ၶၢဝ်ႇမိူင်းတႆး

SSPP/SSA ႁူပ်ႉဢုပ်ႇၸုမ်း သၢင်ႈလွင်ႈငမ်း ယဵၼ်မၢၼ်ႈ

SSPP/SSA ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး ႁူပ်ႉဢုပ်ႇၸုမ်း သၢင်ႈလွင်ႈငမ်းယဵၼ်မၢၼ်ႈတီႈ ဝဵင်းတူၼ်ႈ တီး ၸိုင်ႈတႆးပွတ်းၸၢၼ်း၊ သွင်ၽၢႆႇတူၵ်းလူင်းၵၼ် 10 ၶေႃႈဢိင်ၼိူဝ်ၼမ်ႉၸႂ်ပၢင်လူင်။

မိူဝ်းဝၼ်းထိ 28 January 2012 ဝၼ်းသဝ်ၸုမ်း SSPP/SSA ႁူပ်ႉဢုပ်ႇမၢၼ်ႈ ၸုမ်းၶိုင်ပွင်လွင်ႈငမ်းယဵၼ်ၸၼ်ႉ ၸႄႈမိူင်းလႄႈ ၸၼ်ႉၸိုင်ႈမိူင်းႁူမ်ႈတုမ် တီႈလုမ်းလူင်ပွင်ၸိုင်ႈတႆး ဝဵင်းတူၼ်ႈတီး ၸိုင်ႈတႆးပွတ်းၸၢၼ်း။ပၢင်ဢုပ်ႇ ဢူဝ်းပွၵ်ႈၵမ်းၼႆႉ တၢင်းသွင်ၽၢႆႇတူၵ်းလူင်းလႆႈၸႂ်ၵၼ် 10 ၶေႃႈ၊ ၸၼ်ႉၸႄႈမိူင်း 5 ၶေႃႈလႄႈၸၼ်ႉၸိုင်ႈ မိူင်းႁူမ်ႈ တုမ် 5 ၶေႃႈၼႆယဝ်ႉ။

ပိူဝ်ႈတႃႇဢုပ်ႇၸၼ်ႉၸႄႈမိူင်းၼၼ်ႉ တူဝ်တႅၼ်းၸုမ်းပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး SSPP/SSA ၶဝ် သူင်ႇ ၵူၼ်းၵႂႃႇ 7 ၵေႃႉဢုပ်ႇဢူဝ်းၸဝ်ႈၶုၼ်သႅင်ၵေႃႉဢွၼ်ႁူဝ်၊ ၽၢႆႇမၢၼ်ႈ ဢူးဢွင်ႇတွင်းၵေႃႉဢွၼ်ႁူဝ် သေဢုပ်ႇ ဢူဝ်း။ ၶေႃႈတူၵ်းလူင်း လႆႈၸႂ် ၸၼ်ႉၸႄႈမိူင်းမီး 5 ၶေႃႈ

