ၶၢဝ်ႇမိူင်းတႆး

သိုၵ်းမၢၼ်ႈတဵၵ်းတဵင် ၶျေႃးထူဝ်ႈ ၶျေႃးလူတ်ႉၶိူင်ႈ ၸႂ်ႉသူင်ႇတၢင်း

မိူဝ်ႈဝၼ်းထိ 12-5-2011 သိုၵ်းမၢၼ်ႈ တပ်ႉ 579/ 576/ 569 ၼိုင်ႈ တပ်ႉလႂ်ဢဵၼ်ႁႅင်းမွၵ်ႈ 30 တိၺွပ်းၶျေႃးထူဝ်ႈၵူၼ်းဝၢၼ်ႈၵုၼ်မူင်ႈ ၼိုင်ႈလမ်းသေ ၵႂႃႇပႂ်ႉဝႆႉၸွမ်းတၢင်းၵႃး ဢၼ်လုၵ်ႉၵဵင်းတွင်း ၵႂႃႇၸူး ဝဵင်းမႂ်ႇၶူဝ်လမ်။ ၸိူဝ်းၶဝ်ယူႇဝႆႉပဵၼ်တီႈ ၼိုင်ႈတီႈယူႇမွၵ်ႈ 5-6 ၵေႃႉ ၽွင်းပဵၼ်ပၢင်တိုၵ်းၵၼ် သုၵ်ႉသၵ်ႉၼႆႉ သမ်ႉၶျေႃးလူတ်ႉၶိူင်ႈၵူၼ်းဝၢၼ်ႈ ၼမ်ႉဢုၼ်ႇ တႃႇႁႃႈဝၢၼ်ႈ၊ ၼိုင်ႈဝၢၼ်ႈၼိုင်ႈဝူင်ႈ လူတ်ႉၶိူင်ႈသၢမ်ၵၼ်း ႁႂ်ႈယူႇဝႆႉၸွမ်းၶဝ်။

ပေႃးလူဝ်ႇၸႂ်ႉႁႂ်ႈတူဝ်ႈတၼ်းဝႆႉတႃႇသေႇ။ ပေႃးၵႂႃႇ ၸွမ်း ဝၢၼ်ႈၼွၵ်ႈသမ်ႉတီႉၺွပ်းဢဝ်ၵူၼ်းဝၢၼ်ႈသူင်ႇတၢင်းႁႂ်ႈၵႂႃႇဢွၼ် တၢင်းၶဝ်မွၵ်ႈသီႇ ႁႃႈဝႃးသေ သိုၵ်းၶဝ်ၸင်ႇၵွႆႈတၢမ်းၵႂႃႇၸွမ်းတၢင်းလင် ၼႆယဝ်ႉ။

ၵူၼ်းဝၢၼ်ႈဢၼ်ထုၵ်ႇသိုၵ်းမၢၼ်ႈ တီႉၺွပ်း ပဵၼ်ၵူၼ်းဝၢၼ်ႈၼွင်ၶမ်း၊ မၢၵ်ႇလၢင်း လွႆသၢႆး ၸိူဝ်းၼႆႉ။ ၽႅၼ်ၵၢၼ်သိုၵ်းမၢၼ်ႈ ၵၢင်ဢဝ်ၵူၼ်းမိူင်း ယူႇၸမ်ၸွမ်းၶဝ်ၼႆႉ ပိူဝ်ႈတႃႇဢဝ်ၵူၼ်းမိူင်းႁဵတ်းႁူဝ်ႉ ႁဵတ်းသိူဝ်ႈႁေႃႇ ၶဝ်။ သင်ပဵၼ်ပၢင်တိုၵ်း ယဵပ်ႇမၢၵ်ႇ ၽႃႇမၢၵ်ႇၸိူဝ်းၼႆႉႁႂ်ႈၵူၼ်းမိူင်းၺႃး ၵိၼ် ဢွၼ်တၢင်း ၼၼ်ႉယဝ်ႉၼႆ။

ထႅင်ႈလၢႆးၼိုင်ႈပေႃးၸုမ်းသိုၵ်းတႆးႁၼ်ၵူၼ်းမိူင်းယူႇၸွမ်းၶဝ်သိုၵ်းတႆး တေဢမ်ႇၶႂ်ႈယိုဝ်းလႄႈ ၼႆႉလႅပ်ႈ ပဵၼ်ၽႅၼ်ၵၢၼ်ၶဝ်၊ ၵွပ်ႈၶဝ်ၵမ်းၵမ်း ၽႃႇမၢၵ်ႇ ယဵပ်ႇမၢၵ်ႇ ၵႆႉၵႆႉၺႃးသိုၵ်းတႆးမူၵ်းယိုဝ်း ၸိူဝ်းၼႆႉ ဝႃႈၼႆယဝ်ႉ။

ၵူၼ်းၼႂ်းပိုၼ်ႉတီႈလၢတ်ႈဝႃႈ “ဢၼ်ၵူၼ်းမိူင်းဢမ်ႇလိူဝ်လႆႈလႄႈလႆႈ ထုၵ်ႇသိုၵ်းမၢၼ်ႈ တဵၵ်းတဵင်ၸိူဝ်းၼႆႉၼႆႉၵူၼ်းမိူင်းဢွၼ်ၵၼ်လွမ်ၵူဝ် မိူၼ်ပွတ်းတၢင်းတၢင်ႉယၢၼ်း ဢၼ်ၵူၼ်း ႁၢပ်ႇၶျေႃး ထုၵ်ႇယိုဝ်းတၢႆ ၼႂ်းပၢင်တိုၵ်း၊ ယွၼ်ႉၼၼ်မိူဝ်ႈလဵဝ်ၵူၼ်းမိူင်းဢွၼ်ၵၼ် ပၢႆႈယွတ်း ယွတ်း ယႅတ်းယႅတ်း ဝၢၼ်ႈၼမ်ႉႁူးတႄႉႁၢမ်းယဝ်ႉ။ ဝၢၼ်ႈဢၼ်တေ ႁၢမ်းထႅင်ႈတႄႉ တေမီးဝၢၼ်ႈၼႃးပူင်း၊ ဝၢၼ်ႈၼႃးၵႄႉဝၢၼ်ႈၸိူဝ်းၼႆႉ ပဵၼ်ၼႂ်းၼႃႈလိၼ်ၵဵင်းတွင်း” ဝႃႈၼႆယဝ်ႉ။