ၶၢဝ်ႇလုမ်ႈၾႃႉ

ဢ​မေႊ​ရိ​ၵၢၼ်ႊ ဢင်း​ၵိတ်ႉ ႁူမ်ႈ​ၵၼ်​ႁၢမ်ႈ ဢိတ်ႉသ်​ရႃႊ​ဢဵဝ်လ် တိုၵ်း​မိူင်း​ဢီႊ​ရၢၼ်ႊ

မိူဝ်ႈဝၼ်းထိ 20.02.2012 ပူၼ်ႉ​မႃး​ၸုမ်း​ၶၢဝ်ႇ​ၼွၵ်ႈ​မိူင်း​လၢႆး​ငၢၼ်း​တီႈ ဝဵင်း​လူင်​ဝႃႊ​သျိၼ်ႊ​တၼ်ႊ ၸိုင်ႈ​မိူင်း​ႁူမ်ႈ​တုမ် ဢ​မေႊ​ရိ​ၵၢၼ်ႊ​ဝႃႈ ၸဝ်ႈ​ၼႃႈ​တီႈ​ၽူႈ​မီး​ၸၼ်ႉ​တပ်ႉ​သိုၵ်း​ဢ​မေႊ​ရိ​ၵၢၼ်ႊ ဢွၵ်ႇ ၶေႃႈ ပိုၼ်​ၽၢဝ်ႇ​တုၵ်း​ယွၼ်းႁႂ်ႈ မိူင်း ၵိုတ်း​ၵၢၼ်​ၶဝ်ႈ​တိုၵ်း​ႁူင်း​ငၢၼ်း​ႁဵတ်း​ဢွၵ်ႇ မၢၵ်ႇ​ၼိဝ်ႊ​ၶ​လီႊ​ယႃႊ ၼႂ်း​မိူင်း​ဢီႊ​ရၢၼ်ႊ သေ​လၢတ်ႈ​ထိုင်​ဝႃႈ ဢိတ်ႉသ်​ရႃး ဢဵဝ်လ် လွင်ႈ​ႁဵတ်း​ၸိူင်ႉ​ၼၼ် ၼၼ်ႉ မၼ်း​ဝႆး​ပူၼ်ႉ​လႄႈ တေ​ၸၢင်ႈ​ႁဵတ်းႁႂ်ႈ​လွင်ႈ​သုၵ်ႉ​ယုင်ႈ​ထိုင်​ၸၼ်ႉၼႂ်း​ပိုၼ်ႉ​တီႈ ပွတ်း​ဢွၵ်ႇ​ၵၢင် (Middle East) ၼႆ။

ၸွမ်​သိုၵ်း​လူင် မႃႊလ်​တိၼ်ႊ တဵမ်းပ်​သီးယ် ၽူႈ​ၼင်ႈ​ၸိုင်ႈ ၸုမ်း​ၽူႈ​ဢွၼ်​ႁူဝ်​သိုၵ်း ဢ​မေႊ​ရိ​ၵၢၼ်ႊ (United State Joint Chiefs of Staff) ပိုတ်ႇ​လၢတ်ႈ​တီႈ​ၸုမ်း​ၶၢဝ်ႇ CNN ဝႃႈ ၵၢၼ်​ၶဝ်ႈ​တိုၵ်း​မိူင်း ဢီႊ​ရၢၼ်ႊ ၼၼ်ႉ တေ​ၸၢင်ႈ​ၵိုတ်း လိုဝ်ႈ ၵၢၼ်​ႁဵတ်း​ဢွၵ်ႇ​မၢၵ်ႇ​ၼိဝ်ႊ​ၶ​လီႊ​ယႃႊ ၶွင်​ဢီႊ​ရၢၼ်ႊ​လႆႈ ၶၢဝ်း​ပွတ်း​ၵူၺ်း​လႄႈ​တေ​ၸၢင်ႈ​ပဵၼ်​ၸိူဝ်ႉ​ၾႆး ဢၼ် ႁဵတ်း ႁႂ်ႈ​ၾၢႆႇ​ဢီႊ​ရၢၼ်ႊ တွပ်ႇ​တႅၼ်း​ၶိုၼ်း တေႃႇ ပေႃး​ပဵၼ်​ပၢင်​တိုၵ်း​ၼင်ႇ​ယၢမ်ႈ​ပဵၼ်​မႃးၼႂ်း​မိူင်း​ဢၢပ်ႉၾ်​ၵၢၼ်ႊ ၼိတ်ႉ သ်​ထၢၼ်ႊ လႄႈ ဢီႊ​ရၵ်ႊ လူး​ၵွၼ်ႇ ဝႃႈ​ၼႆ။

