ၶၢဝ်ႇလုမ်ႈၾႃႉ

ၽူႈဢွၼ်ႁူဝ် တပ်ႉသိုၵ်းသၢၼ်ၶတ်း ဝႃႈ တေၽဵဝ်ႈ ၵတ်ႉတႃႊၾိ လႆႈၼႂ်းသဵင်ႈလိူၼ်ၼႆႉ

ၽူႈဢွၼ်ႁူဝ်တပ်ႉသိုၵ်း ၽၢႆႇသၢၼ်ၶၢတ်းလူင်ပွင်ၸိုင်ႈလိပီးယႃးဝႃႈ တေၸၢင်ႈၽဵဝ်ႈသိမ်း ဢႃႇၼႃႇၶွင် ၸဝ်ႈသိုၵ်း လူင်မူးဢမ်ႊမႃႊလ် ၵတ်ႉတႃႊၾိ ၽူႈဢွၼ်ႁူဝ်လိပီးယႃးလႆႈ ၼႂ်းၶၢဝ်းတၢင်းလိူၼ် ဢေႃးၵၢတ်ႉတ်ၼႆႉ၊ မီးၶၢဝ်ႇဝႃႈ ၵတ်ႉတႃႊၾိ တေတႅပ်းတတ်းပၢႆႈၽေး ၵႂႃႇယူႇၼႂ်းမိူင်း ဝေႊၼေႊသူႊဢေႊလႃး ၼႆ။

ၸုမ်းၶၢဝ်ႇၼွၵ်ႈမိူင်းလၢႆးငၢၼ်းမိူဝ်ႈဝၼ်းထိ 17.08.2010 ၼႆႉလူၺ်ႈဢိင်ၼိူဝ်ၵႂၢမ်းလၢတ်ႈၶွင် ၽူႈဢွၼ်ႁူဝ်ၸုမ်း သိုၵ်းသၢၼ်ၶတ်းလူင်ပွင်ၸိုင်ႈလိပီးယႃးဝႃႈ တပ်ႉသိုၵ်းၶွင်ၶဝ်တေၸၢင်ႈၽဵဝ်ႈ မူၺ်ႉဢႃႇၼႃႇၶွင် ၸဝ်ႈသိုၵ်းလူင် မူးဢမ်ႊမႃႊလ် ၵတ်ႉတႃႊၾိ ၽူႈဢွၼ်ႁူဝ်လိပီးယႃးလႆႈ ၼႂ်းၶၢဝ်းတၢင်းလိူၼ် ဢေႃးၵၢတ်ႉတ်ၼႆႉၼႆယဝ်ႉ။
ၽွင်းလဵဝ်ၵၼ်ၼႂ်းလၢႆးငၢၼ်းလၢတ်ႈထႅင်ႈဝႃႈ မၼ်းသူႊလ်သႃႊဢိၾ်ႉ ၼၼ်ႉသ်သိူဝ်ႊ ၽွင်းတၢင် ၶွင်ၸုမ်းသၢၼ် ၶတ်းလူင်ပွင်ၸိုင်ႈလိပီးယႃၼႂ်းမိူင်းၾရင်ႊသဵတ်ႊ လၢတ်ႈဝႃႈ “တပ်ႉသိုၵ်းၶွင်ႁဝ်း မီးယိူင်းဢၢၼ်းတေၶဝ်ႈသိမ်းဝဵင်း တရီပူဝ်ႊလီ မိူင်းလူင်ၶွင်ၸိုင်ႈမိူင်းလႄႈ ၽဵဝ်ႈသိမ်းဢႃႇၼႃႇ ၶွင် ၸဝ်ႈသိုၵ်းလူင် ၵတ်ႉတႃႊၾိ လႆႈၼႂ်းသဵင်ႈလိူၼ် ၼႆႉ ဝၢႆးလႆႈတိုၵ်းဢွင်ႇပေႉၼႂ်းၵၢၼ် ၶဝ်ႈသိမ်းမိူင်း သႃႊဝီယႃႁ် မိူင်းၼႃႈသိုၵ်းဢၼ်လမ်ႇလွင်ႈ တၢင်းပွတ်းတူၵ်း ၶွင် ဝဵင်းလူင် တရီပူဝ်ႊလီ ၼႆ။

လၢႆးငၢၼ်းလိုၼ်းသုတ်းၶွင်ၸုမ်းၶၢဝ်ႇၵွင်း ဢႅမ်ႊဢႆႊ 6 “MI6” ၶွင်မိူင်းဢင်းၵိတ်း လၢတ်ႈဝႃႈ ၸဝ်ႈသိုၵ်းလူင် မူးဢမ်ႊမႃႊလ် ၵတ်ႉတႃႊၾိ လႅပ်ႈတေတႅပ်းတတ်းပၢႆႈၽေးၵႂႃႇတီႈမိူင်း ဝေႊၼေႊသူႊဢေးလႃး ၼႂ်းၵုၼ်ဢမေႊ ရိၵၸၢၼ်း လႄႈ ယူႇတႂ်ႈဢုပ်ႉပိူင်ႇၶွင်ၸွမ်ၸိုင်ႈ ႁူးၵူဝ်ႉၶျႃဝဵတ်ႉၶျ် ဢၼ်ပဵၼ်ဢူၺ်းလီလမ်ႇလွင်ႈၶွင် ၽူႈဢွၼ်ႁူဝ် လိပီးယႃး ဝႃႈၼႆ။