ၶၢဝ်ႇမိူင်းတႆး

ၸၢႆး​ၼၼ်ႇ​တႃႇ ၵေႃႉ​ဢွၼ်​ႁၵ်ႉ​သႃ ဝတ်ႉ​ပႃႇ​ပဝ်ႈ​ဝႆႉ​ၽွင်း​သုၵ်ႉ​သၵ်ႉ​သဵင်ႈ​ၵၢမ်ႇ

ၸၢႆး​ၼၼ်ႇ​တႃႇ ၶမ်း​လီ ၵေႃႉ​ဢွၼ်​ႁၵ်ႉ​သႃ​ဝတ်ႉ​ပႃႇ​ပဝ်ႈ ၵဵင်း​မႆႇ​ဝႆႉ​ၽွင်း​သုၵ်ႉ​သၵ်ႉ​သဵင်ႈ​ၵၢမ်ႇ​မိူဝ်ႈ​ဝၼ်း​ထီႉ 8.1. 2011 ၶၢဝ်း​ယၢမ်း 4:00 မူင်း။

ၸၢႆး​ၼၼ်ႇ​တႃႇ ၶမ်း​လီ​ဢႃ​ယု 51 ပီ လႆႈ​သဵင်ႈ​ၵၢမ်ႇ​ယွၼ်ႉ​တၢင်း​ပဵၼ်​ၵႅၼ်ႊ​သႃႊ ၵူင်​ၶေႃး။ တေ​ပူၼ်ႉ​ၶၢပ်ႈ​တူဝ် ၼႂ်း​ဝၼ်း ထီႉ 11. 1. 2011 မိူဝ်ႈ​ၼႆႉ။ မိူဝ်ႈ​ဢွၼ်​တၢင်း​မၼ်း​ၸၢႆး​ယၢမ်ႈ​ပဵၼ်​ၽူႈ​ၸတ်း​လၢႆး​ၵၢၼ်​ရေႊ​တီႊ​ယူဝ်ႊ ပၼ်​တၢင်း ႁူႉ ၵႅမ်​တူဝ် တီႈ​မူႇ​လိ​ၼိ​ထိ​မႅပ်ႇ လႄႈ ပွႆႇ​ဢွၵ်ႇ​တီႈ​သေႃ​ဝေႃး​ထေႃး​ၵဵင်း​မႆႇ สวท (สถานีวิทยุกระจายเสียงแห่งประเทศไทย จังหวัดเชียงใหม่)။

ၸဝ်ႈ​ၶူး​ဢိၼ်း​တႃး ဢမ်ႇ​ၼၼ် ၸဝ်ႈ​ၽ​ရႃႉ​ၶူး ဢ​မွၼ်ႊ​ဝီႊ​ရ​ၶုၼ်ႊ သြႃႇ​ၸဝ်ႈ​ဝတ်ႉ​ပႃႇ​ပဝ်ႉ မိူဝ်ႈ​လဵဝ် လၢတ်ႈ​ဝႃႈ “ လႆႈ​သူင်ႇ​မုၼ်​ၸၢင်း​တႃႇ​ႁႃႈ​ပႃးႁႂ်ႈ​မႃး​ၼင်ႈ​ဝတ်ႉ။ မိူဝ်ႈ​ၽွင်း​ၼၼ်ႉ ဝတ်ႉ​ပႃႇ​ပဝ်ႉ​ၼႆႉ မၼ်း သုၵ်ႉ​သၵ်ႉ​ၼႃႇ။ တီႈ ဝတ်ႉ​ၼႆႉ မီး​ပၼ်​ႁႃ မုၼ်​ၸဝ်ႈ​ယူၼ်း​လႄႈ မုၼ်​ၸဝ်ႈ​မၢၼ်ႈ​ၽိတ်း​ၵၼ်​သေ ႁွင်ႉ​ၶိုၼ်ႈ​သၢၼ်(လုမ်း​တြႃး)။တႃႇ​သီႇ ပႃး​တႄႉ ယူႇ​ဢမ်ႇ​လႆႈ​လႄႈ ထၢၵ်ႈ​သေ​ပွၵ်ႈ​မိူဝ်း​ၶိုၼ်း။ ဝၢႆး​လိုၼ်း ၵိုတ်း​ၸဝ်ႈ​ၸၢင်း ၼၼ်ႇ​တႃ (ၸၢႆး ၼၼ်ႇ​တႃႇ) ၵူၺ်း​သိုပ်ႇ​ယူႇ​တီႈ​ဝတ်ႉ​ပႃႇ​ပဝ်ႉ။ ဝၢႆး​ၼၼ်ႉ မုၼ်​ၸဝ်ႈ ယူၼ်း​လႄႈ မုၼ်​ၸဝ်ႈ​မၢၼ်ႈ​ၶဝ်​ၸိူဝ်း​ၼၼ်ႉ​ၵေႃႈ​လႆႈ​ဢွၵ်ႇ သေ ၸဝ်ႈ​ၸၢင်း​ၼၼ်ႇ​တႃႇ (ၸၢႆး​ၼၼ်ႇ​တႃႇ)ၵူၺ်း​သိုပ်ႇ​ၼင်ႈ​ဝတ်ႉ​ဝႆႉ ပႂ်ႉ​ပႃး​ႁၵ်ႉ​သႃ​မႃး” ဝႃႈ​ၼႆ။

