ၶၢဝ်ႇမိူင်းတႆး

CNPC ထူမ်ၼမ်ႉမၢဝ်း တႃႇၽင် တေႃႈၵႅတ်ႉ

ၶွမ်ႇပၼ်ႇၼီႇ CNPC ထူမ်ၼမ်ႉမၢဝ်းတႃႇႁဵတ်းသဵၼ်ႈတၢင်းသူင်ႇတေႃႈၵႅတ်ႉသူင်ႇၶဝ်ႈၸူး မိူင်းၶႄႇ။ တႃႇတေႁဵတ်း သဵၼ်ႈတၢင်းတေႃႉသူင်ႇတေႃႈၵႅတ်ႉ ၼၼ်ႉၶွမ်ႊပၼီႇၶႄႇ China National Petroleum Corporation (CNPC) ၶဝ်တေႇထူမ်ၼမ်ႉမၢဝ်း တီႈတႃႈႁိူဝ်းၼွင်တိုၼ်း ဝဵင်းၼမ်ႉၶမ်း မိူင်းတႆး ပွတ်း ႁွင်ႇ။ လွင်ႈဢၼ်တေႇထူမ် ၼမ်ႉမၢဝ်း ၼႆႉယွၼ်ႉတႃႇၽင်တေႃႈၵႅတ်ႉ ဢၼ်ႁဵတ်းဢွၵ်ႇတီႈ မိူင်းရ ၶႅင်ႇ၊ ဢမ်ႇၸၢင်ႈဢဝ်ၵႂႃႇလႄႈၸင်ႇလႆႈဢဝ်လိၼ်ထူမ် ၼမ်ႉမၢဝ်း တီႈတႃႈႁိူဝ်းၼွင်တိုၼ်း လႄႈ ၼွင်ၶမ်း ၸိူဝ်းၼႆႉ တေႇထူမ်မႃးၶၢဝ်းတၢင်းမွၵ်ႈ သွင်လိူၼ် ယဝ်ႉ ၼႆ။

ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈဝႃႈ “ဢၼ်ၶဝ်တေႇထူမ်ၼမ်ႉမၢဝ်းၼႆႉယွၼ်ႉလူဝ်ႇ ဢဝ်သၢႆလွတ်ႇၶၢမ်ႈၼမ်ႉမၢဝ်း သေသၢႆလွတ်ႇဢမ်ႇၸၢင်ႈ ၵႂႃႇၼိူဝ်ၼမ်ႉ၊ သၢႆလွတ်ႇၼၼ်ႉ လူဝ်ႇၽင်ၵႂႃႇတႂ်ႈၼမ်ႉလႄႈယၢမ်းလဵဝ်ၶဝ်တိုၵ်ႉႁဵတ်းဝႆႉ ၽၢႆႇ ၼိုင်ႈၵူၺ်း။ ၽၢႆႇၼိုင်ႈတႄႉၶဝ်ပၼ်ၼမ်ႉလႆဝႆႉယူႇ၊ ပေႃးယဝ်ႉၽၢႆႇၼိုင်ႈယဝ်ႉ သမ်ႉတေ ၶိုၼ်းၵႂႃႇၽၢႆႇၼိုင်ႈသေ တေပၼ် ၼမ်ႉလႆၵႂႃႇၽၢႆႇဢၼ်ၶဝ်ႁဵတ်းယဝ်ႉ ၼၼ်ႉၼႆၶႃႈ။ ယၢမ်းလဵဝ်တႄႉ တိုၵ်ႉ ထူမ်ၽၢႆႈယူႇၽၢႆႇၼိုင်ႈႁိူဝ်းၵေႃႈ တိုၵ်ႉၵႂႃႇမႃးလႆႈယူႇ၊ ပေႃးၶဝ်ထူမ်ထႅင်ႈၽၢႆႇၼိုင်ႈတႄႉ ႁိူဝ်းတေၵႂႃႇယၢပ်ႇဝႆႉယူႇ။ ယွၼ်ႉႁဝ်း ၶႃႈၵႂႃႇၸွမ်းတႃႈ ႁိူဝ်း ၼႆႉ ၵူၺ်းလႄႈတေႁဵတ်းႁိုဝ်ၼႆ ပဵၼ်ဢၼ်ဝူၼ်ႉယၢပ်ႇဝႆႉယူႇ” ၼႆယဝ်ႉ။

တႃႈႁိူဝ်းၼႆႉပဵၼ်တႃႈႁိူဝ်းဢၼ်ပီႈၼွင်ႉၼႂ်းပိုၼ်ႉတီႈၶဝ်ၸႂ်ႉ ပဵၼ်သဵၼ်ႈတၢင်းၵႂႃႇမႃးၵႃႉၶၢႆၸွမ်းၼႂ်းမိူင်းၶႄႇသေ မီးႁိူဝ်းလႅၼ်ႈယူႇသုတ်းဝၼ်း ၼႆယဝ်ႉ။

သၢႆသူင်ႇတေႃႈၵႅတ်ႉဢၼ်ၼႆႉ လုၵ်ႉမႃးတီႈ မိူင်းရၶႅင်ႇ ၶွမ်ႊပၼီႊ CNPC လႄႈလူင်ပွင်ၸိုင်ႈမိူင်းမၢၼ်ႈ ၶဝ်တူၵ်း လူင်းလႆႈၸႂ်ၵၼ် တႃႇၶၢႆပၼ် ၶႄႇ။ တၢင်းယၢဝ်းတေႃႈသူင်ႇၵႅတ်ႉမီး 2800 ၵီႇလူဝ်ႇမီႇတႃႇ လတ်းၶၢမ်ႈမိူင်းတင်းမူတ်း 21 ၸေႈဝဵင်း၊ ၼႂ်းၼၼ်ႉၶဝ်ႈပႃးမိူင်းတႆးပွတ်းႁွင်ႈ 4-5 ၸေႈဝဵင်း သေ သူင်ႇၵႂႃႇၸူးမိူင်းၶႄႇ ၶုၺ်ႇမိၼ်း။ ၶူင်းၵၢၼ် ဢၼ်ၼႆႉ ယႂ်ႇလိူဝ်ပိူၼ်ႈၼႂ်းၵုၼ်ဢေးသျႃးၸဵင်ႇၸၢၼ်းဝၼ်းဢွၵ်ႇ၊ ၶွမ်ႊပၼီႊ CNPC ဝၢင်းၽႅၼ်ဝႆႉတေဢၢၼ်း ႁဵတ်းႁႂ်ႈယဝ်ႉၼႂ်း 2013။ ပေႃးယဝ်ႉတူဝ်ႈယဝ်ႉၶႄႇ တေၸႂ်ႉတိုဝ်းၶၢဝ်းတၢင်း 30 ပီဝႃႈၼႆယဝ်ႉ။