1-    ၵိုတ်းသိုၵ်းတေႃႇၵၼ်။
2-    ၵူၼ်းဝၢၼ်ႈလႄႈလုၵ်ႈမေးၶွင်လုၵ်ႈၸုမ်းSSPP/SSA ႁႂ်ႈယူႇသဝ်းၵိၼ်သၢင်ႈတီႈဝၢၼ်ႈႁႆးၵႂႃႇ။
3-    တင်းသွင်ၽၢႆႇတေတင်ႈလုမ်းၵပ်းသၢၼ်တီႈတူၼ်ႈတီး၊ လႃႈသဵဝ်ႈ လႄႈၶူဝ်လမ်၊ ဝႆႉၽူႈၵပ်းသၢၼ်ၸွမ်း ၼင်ႇတင်းသွင်ၽၢႆႇလႆႈၸႂ်ၵၼ်၊ ၼွၵ်ႈသေၼၼ်ႉထုၵ်ႇလီဝႆႉၸုမ်းၵပ်းသၢၼ်တီႈလႂ်ထႅင်ႈၵေႃႈ တေသိုပ်ႇဢုပ်ႇဢူဝ်း ၵၼ်ထႅင်ႈ။
4-    ပေႃးယိပ်းၵွင်ႈၵၢင်ႇ ဢွၵ်ႇၼွၵ်ႈၼႃႈလိၼ်ဢၼ်ၵုမ်းၵမ်ဝႆႉ သွင်ၽၢႆႇတေလႆႈပွင်ႇလႅင်းငူပ်ႉငီႉၵၼ်လူင်ႈ ၼႃႈ။
5-    ဢၼ်တေဢုပ်ႇဢူဝ်းၵၼ်ၸၼ်ႉၸိုင်ႈမိူင်းႁူမ်ႈတုမ်ပိူဝ်ႈတႃႇငမ်းယဵၼ်/ လွင်ႈပူၵ်းပွင်လႄႈ ပိူဝ်ႈတႃႇယူႇ သဝ်းၸွမ်းၵၼ်ၵႂႃႇၵတ်းၵတ်းယဵၼ်ယဵၼ် ၶၢဝ်းယၢဝ်းၼၼ်ႉတေတူၵ်းလူင်းဢွင်ႈတီႈ လႄႈၶၢဝ်းယၢမ်းဢၼ်တင်းသွင် ၽၢႆႇလႆႈၸႂ်ၵၼ်ၵႂႃႇ။

တူဝ်တႅၼ်းၽူႈႁူမ်ႈလူင်းလၢႆးမိုဝ်းၽၢႆႇမၢၼ်ႈ 5 ၵေႃႉပွၵ်ႈၵမ်းၼႆႉ1. ၸဝ်ႈသိုၵ်းလူင်ဢွင်ႇတူႇ(ၽွင်းလူင်ႁွင်ႈၵၢၼ် ၽၢႆႇ ႁူမ်ႇလူမ်ႈလႄႈ လႅၼ်လိၼ် လူင်ပွင်ၸိုင်ႈၸႄႈမိူင်းတႆး)၊ 2. ၸဝ်ႈသိုၵ်းတိၼ်ႇၸူဝ်း ၸဝ်ႈၼႃႈတီႈ G1 တိူင်း သိုၵ်း ၸဵင်ႇႁွင်ႇဝၼ်းဢွၵ်ႇ(လႃႈသဵဝ်ႈ)၊ 3.ၸဝ်ႈသိုၵ်းၸေႃႇမိၼ်းဢေး G1 တိူင်းသိုၵ်းဝၼ်းဢွၵ်ႇၵၢင်၊ 4. ဢူးဢွင်ႇ ၵျေႃႇမျိၼ်ႉ(ၽၢႆႇပူၵ်းပွင်တူင်ႇတၢင်ႇၼႂ်းၸႄႈမိူင်းတႆး)၊ 5. ဢူးမွင်ႇမွင်ႇ(ၽူႈၵွၼ်းမၢႆမီႈၸႄႈမိူင်း)။

တူဝ်တႅၼ်းၽူႈႁူမ်ႈလူင်းလၢႆးမိုဝ်းၽၢႆႇSSPP/ SSA ၸုမ်းတႆး 5 ၵေႃႉပွၵ်ႈၵမ်းၼႆႉ 1. ၸဝ်ႈၶုၼ်သႅင်(ႁွင်ႈၵၢၼ်ၽၢႆႇ ၵၢၼ်မိူင်း)၊ 2. ၸဝ်ႈႁၢၼ်ၶိူဝ်းမၢဝ်း (ၵႅမ်ၽူႈၼမ်းၼႂ်းမၢႆ 1) 3. ၸဝ်ႈၵျေႃႇလႃႉ(ၽူႈၼမ်းၼႂ်းႁွင်ႈၵၢၼ် ၵူႈလွင်ႈလွင်ႈ)၊ 4. ၸဝ်ႈထိူၼ်ႇမိူင်း (ၽူႈၶဝ်ႈပႃးၼႂ်းငဝ်ႈငုၼ်းၵၢၼ်မၢၵ်ႈမီး)၊ 5.ၸဝ်ႈသိူဝ်ပိူင်ႇၾႃႉ (ၵႅမ်ၽူႈၵွၼ်းတပ်ႉၸုမ်း 72) ၸိူဝ်းၼႆႉယဝ်ႉ။

