ၶၢဝ်ႇမိူင်းတႆး
သိုၵ်းမၢၼ်ႈ လႄႈ တပ်ႉသိုၵ်းၸိုင်ႈတႆး SSA တိုၵ်ႉ ပဵၼ်ပၢင်တိုၵ်းၵၼ်
- Details
- Published on Wednesday, 22 February 2012 12:26
- Written by သႅင်ႁႃႈၼမ်ႉ
သိုၵ်းမၢၼ်ႈ လႄႈ တပ်ႉသိုၵ်းၸိုင်ႈတႆး SSA ဢၼ်တူင်ႉၼိုင်ပွတ်းဢွၵ်ႇၶူင်း ပဵၼ်ပၢင်တိုၵ်းၵၼ်ႁိမ်းမိူင်းႁႆး ၸေႈ တွၼ်ႈ တႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း။
မိူဝ်ႈဝၼ်း ထိ 21/02/2012 ၶၢဝ်းယၢမ်း 03:15 ၼႃးထီး(minutes) သိုၵ်းမၢၼ်ႈတပ်ႉၶမယ ၸဝ်ႈသိုၵ်းလူင်တိၼ်ႇ ၼၢႆႇ ဢွၼ်ႁူဝ် ပဵၼ်ပၢင်တိုၵ်းၵၼ်တင်း တပ်ႉသိုၵ်းၸိုင်ႈတႆး ၼႃႈလိၼ်သိုၵ်းၵဵင်းတုင် တီႈတၢင်းတူၵ်းမိူင်းႁႆး ယၢၼ် ၵႆ ဝၢၼ်ႈယျႃႇဢေး 20 ၵီႊလူဝ်ႊမဵတ်ႊ။ ပၢင်တိုၵ်း ပွၵ်ႈၵမ်းၼႆႉ သိုၵ်းမၢၼ်ႈမၢတ်ႇၸဵပ်း 3-4 ၵေႃႉ ၼႂ်းၼၼ်ႉ လႅပ်ႈ ပႃး ၶုၼ်သိုၵ်း ၵေႃႉၼိုင်ႈ လႅင်ႇၶၢဝ်ႇလၢတ်ႈၼင်ႇၼႆ။
ၵူၼ်းၼႂ်းပိုၼ်ႉတီႈ ၵေႃႉၼိုင်ႈလၢတ်ႈဝႃႈ “ ယွၼ်ႉဝႃႈ သိုၵ်းမၢၼ်ႈဢမ်ႇၶႂ်ႈပၼ်သိုၵ်းတႆးယူႇၸွမ်းၸိူဝ်းၼႆႉ၊ ၶဝ်လၢတ်ႈ ဝႃႈၸိူဝ်းၼႆႉ ဢမ်ႇၸႂ်ႈၼႃႈလိၼ်သူ၊ ၼႃႈလိၼ်သူပဵၼ်ၸွမ်းမိူင်းတေႃႉ မိူင်းထႃး ၼၼ်ႉၼႆသေတဵၵ်းႁႂ်ႈၸုမ်းသိုၵ်း တႆး ၵႂႃႇယူႇတင်းမိူင်းတေႃႉ မိူင်းထႃးၼၼ်ႉလႄႈ ၸင်ႇလႆႈပဵၼ်ပၢင်တိုၵ်းၵၼ်ယဝ်ႉ” ဝႃႈၼႆ။
သိုပ်ႇလၢတ်ႈထႅင်ႈဝႃႈ ယၢမ်းလဵဝ် သိုၵ်းမၢၼ်ႈတိုၵ်ႉထႅမ်ႁႅင်းသိုၵ်း မႃးထႅင်ႈယူႇတိၵ်းတိၵ်း လႄႈ လႅပ်ႈတေမီးပၢင်တိုၵ်း ၵၼ်ထႅင်ႈယူႇ ၼႆယဝ်ႉ။
ၵဵဝ်ႇၵပ်းလွင်ႈၼႆႉ ၸဝ်ႈသိုၵ်းၵွၼ်းၸိုၼ်ႈ ၽူႈၵွၼ်းၼႃႈလိၼ်သိုၵ်းမၢႆ 1 (သၢႆသိုၵ်းၵဵင်းတုင်) လၢတ်ႈတင်းၵေႃၶၢဝ်ႇ ၽူႈတွႆႇႁွၵ်ႈဝႃႈ မၢၼ်ႈၶွၼ်ႈႁႅင်းသေၽိုတ်ႉဢိူမ်ႈၸမ်ႁဝ်းတိၵ်းတိၵ်း။ လႅပ်ႈၶႂ်ႈမိပ်ႇႁဝ်းထွၼ်လူင်းမႃးယူႇတင်းလႅၼ် လိၼ်ထႆး။ ၵူၺ်းၵႃႈ မိူင်းတႆးၼႆႉ ပဵၼ်ၼမ်ႉလိၼ်ႁိၼ်ၽႃ တီႈၵိူတ်ႇႁဝ်းလႄႈ ႁဝ်းတိုၼ်းဢမ်ႇၸၢင်ႈထွၼ် သိုၵ်းလႆႈ ဝႃႈၼႆယဝ်ႉ။
ပၢင်တိုၵ်းပွၵ်ႈၼႆႉ ၵူၼ်းၼႂ်းပိုၼ်ႉတီႈ ၵေႃႉၼိုင်ႈလၢတ်ႈဝႃႈ “ပၢင်တိုၵ်းတေႇမႃးမိူဝ်ႈဝၼ်းထိ 06/02/2012 တပ်ႉသိုၵ်း မၢၼ်ႈၶလယ 572 လႄႈ တပ်ႉသိုၵ်းၸိုင်ႈတႆး ယိုဝ်းၵၼ်မၢၼ်ႈတၢႆ 2 ၵေႃႉ မၢတ်ႇၸဵပ်း 3 ၵေႃႉ။ ထိုင်မႃး ဝၼ်းထိ 18/02/2012 သိုၵ်းမၢၼ်ႈမႃးဝႅတ်ႉ တိုၵ်းသိုၵ်းတႆး လႄႈ လႆႈတိုၵ်းၵၼ်ထႅင်ႈတီႈ ၵႄႈ မိူင်းႁႆး တင်းတႃႈ ၶီႈလဵၵ်း” ဝႃႈၼႆယဝ်ႉ။
