ၶၢဝ်ႇမိူင်းတႆး

ၸဝ်ႈၼႃႈတီႈ သိုၵ်းမၢၼ်ႈတိုၵ်ႉတဵၵ်းတဵင် ပေႉၵိၼ်ၵူၼ်းမိူင်းမိူၼ်ၵဝ်ႇ

ၸဝ်ႈၼႃႈတီႈသိုၵ်းမၢၼ်ႈ တိုၵ်ႉတဵၵ်းတဵင် ၵဵပ်းၵိၼ်ငိုၼ်းၵူၼ်းမိူင်းၼႂ်းပိုၼ်ႉတီႈ ၸိုင်ႈတႆးပွတ်း ဢွၵ်ႇ မိူၼ်ၵဝ်ႇ ပိုၼ်ၽၢဝ်ႇလႅၵ်ႈလၢႆႈ တၢင်းႁဵတ်းပႆႇလႅၵ်ႈလၢႆႈ။ ၸုမ်းယႄး/သိုၵ်းမၢၼ်ႈဢၼ်ပႂ်ႉ ၵဵၵ်ႉ (လၢၼ်ႇ) တီႈသဵၼ်ႈတၢင်းၵႂႃႇမိူင်းယၢင်း သဵၼ်ႈတၢင်းၶဝ်ႈဢွၵ်ႇ ၵဵင်းတုင်တိုၵ်ႉဢွၼ်ၵၼ် ၵဵပ်း ၵိၼ်ငိုၼ်း ၸုမ်းၸဝ်ႈလူတ်ႉၶိူင်ႈ/လူတ်ႉလူင် လႄႈသၢမ်လေႃႉ ၸိူဝ်းတေႃႉသူင်ႇ ၶဝ်ႈဢွၵ်ႇဝဵင်းၵူႈဝၼ်း။ လူတ်ႉၶိူင်ႈလႆႈပၼ် 300 ၵျၢပ်ႈ၊ သၢမ်လေႃႉ 500 ၵျၢပ်ႈ၊ လူတ်ႉလူင် 1,000 ၵျၢပ်ႈ။

မိူဝ်းဝၼ်းထိ 13/02/2012 ယၢမ်းၵၢင်ၼႂ် 10:00 – 01:00 ပၢႆပူၼ်ႉမႃးၼႆႉ ၸုမ်းၸဝ်ႈၼႃႈတီႈ သိုၵ်း မၢၼ်ႈ/ ယႄးၼႂ်းပိုၼ်ႉတီႈ တႃႈၶီႈလဵၵ်း ႁႄႉလူတ်ႉၶိူင်ႈ/သၢမ်လေႃႉ ၼႂ်းၵႄႈၵၢင်လၢၼ်ႇမၢၵ်ႇ ယၢင်း လႄႈ ဝၢၼ်ႈၵွင်းမူၼ်း ၸေႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇယဝ်ႉ ၵဵပ်းငိုၼ်း ၵူၼ်းၶီႇ လူတ်ႉၶိူင်ႈ၊ မီးဝႂ်ၶပ်းၶီႇသေတႃႉ ၸဝ်ႈၼႃႈတီႈမၢၼ်ႈၶဝ်လၢတ်ႈဝႃႈ ဢမ်ႇမီးၵၢတ်ႉမၢႆလူတ်ႉၶိူင်ႈ ၼႆသေၵူတ်ႇ၊ ၸိူဝ်းဢမ်ႇမီးၵၢတ်ႉၶိူင်ႈမၢႆလူတ်ႉၶိူင်ႈ လႆႈသဵင်ႈ 300 ဝၢတ်ႇ၊ ၸိူဝ်းဢမ်ႇမီးဝႂ်ၶပ်းၶီႇ လႆႈသဵင်ႈ 600 ဝၢတ်ႇ ငိုၼ်းထႆး ၼႆယဝ်ႉ။

ၼႂ်းဝၼ်းထိ 13/02/2012 ၼၼ်ႉၵူၺ်းၼင်ႇၵဝ်ႇ ၸၢႆးၸၢႆး(ၸိုဝ်ႈပွမ်) လႄႈၸၢႆးၼွင်ႉ (ၸိုဝ်ႈပွမ်) လုၵ်ႉၵဵင်းတုင်ၵႂႃႇတႃႈၶီႈလဵၵ်းသေ ထုၵ်ႇၸဝ်ႈၼႃႈတီႈမၢၼ်ႈၵူတ်ႇၸႅတ်ႈထၢမ်ယဝ်ႉ လႆႈသဵင်ႈငိုၼ်း 6,000 ပျႃး။ ၸဝ်ႈၼႃႈတီႈၶဝ်လၢတ်ႈဝႃႈ တႃႇႁႃငိုၼ်းသိုဝ်ႉၶူဝ်းၶွင်တွၼ်ႈၵေႃႉႁၵ်ႉ လုၵ်ႈမႄးၶဝ် ၼႂ်းဝၼ်း တၢင်းႁၵ်ႉလုမ်ႈၾႃႉ 14/02/2012 ဝႃႈၼႆ။

ၵူၼ်းၼႂ်းပိုၼ်ႉတီႈလၢတ်ႈဝႃႈ“ ၵူၼ်းၵဵပ်းငိုၼ်းပဵၼ်ၼၢင်းယိင်းမၢၼ်ႈ။ ၵေႃႉႁႄႉလူတ်ႉၵိုတ်းပဵၼ် သိုၵ်းမၢၼ်ႈ။ ၶဝ်လၢတ်ႈဝႃႈ ႁဵတ်းၸွမ်းပုၼ်ႈၽွၼ်းၶဝ်ၵူၺ်း” ၼႆယဝ်ႉ။

ၵူၼ်းၼႂ်းပိုၼ်ႉတီႈၸိူဝ်းတိတ်းတၢမ်းၶၢဝ်ႇလၢတ်ႈဝႃႈ ပဵၵ်ႉသမ်ႉမိူင်းမၢၼ်ႈပိုၼ်ၽၢဝ်ႇဝႃႈ လႅၵ်ႈလၢႆႈ ပဵၼ်မိူင်း တီႊမူဝ်ႊၶရေႊသီႊ ယဝ်ႉၼႆသေတႃႉ တၢင်းႁဵတ်းတၢင်းသၢင်ႈလွင်ႈတူင်ႉၼိုင်ၸုမ်း သိုၵ်းမၢၼ်ႈ ယင်း တိုၵ်ႉမိူၼ်ၵဝ်ႇ၊ ယင်းတိုၵ်ႉပေႉၵိၼ်ၵူၼ်းဝၢၼ်ႈၵူၼ်းမိူင်းမိူၼ်ၵဝ်ႇ၊ ၽဝၵူၼ်း မိူင်းပႆႇမီးလွင်ႈ လႅၵ်ႈလၢႆႈသင် ဝႃႈၼႆ။