ပၢႆး​ပ​ၺႃႇ (ၸၢႆး​ၼၼ်ႇ​တႃႇ) -
လႆႈ​ၼုင်ႈ​သၢင်ႇ​ၵၢၼ်း​မိူဝ်ႈ​ဢႃ​ယု 12 ၶူပ်ႇ ႁဵၼ်း​ဢဝ်​လိၵ်ႈ​တီႈ​ဝတ်ႉ ၸ​လၢႆး​ၶုမ်ႇ 2 ပီႊ ဝၢႆး​သေ​ၼၼ်ႉ​ၶၢႆႉ​မႃး​ယူႇ တီႈ​ဝတ်ႉ​လတ်ႈ​ၼႄႉ ဢိူင်ႇ​ၼႃး​ဝွၼ် မိူင်း​ပၼ်ႇ ထိုင်​ဢႃ​ယု 20 ၶူပ်ႇ။ ၼုင်ႈ​ၸၢင်း တီႈ​ဝတ်ႉ ၼွင်​ပႃ​မူၼ်ႇ​ဢိူင်ႇ ၼႃး​လေႃး မိူင်း​ပၼ်ႇ။ ဝၢႆး​ၼၼ်ႉ 2 ပီႊ ၶဝ်ႈ​မႃး​ယူႇ​တီႉ​ဝတ်ႉ​ၾႃႉ ဝဵင်း​ဢိၼ်း ဝၢၼ်ႈ​လၵ်း​တႅင်ႇ​ဢိူင်ႇ​ပဵင်း လူင် ၸေႈ​ဝဵင်း ဝဵင်း​ႁႅင် ၸေႈ​တွၼ်ႈ​ၵဵင်း​မႆႇ 5 ပီႊ ယဝ်ႉ​ၶဝ်ႈ​မႃး​ယူႇ ဝတ်ႉ​ပႃႇ​ပဝ်ႉ ဝဵင်း​ၵဵင်းမႂ်ႇ​မိူဝ်ႈ​ပီႊ 1979 ထိုင် 1988 ၶၢဝ်း​တၢင်း 9 ပီႊ။

ၸၢႆး​ၼၼ်ႇ​တႃႇ​ၽွင်း​တိုၵ်ႉ​ပဵၼ်​ၸဝ်ႈ​ၸၢင်း​ၼင်ႈ​ဝတ်ႉ​ပႃႇ​ပဝ်ႉ​ယူႇ​ၼၼ်ႉ လႆႈ​ႁပ်ႉဝႂ်​ယွင်ႈ​ယေႃး​လွင်ႈ​ၾိင်ႈ ငႄႈ ၾိင်ႈ​ထုင်း​တီႈ​ၸၼ်ႉ​ၸွမ်​လႃး​သႃ​ၽတ်း ၵဵင်း​မႆႇ သေ ဝၢႆး​ၼၼ်ႉ​လႆႈ​လဵပ်ႈ​ႁဵၼ်း​ပၢႆး​သြႃႇ​မေႃ ပေႇ​တၢင်ႇ​ၵႃႇ​လႃး ဝႃႈ​ၼႆ။

ၸဝ်ႈ​ၸၢင်း​ၼၼ်ႇ​တႃႇ​ၼင်ႈ​ဝတ်ႉ​ပႃႇ​ပဝ်ႉ​ၶၢဝ်း​တၢင်း​တႃႇ 9 ပီႊ​ယဝ်ႉ​လႆႈ​ထၢၵ်ႈ​လူင်း ၼုင်ႈ​ၶူဝ်း​ၵူၼ်း​ႁိူၼ်း၊ ႁဵတ်း ၵၢၼ်​ႁပ်ႉ​ၸၢင်ႈ။ ၸၢႆး​ၼၼ်ႇ​တႃႇ ပဵၼ်​ၵူၼ်း​ၸႃႇ​တိ​ဝၢၼ်ႈ​ၵုၼ်​သၢႆး ဢိူင်ႇ​ဝၢၼ်ႈ​ထီႇ မိူင်း​လၢႆး​ၶႃႈ ။ ပေႃႈ​ၸိုဝ်ႈ​လုင်း သႅင်​ႁိူင်း မႄႈ​ၸိုဝ်ႈ​ပႃႈ​ၵူႇ။ မီး​ပီႈ​ၼွင်ႉ​ႁူမ်ႈ​တွင်ႉ​ၵၼ် 8 ၵေႃႉ ၸၢႆး​ၼၼ်ႇ​တႃႇ​ပဵၼ်​ၵေႃႉ​ထီႉ 2 ဝႃႈ​ၼႆ။