ၶၢဝ်ႇလုမ်ႈၾႃႉ

သိုၵ်းမၢၼ်ႈဢဝ်ၵူၼ်းမိူင်း ၶႄတူဝ် ၽွင်းတေႃႉၵူၼ်းမၢတ်ႇ

သိုၵ်းမၢၼ်ႈၶလယ 143 ဢဝ်ၵူၼ်းမၢတ်ႇၶဝ်တီႈၽၢႆႁိၼ်လၢႆးမိူဝ်းတၢင်းၵေးသီး၊ ၺွပ်းဢဝ်ၵူၼ်းမိူင်းၸိူဝ်းၼွၼ်းႁႆႈ ၼွၼ်းၵၢၼ် တၢင်းၸၢၼ်းဝၢၼ်ႈၽုၺ်းမွၵ်ႈ 30 ၵေႃႉႁဵတ်းပဵၼ်ၶိူင်ႈၶႄတူဝ်ၶဝ်မိူဝ်းၼႆလႅင်ႇၶၢဝ်ႇ ပွင်ႇမႃး။

မိူဝ်ႈဝၼ်းထိ 16/08/2011 ပူၼ်ႉမႃးၼႆႉသိုၵ်းမၢၼ်ႈတပ်ႉၶလယ 143 လုၵ်ႉတီႈပၢင်တိုၵ်းၽၢႆႁိၼ်လၢႆးသေဢဝ် ၵူၼ်းမၢတ်ႇၶဝ်မိူဝ်းတၢင်းၵေးသီး။ ၽွင်းတေႃႉၵူၼ်းမၢတ်ႇၶဝ်မိူဝ်းၼၼ်ႉ သိုၵ်းမၢၼ်ႈတိၺွပ်းဢဝ်ၵူၼ်းမိူင်းၸိူဝ်း ၼွၼ်းႁႆႈၼွၼ်းၵၢၼ် တၢင်းၸၢၼ်းဝၢၼ်ႈၽုၺ်း ဢမ်ႇယွမ်း 30 ၵေႃႉၸွမ်ႇၵႄႈၶဝ်မိူဝ်း ၸိူင်ႉၼင်ႇသိုၵ်းမၢၼ်ႈ ၼိုင်ႈၵေႃႉ ဢဝ်ၵူၼ်းမိူင်းသွင်ၵေႃႉၶႄတူဝ်ၶဝ်မိူဝ်း ၸိူဝ်းၼႆႉၼႆယဝ်ႉ။

လႅင်ႇၶၢဝ်ႇလၢတ်ႈဝႃႈ “ ၽိူဝ်ႇမိူဝ်းၽႅဝ်ဝၢၼ်ႈၼွင်ၵႃး ၶိုၼ်းမိူဝ်းဢဝ်လုၵ်ႈႁဵၼ်းၸွမ်ႇၵႄႈၶဝ်မိူဝ်းၸွမ်းထႅင်ႈ၊ ဝၢၼ်ႈ ၼွင်ၵႃးၼႆႉမီးၽၢႆႇႁွင်ႇဝဵင်းၵေးသီး ယၢၼ်ၵႆၵၼ်မွၵ်ႈ 3 လၵ်း” ဝႃႈၼႆယဝ်ႉ။

သိုပ်ႇလၢတ်ႈဝႃႈ လိူဝ်သေလွင်ႈဢဝ်ၵူၼ်းမိူင်းႁဵတ်းၶိူင်ႈမိုဝ်းယဝ်ႉသိုၵ်းမၢၼ်ႈၸိူဝ်းတူင်ႉၼိုင်ၼႂ်း ၼႃႈသိုၵ်း ၸိူဝ်းၼႆႉ ၵႆႉဢဝ်လူတ်ႉဢဝ်ၵႃးၵူၼ်းမိူင်းၸႂ်ႉပဵၼ်ၶိူင်ႈမိုဝ်း ႁေႉႁၢမ်ႈလွင်ႈသိုၵ်းတႆးပိုတ်းယိုဝ်း ၶဝ်သေ ၵူၼ်းမိူင်းၼႂ်းၼႃႈတီႈ ၸိူဝ်းပဵၼ်သိုၵ်းၸိူဝ်းၼႆႉ ၵူဝ်ႁေလွင်ႈသိုၵ်းမၢၼ်ႈၶျေႃးလူတ်ႉ၊ ၶျေႃးၵႃး။ ၸႂ်ႉသူင်ႇ တၢင်းၵိၼ်တၢင်းယမ်ႉ၊ တေႃႉတၢင်ႇ သူင်ႇ ၶူဝ်းၶဝ်လႄႈၸႂ်ႉၵႂႃႇၸွမ်းၶဝ်တေႉတေႉ ဝႃႈၼႆယဝ်ႉ။

ၵဵဝ်ႇလူၺ်ႈလွင်ႈပၢင်တိုၵ်းၼႆႉ တၢင်းၶၢဝ်ႇၽူႈတွႆႇႁွၵ်ႈမိူင်းလွႆၵေႃႈဢွၵ်ႇၶၢဝ်ႇမိူဝ်ႈဝႃးဝႃႈ သိုၵ်းမၢၼ်ႈၶဝ်ႈ ယိုတ်းတပ်ႉ သိုၵ်းၸိုင်ႈတႆး ဢၼ်ဢဝ်ႁူမ်ႇလူမ်ႈၽၢႆႁိၼ်လၢႆး ဢၼ်တပ်ႉသိုၵ်းၸိုင်ႈတႆး SSPP/SSA ၶဝ်ၵေႃႇသၢင်ႈပၼ်ၵူၼ်း မိူင်းၽုၵ်ႇသွမ်ႈ ၸႂ်ႉတိုဝ်းမႃးၽွင်းၵိုတ်းသိုၵ်း၊ ၽွင်းသိုၵ်းမၢၼ်ႈပႆႇ ပိုတ်ႇၼႃႈ သိုၵ်းတေႃႇတပ်ႉသိုၵ်းၸိုင်ႈတႆး ဝႃႈၼႆယဝ်ႉ။

သိုဝ်ႇႁႅင်းၼုမ်ႇ