၼ်ၼင်ႇၸုမ်း Liverpool FC ၼၼ်ႉၵေႃႈ ပဵၼ်ၸုမ်းယႂ်ႇၸုမ်းၼိုင်ႈ ဢၼ်မီးၼီႈယႂ်ႇ လူင်ယၢမ်းလဵဝ်ၼၼ်ႉယဝ်ႉ။

ဝၢႆးသေ ထွမ်း ႁိၵ်ႉ လႄႈ ၸွတ်ႉ ယိၼ်ႇလ်လဵၵ်ႇ ၶဝ်ႈမႃးသိုဝ်ႉဢဝ်ၸုမ်း Liverpool FC ၼႂ်းပီ 2007 သေၵႂႃႇထုၵ်ႇ ၼီႈတီႈ Royal Bank of Scotland (RBS) တၢင်းမူတ်း 237 လၢၼ်ႉပွၼ်ႇၼႆလႄႈ ဝၼ်းဢၼ်မၵ်းမၼ်ႈဝႆႉ ပုၼ်ႈတႃႇတေသၢႆႈၼီႈၼၼ်ႉၵေႃႈ ပဵၼ်ဝၼ်းထိ 15 လိူၼ် 10 ဢၼ်တေထိုင်ၼႆႉ ယဝ်ႉၼႆယူႇ။

သင်ဝႃႈ Liverpool ဢမ်ႇၸၢင်ႈသၢႆႈၼီႈလႆႈတၼ်းၼႆၸိုင် ၸင်ႈတေထုၵ်ႇထိင်းသိမ်းၸုမ်းသေ ၺႃးႁၵ်းမၢၵ်ႈ 9 မၢၵ်ႈ ယွၼ်ႉပိူင်ဢၼ်တၢင်း ႁွင်ႈၵၢၼ်လူင်မၢၵ်ႇၼင်တမ်းဝၢင်းဝႆႉၼၼ်ႉယဝ်ႉ လႄႈသင်ဝႃႈပဵၼ်ၸိူင်ႉၼၼ်ၼႆ ၸိုင် တေႁဵတ်းႁႂ်ႈ Liverpool ၼၼ်ႉဢမ်ႇမီးတိုဝ်ႉတၢင်းတေလႆႈသျႅမ်ႇ ၼႆယဝ်ႉ။

ၵွပ်ႈၼၼ်လႄႈ ယၢမ်းလဵဝ်တၢင်းဢွၵ်ႇဢၼ်ပဵၼ်ၵႂႃႇလႆႈတႃႇၸုမ်း Liverpool ၼၼ်ႉၵေႃႈ ပၼ်ၵၢၼ်ၶၢႆၸုမ်းပၼ် ၸဝ်ႈၶွင်ငိုၼ်းတိုၼ်းမႂ်ႇ။ လွင်ႈၼႆႉ ၽူႈၸတ်းၵၢၼ်ၸုမ်းၸူဝ်ႈၶၢဝ်းၶွင် Liverpool လၢႆၵေႃႉ မိူၼ်ၼင်ႇ မႃႇတိၼ်ႇ ပရေႃႇတၼ်ႇ၊ ၶရိတ်ႇသ်တဵၼ်ႇ ၽိူဝ်ႇသလူဝ်ႇ လႄႈ ဢဵၼ်ႇဢၢႆႇ ႁၼ်လီၸွမ်း ၵူၺ်းၸဝ်ႈၶွင်ၸုမ်း Liverpoolၵေႃႉ ယၢမ်းလဵဝ် သၢၼ်ၶတ်းၵၢၼ်ၶၢႆၸုမ်း ယွၼ်ႉဝႃႈတေၶၢတ်ႇတိုၼ်းငိုၼ်းဢၼ်လႆႈမႃးလူင်း
ၼႆယူႇ။

ၵပ်းၵၢႆႇလူၺ်ႈလွင်ႈ Liverpool ၸွင်ႇတေလႆႈၶၢႆၸုမ်းၼႆၼၼ်ႉ ၸဝ်ႈၼီႈၵဝ်ႇဢၼ်ပဵၼ် RBS လႄႈ ၸဝ်ႈၶွင်ၸုမ်း Liverpool ၵေႃႉယၢမ်းလဵဝ် လႆႈပိုင်ႈဢိင်လုမ်းတြႃးတႄႇတႅပ်းတတ်းမိူဝ်ႈဝၼ်းထိ 12/10/10လႄႈထိုင်မႃးမိူဝ်ႈဝၼ်း ထိ 13/10/10 ၼၼ်ႉ လုမ်းတြႃးတႅပ်းတတ်းႁႂ်ႈ RBS ပဵၼ်ၽၢႆႇပေႉလႄႈ ႁဵတ်းႁႂ်ႈၽူႈတေမႃးလူင်းတိုၼ်းမႂ်ႇမိူၼ် ၼင်ႇ ၼိဝ်ႊဢိင်းလႅၼ်း သပွတ်ႇဝဵၼ်ႊၶျႍိဝ်ႊ New England Sports Ventures (NESV) ၸၢင်ႈမႃးသိုဝ်ႉၸုမ်း Liverpool လူၺ်ႈၵႃႈၶၢၼ် 300 လၢၼ်ႉပွၼ်ႊ (မွၵ်ႈ 11400 လၢၼ်ႉဝၢတ်ႇ)ၼႆယူႇ။

ပွၵ်ႈၼႆႉ လႆႈဝႃႈၸုမ်း Liverpool ပွၼ်ႉလွတ်ႈလူမ်းလႅင်ႉလူင် ၵေႃႈဝႃႈလႆႈ ၵွပ်ႈဝႃႈတၢင်းၸုမ်းမီးငိုၼ်းတႃႇတေသၢႆႈ ၼီႈဢၼ်မီးယူႇမွၵ်ႈ 237 လၢၼ်ႉပွၼ်ႊ ၵွၼ်ႇဝၼ်းထိ 15/10/10 ၼႆႉ ၼႆယဝ်ႉ။