ၶၢဝ်ႇလုမ်ႈၾႃႉ

တၢင်းပဵၼ် လွတ်ႇယဵဝ်ႈၸဵပ်း

တၢင်းပဵၼ်ဢၼ်ၼႆႉ ၼႂ်းၼၢင်းယိင်းလႄႈလုၵ်ႈဢွၼ်ႇ ထူပ်းၼမ်လိူဝ်ပိူၼ်ႈ ၼၢင်းယိင်းမီးတိုဝ်ႉတၢင်း ပဵၼ်တၢင်း ပဵၼ်ၼမ်လိူဝ်ၽူႈၸၢႆး 10 – 8 ပုၼ်ႈ။ 1 ၼႂ်း 5 ၼၢင်းယိင်းယၢမ်ႈပဵၼ်တၢင်းပဵၼ်ဢၼ်ၼႆႉ။

လွင်ႈပဵၼ်မႃးတၢင်းပဵၼ်ဢၼ်ၼႆႉ

ပဵၼ်ယွၼ်ႉၸပ်းၸိူဝ်ႉမႅင်းတၢင်းလွတ်ႇဢႁႃႇရ လႄႈ လွတ်ႇၽၢႆႈလူင် သေႁဵတ်းႁႂ်ႈၸိူဝ်ႉမႅင်းတၢင်းပဵၼ်လၢမ်းမႃးၸွမ်း လွတ်ႇယဵဝ်ႈသေ လၢမ်းၶဝ်ႈၵႂႃႇၼႂ်းႁူင်းယဵဝ်ႈၼၼ်ႉယဝ်ႉ။ သင်ၸိူဝ်ႉဝႃႈဢမ်ႇလႆႈယူတ်းယႃၸွမ်းၵမ်း လဵဝ်ၸိုင်ၸိူဝ်ႉ တၢင်းပဵၼ်ၼၼ်ႉတေလၢမ်းၶဝ်ႈထိုင်လွတ်ႇမၢၵ်ႇလၼ်းတင်းသွင်ဢၼ်ၼႆယဝ်ႉ။

တၢင်းပဵၼ်ဢၼ်ၼႆႉ ၼၢင်းယိင်းတေပဵၼ်လႆႈငၢႆႈလိူဝ်ၽူႈၸၢႆး ယွၼ်ႉဝႃႈၼၢင်းယိင်းမီးတေႃႈလွတ်ႇယဵဝ်ႈပွတ်းလိူဝ် ၽူႈၸၢႆးၵူၺ်းဢမ်ႇၵႃး ယွၼ်ႉႁူးၽၢႆႈလူင်လႄႈႁူးဢင်ႇၵႃႇၼၢင်းယိင်းၸမ်ၵၼ်ၼၼ်ႉၵေႃႈ ပႃးသေႁဵတ်းႁႂ်ႈၸိူဝ်ႉမႅင်း တၢင်းပဵၼ်လၢမ်းၽေႉငၢႆႈၼၼ်ႉယဝ်ႉ။

လွင်ႈယူတ်းယႃ
• ၸိူဝ်းပႆႇပဵၼ်ႁိုင်လႄႈ ဢမ်ႇမီးငဝ်းလၢႆး လူမ်းၼၢဝ်သုင်၊ ဢႅဝ်ၸဵပ်းၼၼ်ႉ မေႃၶဝ်တေပၼ်ၵိၼ် ယႃႈယႃ trime -thoprim/ sulfamethoxazole,amoxicillin, ampicillin, ofloxacin,norfloxacin,ciprofloxacin ၸိူဝ်း ၼႆႉတူၺ်းၵွၼ်ႇ။ ၵမ်ႉၼမ် 1-2 ဝၼ်းၵူၺ်းၵေႃႈၸၢင်ႈႁၢႆၶႅၼ်းလႆႈယူႇ ၵူၺ်းၵႃႈၼင်ႇႁိုဝ်ပေႃးတေႁႂ်ႈ မၼ်းႁၢႆၶၢတ်ႇ လႆႈၼၼ်ႉ မေႃၶဝ်တေသင်ႇႁႂ်ႈၵိၼ်ယႃႈယႃမွၵ်ႈ 7 ဝၼ်း။

• ပေႃးပဵၼ်တၢင်းပဵၼ်ဢၼ်ၼႆႉသေ မီးလူမ်းၼၢဝ်သုင်လႄႈဢႅဝ်ၸဵပ်းၼၼ်ႉ မေႃၶဝ်တေသင်ႇႁႂ်ႈ ၼွၼ်းယူတ်းယႃ ဝႆႉတီႈႁူင်းယႃသေ လွၵ်းလၢႆးပၼ်ယႃၼၼ်ႉ မေႃၶဝ်တေသမ်းၶဝ်ႈသဵၼ်ႈ လိူတ်ႈဢဝ်။

• ၼၢင်းယိင်းဢၼ်ၵႆႉပဵၼ်တၢင်းပဵၼ်ဢၼ်ၼႆႉ ပဵၼ်မွၵ်ႈ 1 ပီ 3 ပွၵ်ႈ ယူႇထႅင်ႈလၢႆလိူၼ်ၵူၺ်းၵေႃႈ တေပဵၼ်ၶိုၼ်း ယဝ်ႉ။ ယွၼ်ႉၼၼ်ၼင်ႇႁိုဝ်တေဢမ်ႇပဵၼ်ၶိုၼ်း ၼၼ်ႉ ထုၵ်ႇလီႁႄႉၵင်ႈၸွမ်း ၼင်ႇၵိၼ်ယႃ trimethoprim /sulfamethoxazole  ၶၢဝ်းတၢင်း ႁူၵ်းလိူၼ်။


လွၵ်းလၢႆးႁႄႉၵင်ႈၼင်ႇႁိုဝ်တေဢမ်ႇပဵၼ်တၢင်းပဵၼ်ဢၼ်ၼႆႉၶိုၼ်း
• ၵိၼ်ၼမ်ႉၼမ်ၼမ်
• ႁၢမ်ႈယိူၼ်ႉၵၼ်ႈယဵဝ်ႈ
• ႁႂ်ႈၸဵတ်ႉၵူၼ်ႈတၢင်းၼႃႈၵႂႃႇတၢင်းလင်
• ႁဵတ်းလွင်ႈမူတ်းသႂ်ဢင်ႇၵႃႇမိူဝ်ႈတေႁူမ်ႈၵႃႇမလႄႈဝၢႆးႁူမ်ႈၵႃႇမ
• တၢင်းပဵၼ်ဢၼ်ၼႆႉဢမ်ႇၸၢင်ႈၽႄႈၸပ်းၵေႃႉၼိုင်ႈထိုင်ၵေႃႉၼိုင်ႈလႆႈ