ၶၢဝ်ႇမိူင်းတႆး
ၵူၼ်းၼုမ်ႇၸိူဝ်ႉၸၢတ်ႈၸိုင်ႈတႆး လူင်းႁူင်းႁဵၼ်းၸုပ်ႈ 11
- Details
- Published on Wednesday, 01 February 2012 13:18
- Written by သႅင်ႁႃႈၼမ်ႉ
ၵူၼ်းၼုမ်ႇၸိူဝ်ႉၸၢတ်ႈၸိုင်ႈတႆး လူင်းႁူင်းႁဵၼ်း School for Shan State Nationalities Youth (SSSNY) ၸုပ်ႈ ထိ 11 မီး ၽူႈယႂ်ႇၵူၼ်းလူင် လႄႈ ၽူႈတိူင်ႇပၢင်ႇ ႁူင်းႁဵၼ်း ၶဝ်ႈႁူမ်ႈ လၢတ်ႈ ၵႂၢမ်းသူင်ႇသင်ႇၵူၼ်းၼုမ်ႇႁႂ်ႈသိုပ်ႇ ႁဵတ်း ၵၢၼ်ၵႂႃႇမိူဝ်းၼႃႈ။
မိူဝ်ႈဝၼ်းထိ 29 January 2012 ယၢမ်း 01:30 ဝၼ်းဢႃးတိတ်ႉပူၼ်ႉမႃးႁူင်းႁဵၼ်း ၵူၼ်းၼုမ်ႇ ၸိူဝ်ႉ ၸၢတ်ႈၸိုင်ႈ တႆး School for Shan State Nationalities Youth (SSSNY) လႆႈမွပ်ႈပၼ် ဝႂ် ၸူပ်း ႁူင်းႁဵၼ်းတီႈလုၵ်ႈႁဵၼ်းၶဝ် ၵႂႃႇတီႈ လႅၼ်လိၼ်တႆး-ထႆးတီႈၼိုင်ႈ။ ၼႂ်းပၢင်ပွႆးမီး လုၵ်ႈႁဵၼ် းၵဝ်ႇ လႄႈၶႅၵ်ႇၼွၵ်ႈမိူင်း ၵူၼ်းၼုမ်ႇ ၸဵမ်ၸိူဝ်း ႁၢင်ႈႁႅၼ်းတႃႇ သွပ်ႇပီၼႃႈၵေႃႈၶဝ်ႈႁူမ်ႈလဵပ်ႈႁဵၼ်းၸွမ်း။
ၾၢႆႇလုၵ်ႈႁဵၼ်းမီး Video ၵႃႇတုၼ်း ဢၼ်လုၵ်ႈႁဵၼ်းၶဝ်လႆႈႁဵၼ်းမႃးၸိူဝ်းၼၼ်ႉ မႃးၼေ၊ ႁွင်ႉၵႂၢမ်း လႄႈ တၢင်း ၵႃႈၵူႈၸၢဝ်းၶိူဝ်းၼႂ်း မိူင်းတႆး ၸဵမ်တႆး၊ ၶၢင်၊ လႃးႁူႇ၊ ယၢင်း လႄႈပဢူဝ်း ၸိူဝ်းၼႆႉမူၼ်ႈၸႂ်ပၼ် ပီႈၼွင်ႉၶဝ်ႈႁူမ်ႈ။ ၽူႈတိူင်ႇပၢင်ႇႁူင်းႁဵၼ်း မိူၼ်ၸဝ်ႈၶိုၼ်းသႂ် ၸႂ်ယဵၼ်၊ ၼၢင်းသႅင်ၼွင်ႉ၊ ၶုၼ်ဢုၵ်ႉၵႃႇလႄႈ ဢႃးၸၢၼ် ၽိပ်ႊၽႃႊ ၸိူဝ်းၼႆႉ မွၵ်ႇလၢတ်ႈၵႂၢမ်းပၼ် ႁႅင်းၸႂ်ၵူၼ်းၼုမ်ႇ ဢၼ်တေသိုပ်ႇ ႁဵတ်းၵၢၼ်တႃႇၼႂ်းတူင်ႇဝူင်းၵူၼ်း ၵႂႃႇမိူဝ်းၼႃႈ။