လွင်ႈ​ထတ်း​သၢင် ၸွမ်​သိုၵ်း​လူင် မႃႊလ်​တိၼ်ႊ တဵမ်းပ်​သီးယ် ဢွၵ်ႇ​မႃး​ဝၢႆး​သေ ၸဝ်ႈ​ၼႃႈ​တီႈ​ၸၼ်ႉ သုင်​ၽၢႆႇ​ႁူမ်ႇ​လူမ်ႈ ဢ​မေႊ​ရိ​ၵၢၼ်ႊ မီး​တိုဝ်ႉ​တၢင်း​ၶဝ်ႈ​ဢုပ်ႇ​ဢူဝ်း​ၸွမ်း​ၸွမ်​ၽွင်း​လူင် ပဵၼ်ႊ​ၸျႃႊ မိၼ်ႊ ၼေႊ​ထၼ်ႊ​ယႃႊ​ႁူး မိူင်း​ဢိတ်ႉ သ်​ရႃး​ဢဵဝ်လ် ၵဵဝ်ႇ​လူၺ်ႈ​လွင်ႈ​ဢီႊ​ရၢၼ်ႊ ၽွင်း​ၶၢဝ်း​တၢင်း သူႇၸႂ်း​မိူင်း​ဢ​မေႊ​ရိ​ၵၢၼ်ႊ ၼႆ​ယဝ်ႉ။

ၽွင်း​လဵဝ်​ၵၼ် ဝိဝ်ႊလ်​လဵမ်ႊ​ႁဵၵ်ႊ ၽွင်း​လူင်​ၾၢႆႇ​ၼွၵ်ႈ​မိူင်း ဢင်း​ၵိတ်ႉ​ၵေႃႈ​လၢတ်ႈ​တီႈ ထီႊ​ဝီႊ ပီႊ⁠ပီႊ​သီႊ (BBC) ဝႃႈ တေ​သၢၼ်​ၶတ်း​ၽႅၼ်​ၵၢၼ်​ၽၢႆႇ​သိုၵ်း ၶွင်​ဢိတ်သ်​ရႃး​ဢဵဝ်လ်ၼႂ်း​ပွၵ်ႈ​ၼႆႉ မိူၼ်​ၵၼ်။ တေ​တုၵ်း​ယွၼ်းႁႂ်ႈ ဢိတ်ႉသ်​ရႃး ဢဵဝ်လ်​ဝူၼ်ႉ​ထိုင် ၽွၼ်း​လီ​ၸိူဝ်း​ၵဵဝ်ႇ​လူၺ်ႈ​ၶေႃႈ တူၵ်း​လူင်း ၾၢႆႇ​ပၢႆး​မၢၵ်ႈ​မီး လႄႈ ငဝ်း​လၢႆး​ၵၢၼ်​ၽွင်း​တၢင်​ႁူမ်ႈ​ထိုင် ၵၢၼ်​ႁၢင်ႈ​ႁႅၼ်း​တႃႇ​ဢုပ်ႇ ဢူဝ်း​ၸွမ်း​ဢီႊ​ရၢၼ်ႊ ဝႃႈ​ၼႆ​ယဝ်ႉ။