ၶၢဝ်ႇလုမ်ႈၾႃႉ

သူႊတၢၼ်ႊပွတ်းၸၢၼ်း မီးသၢႆငၢႆ တႃႇတင်ႈမိူင်း ႁင်းၶေႃ

မိူင်းသူႊတၢၼ်ႊပွတ်းၸၢၼ်း ဢၼ်မီးပၢင်တွတ်ႈၶႅပ်းယင်ႇၵၢင်ၸႂ်ၵူၼ်းမိူင်းၼၼ်ႉ လိုၼ်းသုတ်းမီးသၢႆငၢႆတႃႇ ၽၢတ်ႇဢွၵ်ႇ တင်ႈမိူင်းႁင်းၶေႃ ပဵၼ်ၸိုင်ႈမိူင်းမႂ်ႇၼႂ်းလုမ်ႈၾႃႉထႅင်ႈ ၼႆ။

တီႈဝဵင်း ၵျႍႊပႃႊ (Jubau) ဝဵင်းလူင် မိူင်းသူႊတၢၼ်ႊပွတ်းၸၢၼ်းၼၼ်ႉ ႁူင်းတွတ်ႈၶႅပ်းၵၢင်ၸႂ်တင်းသဵင်ႈမီး 10 တီႈ ၶႅပ်းၵၢင်ၸႂ်တင်းသဵင်ႈမီး 30,000။ ၼႂ်းၸိူဝ်းၼၼ်ႉ 96 % ၵမ်ႉထႅမ် တႃႇၽၢတ်ႇဢွၵ်ႇပွတ်းႁွင်ႇၼႆ ၶၢဝ်ႇ AP ၼေဝႆႉ။

ဝၢႆးသေၵူၼ်းမိူင်းတွတ်ႈၶႅပ်းၵၢင်ၸႂ်ယဝ်ႉၵႂႃႇယဝ်ႉ ဢွၼ်တၢင်းသုတ်း သႃႊဝႃႊၵီႊ( Salva Kiir) ၸွမ်ၸိုင်ႈမိူင်း သူႊတၢၼ်ႊပွတ်းၸၢၼ်း လၢတ်ႈမိူဝ်ႈဝၼ်းတိတ်ႉမိူဝ်ႈဝႃးဝႃႈ လႆႈတုၵ်းယွၼ်းဝၢင်းၶႂၢင်ႉထိုင်ၵူၼ်းမိူင်းၸိူဝ်းလႆႈ ၶၢမ်ႈတၢင်းတုၵ်ႉယၢၵ်ႈၵူႈၸိူဝ်း မိူၼ်ၼင်ႇသိုၵ်းၵၢင်မိူင်း ဢၼ်လႆႈၵိူတ်ႇပဵၼ်မႃးၸိူဝ်းၼၼ်ႉ ဝႃႈၼႆ။

ပၢင်ယင်ႇၵၢင်ၸႂ်ၵူၼ်းမိူင်းမိူဝ်ႈလဵဝ်ၼႆႉ ပဵၼ်ၶၵ်ႉတွၼ်ၼိုင်ႈဢၼ်ၵူၼ်းမိူင်းပွတ်းႁွင်ႇ ၵမ်ႈၼမ်ၼပ်ႉထိုဝ် မူႇသလိမ်ႊ လႄႈပွတ်းၸၢၼ်း သမ်ႉၵမ်ႈၼမ် ၼပ်ႉထိုဝ် ၶရိတ်ႉ လႄႈ ၽီ၊ ၼႂ်းၵေႈသွင်ၽၢႆႇၼႆႉ ပဵၼ်ပၢင်တိုၵ်း သိုၵ်းၵၢင်မိူင်းမႃးၶၢဝ်းတၢင်း 21 ပီ ယဝ်ႉလႆႈလူင်းလၢႆးမိုဝ်း ၵိုတ်းသိုၵ်းငမ်းယဵၼ်တေႃႇၵၼ်မႃး ဝႃႈၼႆ။

ၽွၼ်းလႆႈပၢင်ယင်ႇၵၢင်ၸႂ်တေပိုၼ်ၽၢဝ်ႇၵမ်းလိုၼ်းသုတ်း ၼႂ်းဝၼ်းထိ 06.02.2011။ ၵူၼ်းမိူင်းပၼ်သၢႆမၢႆ တႃႇတွတ်ႈၶႅပ်းၵၢင်ၸႂ်ႁူဝ်ၵူၼ်းမီးၸမ်မွၵ်ႈ 4,000,000 ဝႃႈၼႆယဝ်ႉ။