ဢႃးၸၢၼ်ၽိပ်ႊၽႃႊလၢတ်ႈဝႃႈ “ယိၼ်းၸူမ်း လႄႈ ႁူမ်ၸူမ်းၸွမ်း ဢၼ်လႆႈမႃးႁၼ် လုၵ်ႈဢွၼ်ႇၼုမ်ႇ သူၼ်ၸႂ် ၵၢၼ်ႁဵၼ်းၵၢၼ်သွၼ် သေ မႃးၶတ်းၸႂ် ႁဵၼ်းၵႂႃႇ။ ၼႂ်းၶၢဝ်းတၢင်းၸမ်ၸမ်ၸဵတ်းလိူၼ်ပဵၵ်ႉသမ်ႉမၼ်းယၢပ်ႇၽိုတ်ႇ ၵႃႈႁိုဝ်ၵေႃႈ ဢွၼ်ၵၼ်ၶတ်းၸႂ်ႁဵၼ်းၵႂႃႇတေႃႇ ပေႃး ယဝ်ႉ ယွၼ်ႉဝႃႈၵူၼ်းၼုမ်ႇ ဝၼ်းမိူဝ်ႈၼႆႉ တေၸၢင်ႈပဵၼ်ၽူႈ ဢွၼ် ႁူဝ်တႃႇမိူဝ်းၼႃႈလႄႈ ၵူၼ်းၼုမ်ႇၶဝ် ထုၵ်ႇလီလႆႈပဵၼ်ၵူၼ်းမီးပိင်ႇၺႃႇ တဵမ်ထူၼ်ႈၵွၼ်ႇ ႁဝ်းၸင်ႇတေ ဢမ်ႇတူၵ်း လွၵ်းပိူၼ်ႈ”ၼႆယဝ်ႉ။
ႁူင်းႁဵၼ်းၵူၼ်းၼုမ်ႇၸိူဝ်ႉၸၢတ်ႈၸိုင်ႈတႆး တေတင်ႈမႃးမိူဝ်ႈလိူၼ် May 2001။ မီးယိူင်းမၢႆ ပိူဝ်ႈတႃႇ ပူၵ်းပွင် ၼမ်ႉ ၵတ်ႉ ၵူၼ်းၼုမ်ႇ လႄႈႁႂ် မီးလွင်ႈ ၽဵင်ႇပဵင်းၼႂ်းတူင်ႇဝူင်းၵူၼ်း။ ႁူင်းႁဵၼ်းၵူၼ်းၼုမ်ႇၸိူဝ်ႉၸၢတ်ႈၸိုင်ႈတႆး ပိုတ်ႇႁပ်ႉ လုၵ်ႈႁဵၼ်း ၼိုင်ႈပီ 30 ၵေႃႉ။ ၼႂ်းႁူင်းႁဵၼ်း ဢမ်ႇၸႂ်ႈႁဵၼ်းလိၵ်ႈလွင်ႈလဵဝ်၊ မီးပႃး လွင်ႈတူဝ်ထူပ်းလူင်း မိုဝ်းႁဵတ်း ၵမ်းလဵဝ်။ လၢႆးႁဵၼ်းလၢႆးသွၼ် ဢမ်ႇမိူၼ်ႁူင်းႁဵၼ်းၼႂ်းမိူင်းမၢၼ်ႈ။
လုၵ်ႈႁဵၼ်းၸိူဝ်းယဝ်ႉႁူင်းႁဵၼ်းဢၼ်ၼႆႉၵမ်ႈၼမ် တေမီးၸႂ်ႁတ်းလၢတ်ႈ ႁတ်းဝူၼ်ႉ ႁတ်းႁဵတ်း တႃႇတူဝ်ၵဝ်ႇ လႄႈ တူင်ႇဝူင်းၶိုၼ်ႈယႂ်ႇလိူဝ် ၵဝ်ႇ။ မိူဝ်ႈလဵဝ် လုၵ်ႈႁဵၼ်း ၸိူဝ်းႁဵၼ်းယဝ်ႉတင်းမူတ်းမီး 319 ၵေႃႉ။ လုၵ်ႈႁဵၼ်းၸိူဝ်းယဝ်ႉ ၵႂႃႇၵမ်ႈၽွင်ႈ ၶိုၼ်းပွၵ်ႈၵႂႃႇႁဵတ်းၵၢၼ် ၼႂ်းတူင်ႇ ဝူင်း တူဝ်ၵဝ်ႇ၊ ၵမ်ႈၽွင်ႈတိုၵ်ႉသိုပ်ႇၶိုၼ်ႈႁဵၼ်းၸၼ်ႉ ၸွမ်ထႅင်ႈ။
သင်ၽူႈလႂ်ၽႂ် ၶႂ်ႈလဵပ်ႈႁဵၼ်း ဢမ်ႇၼၼ်ၶႂ်ႈလႆႈဝႂ်တၢင်ႇယိုၼ်ႈ လွင်ႈႁူင်းႁဵၼ်းၸိုင် ၶဝ်ႈတူၺ်းလႆႈတီႈ _ www.sssny.org