ဝၢႆးတူၵ်းလူင်းလႆႈၸႂ်ၵၼ်ၸၼ်ႉၸႄႈမိူင်းယဝ်ႉ ထိုင်ဝၢႆးဝၼ်းမႃး သိုပ်ႇဢုပ်ႇၸၼ်ႉၸိုင်ႈမိူင်းႁူမ်ႈတုမ်ၵၼ်ၵႂႃႇတူဝ် တႅၼ်း ၽၢႆႇတႆးဢၼ်ၶဝ်ႈဢုပ်ႇမီး 11 ၵေႃႉ ၸဝ်ႈၶိူဝ်းတႆးၵေႃႉဢွၼ်ႁူဝ်ဢုပ်ႇဢူဝ်းၵႂႃႇသေ မီးၶေႃႈတူၵ်းလူင်းလႆႈၸႂ် ၵၼ် 5 ၶေႃႈ မိူၼ်ၵၼ် ၶေႃႈလႆႈၸႂ်ၸိူဝ်းၼၼ်ႉ

1-ၶေႃႈလႆႈၸႂ်တင်းသွင်ၽၢႆႇဢၼ်လႆႈတူၵ်းလူင်းၵၼ်ၼၼ်ႉ လႆႈၸႂ်ၵၼ်ဝႃႈ တေႁပ်ႉႁွင်း မၵ်းမၼ်ႈၵႂႃႇ။
2-ၼင်ႇႁိုဝ်ၸိုင်ႈမိူင်းႁူမ်ႈတုမ်ဢမ်ႇတႅၵ်ႇယၢႆႈ၊ လွင်ႈၽွမ်ႉႁူမ်ႈ ၸၢဝ်းၶိူဝ်းဢမ်ႇတႅၵ်ႇယၢႆႈ လႄႈ ဢႃႇၼႃႇ ၸိၵ်းၸွမ်ၸိုင်ႈမိူင်း မၼ်ႈၵိုမ်းၶၢဝ်းယၢဝ်းၼၼ်ႉ တေဢိင်ၼိူဝ် ၼမ်ႉၸႂ်ပၢင်လူင်သေ ႁူမ်ႁွမ်း ႁဵတ်းသၢင်ႈၵႂႃႇ။
3-ပိူဝ်ႈတႃႇလွင်ႈပူၵ်းပွင်ၼႃႈလိၼ်/ လွင်ႈယူႇသဝ်းလႄႈ ယုၵ်ႉယွင်ႈၽဝ ၵူၼ်းမိူင်းၸိူဝ်းၼၼ်ႉ တေဢိင် ၼိူဝ်မၢႆမီႈသေႁူမ်ႈႁွမ်းၵၼ်ၶိုင်ပွင်ႁဵတ်းသၢင်ႈၵႂႃႇ။
4-တေႁူမ်ႈမိုဝ်းၵၼ်ၵႂႃႇၵဵဝ်ႇလူၺ်ႈလွင်ႈၽဵဝ်ႈမူၺ်ႉယႃႈမဝ်းၵမ်။
5-ၼင်ႇႁိုဝ်တေလႆႈလွင်ႈငမ်းယဵၼ်မၼ်ႈၵိုမ်းၶၢဝ်းယၢဝ်းၼၼ်ႉ သွင်ၽၢႆႇတေႁူမ်ႈမိုဝ်းသိုပ်ႇဢုပ်ႇဢူဝ်း ၵၼ်ၵႂႃႇ။ 
သဵၼ်ႈမၢႆၽူႈၸိူဝ်းလူင်းလၢႆးမိုဝ်း ၸၼ်ႉၸိုင်ႈမိူင်းႁူမ်ႈတုမ်ၽၢႆႇမၢၼ်ႈ 1.ဢူးဢွင်တွင်း၊ 2.ဢူးတဵင်းၸေႃႇ
