ၶၢဝ်ႇလုမ်ႈၾႃႉ

လူမ်းလႅင်ႉလူင်ဢႆႊရိၼ်ႊ ပတ်ႉဢမေႊရိၵၢၼ်ႊ လူႉသုမ်း 7000 လၢၼ်ႉတေႃႊလႃႊ တၢႆ 21 ၵေႃႉ

လူမ်းလႅင်ႉလူင်ဢႆႊရိၼ်ႊ (Hurricane Irene) ဢွၼ်ႇႁႅင်းလူင်းၽွင်းပတ်ႉၶဝ်ႈသူႇ ဝဵင်းၼယူး ယွၵ်ႊယဝ်ႉ မုင်ႈၼႃႈၵႂႃႇတင်း မိူင်းၶႅၼ်ႊၼေႊတႃႊ ဝၢႆးဢဝ်သၢႆၸႂ်ၵူၼ်းမိူင်းထိုင် 21 ၵေႃႉသေ ႁဵတ်းႁႂ်ႈမီးလွင်ႈလူႉသုမ်းတီႈဢေႇသုတ်း 7000 လၢၼ်ႉဢမေႊရိၵၢၼ်ႊတေႃႊလႃႊ ၼႆ။

လူမ်းလႅင်ႉလူင်ပွၵ်ႈၼႆႉႁဵတ်းႁႂ်ႈ မီးၵူၼ်းတၢႆတီႈဢေႇသုတ်း 21 ၵေႃႉ လႄႈ ပၼ်တၢင်းယၢပ်ႇ ၽိုတ်ႇ ၵူၼ်းမိူင်းၼႂ်းပိုၼ်ႉတီႈမွၵ်ႈ 5 လၢၼ်ႉႁေႃႁိူၼ်း ဢမ်ႇမီးၾႆးၾႃႉၸႂ်ႉ ဢိၵ်ႇတင်းၼမ်ႉ ထူမ်ႈ။  လၢႆၽၢႆႇထတ်းသၢင်ဝႃႈတေလူႉသုမ်းမွၵ်ႈ 7000 လၢၼ်ႉ တေႃႊလႃႊ ဢွၼ်တၢင်းတီႈ တေဢွၼ်ႇႁႅင်းလူင်း လႄႈမုင်ႈၼႃႈသိုပ်ႇၽတ်းၵႂႃႇတီႈမိူင်းၶႅၼ်ႊၼေႊတႃႊ လူၺ်ႈႁႅင်းလူမ်း 80 ၵီႊလူဝ်ႊမီႊတိူဝ်ႊ တေႃႇၼိုင်ႈၸူဝ်ႈမူင်းဝႃႈၼႆ။

ၸွမ်ၸိုင်ႈပႃးရၵ်ႉဢူဝ်ႊပႃးမႃး မိူင်းဢမေႊရိၵၢၼ်ႊ လၢတ်ႈဝႃႈ “လွင်ႈလူႉသုမ်းယွၼ်ႉလူမ်းလႅင်ႉ ပွၵ်ႈၼႆႉပႆႇယဝ်ႉတူဝ်ႈ၊ တေလႆႈၸႂ်ႉၶၢဝ်းယၢမ်းလၢႆဝူင်ႈပိူဝ်ႈတႃႇပူၵ်းပွင်မေးသၢင်ႈ ၶိုၼ်းလွင်ႈလူႉ လႅဝ်ပွၵ်ႈၼႆႉ။ ၼမ်ႉၵေႃႈတေၸၢင်ႈထူမ်ႈၼႂ်းလႆပိုၼ်ႉတီႈ ဝၢႆးသေၼမ်ႉၼႂ်းမႄႈၼမ်ႉတေႇ လူၼ်ႉ ယွၼ်ႉၼမ်ႉၾူၼ်တီႈလူမ်းလႅင်ႉလူင်” ဝႃႈၼႆ။

ဢူဝ်ႊပႃႊမႃး ပၼ်ၶေႃႈမၼ်ႈၵႅၼ်ႇဝႃႈ လူင်ပွင်ၸိုင်ႈ တေသူင်ႇငိုၼ်းၸွႆႈလိူဝ်တႃႇပူၵ်းပွင်ၶိုၼ်း လွင်ႈလူႉသုမ်းပွၵ်ႈၼႆႉ ၼႆယဝ်ႉ။

ၸဝ်ႈၼႃႈတီႈ လႆႈၶၢႆႉၵူၼ်းမိူင်းၼႂ်းဝဵင်းၼယူးယွၵ်ႊ မွၵ်ႈ 370,000 ၵေႃႉဢွၵ်ႇပူၼ်ႉတူဝ်ဝဵင်း၊ ၸိူဝ်းဢမ်ႇပေႃးသူႈလႆႈႁၼ် ပိူဝ်ႈတႃႇႁပ်ႉမိုဝ်း လူမ်းလႅင်ႉလူင်ဢႆႊရိၼ်ႊ ပွၵ်ႈၼႆႉ ႁူမ်ႈထိုင် ပၼ်ႁႃၶူင်းသၢင်ႈတိုၵ်းႁိူၼ်းၵဝ်ႇ ၸဵမ်ၸိူဝ်းၼႆႉ။

လူမ်းလႅင်ႉလူင်ပွၵ်ႈၼႆႉႁဵတ်းႁႂ်ႈမီးၼမ်ႉထူမ်ႈလၢႆလၢႆဝဵင်းမိူၼ်ၼင်ႇ ဝဵင်းလူင် ဝႃႊၶျိၼ်ႊတၼ်ႊ တီႊသီႊ၊ ဝဵင်းမႅၼ်ႊႁတ်ႉတၼ်ႊ ၸဵမ်ၸိူဝ်းၼႆႉၵႂႃႇ ဝႃႈၼႆ။