(ႁူဝ်ပဝ်ႈၵေႃႇမတီႇၽၢႆႇၶပ်းၶိုင် လွင်ႈငမ်းယဵၼ်ၼႂ်းမိူင်းလႄႈ ၽၢႆႇၸၢဝ်းၶိူဝ်း)၊ 3. ဢူးၶိၼ်ႇမွင်ႇမျိၼ်ႉ (ၵေႃႇသၢင်ႈ)၊ 4. ဢူးဢူင်းမျိၼ်ႉ(သမဝႃယမ- ႁွင်ႈၵၢၼ်လဵင်ႉသတ်းလႄႈၵၢၼ်လႃႈၼမ်ႉ) 5. ၸဝ်ႈဢွင်ႇမျၢတ်ႈ (ၸွမ်ၽွင်းလူင်မိူင်း တႆး)၊ 6 ဢူးဝိၼ်းထုၼ်း (ပႃႇမႆႉ)7. ယူးမွင်ႇမွင်ႇတဵင်း(ၽွင်းတႅၼ်းသၽႃး ၵူၼ်းမိူင်းၸႄႈဝဵင်းၶယၢၼ်း)၊ 8.ၸွမ်ႁၢၼ်ဢွင်ႇၵျေႃႇၸေႃး (ၽူႈၵွၼ်းတိူင်းသိုၵ်းၸဵင်ႇႁွင်ႇဝၼ်းဢွၵ်ႇ (လႃႈသဵဝ်ႈ)၊ 9.ၸွမ်ႁၢၼ်မျၢတ်ႈထုၼ်းဢူး ၽူႈၵွၼ်းတိူင်းသိုၵ်းဝၼ်းဢွၵ်ႇၵၢင်(ၶူဝ်လမ်)၊ 10. ၸွမ်ႁၢၼ်ၸေႃႇဝိၼ်း (ၵႅမ်ၽွင်းလူင် ႁွင်ႈၵၢၼ်ၽၢႆႇလႅၼ်လိၼ်)၊ 11.ၸဝ်ႈသိုၵ်းၸေႃႇၼၢႆႇဢူး(ၽၢႆႇၵႅတ်ႇၶႄ)၊ 12. ၸဝ်ႈသိုၵ်းလူင်ဢွင်ႇတူႇ ၸိူဝ်းၼႆႉယဝ်ႉ။

ပၢင်ၵုမ်ပွၵ်ႈၵမ်းၼႆႉ ဢုပ်ႇဢူဝ်းၵၼ်ၵႂႃႇမိူဝ်ႈဝၼ်းထိ 28 သေတႃႉဢမ်ႇလႆႈလူင်းလၢႆးမိုဝ်းၵမ်းလဵဝ်။ ဢူးဝိၼ်းထုၼ်း လၢတ်ႈတီႈၶၢဝ်ႇ Eleven news ဝႃႈ ပေႃးဢဝ်လွင်ႈယုမ်ႇယမ်တႆးဝႃႈတႄႉ ဝၼ်းသဝ်ၼႆႉလူင်းလၢႆးမိုဝ်းဢမ်ႇလီလႄႈ ဢမ်ႇလႆႈလူင်းလၢႆးမိုဝ်းၵမ်းလဵဝ်၊ ယွၼ်ႉၼၼ်ၸင်ႇလူင်းလၢႆးမိုဝ်းၵႂႃႇမိူဝ်ႈဝၼ်းထိ 29 January 2012 ဝၼ်းဢႃး တိတ်ႉ  ၼႆယဝ်ႉ။