ၶၢဝ်ႇလုမ်ႈၾႃႉ

ပၢင်လိူၵ်ႈတင်ႈ ပူဝ်ႊလၢၼ်ႊ Komorowski လႆႈမၢႆၼမ်

ဝၢႆးသေၼပ်ႉသွၼ်ႇ ဝႂ်မၢႆၵၢင်ၸႂ် ပၢင်လိူၵ်ႈတင်ႈ ၸွမ်ၸိုင်ႈ မိူင်းပူဝ်ႊလၢၼ်ႊ ယဝ်ႉလႆႈ ႁူႉဝႃႈ Bronislaw Komorowski လႆႈမၢႆၵၢင်ၸႂ်ၼမ်လႄႈပေႉဝႆႉယူႇၼႆ။

ပရူဝ်ႊၼိတ်ႊသ်လေႃႊ ၶူဝ်ႊမူဝ်ႊရူဝ်ႊသၶီႊ (Bronislaw Komorowski) ၼႆႉလႆႈမၢႆၵမ်ႉ ထႅမ် 54%။ ၸႃႊ ရူဝ်ႊသလေႃႊ ၶႅၵ်ႊၸိၼ်ႊသၶီႊ (Jaroslaw Kaczynski) ၸုမ်းၽၢႆႇသၢၼ်ၶတ်း ၽူႈၶေႉၶဵင်ႇမၼ်းသမ်ႉ လႆႈမၢႆၵမ်ႉထႅမ် 47% ဝႃႈၼႆယူႇ။

ဝၢႆးသေလႆႈၵဵပ်းသၢႆမၢႆ တီႈတွတ်ႈၶႅပ်းမၢႆၵၢင်ၸႂ်ယဝ်ႉ ၵမ်ၼမ်လၢတ်ႈဝႃႈ Bronislaw Komorowski ၵူၺ်း တေပေႉပၢင်လိူၵ်ႈတင်ႈ ဝႃႈၼႆ။

Mr Komorowski လၢတ်ႈဝႃႈ“ၼႂ်းမိူင်းပူဝ်ႊလၢၼ်ႊ ၼႆႉလွၵ်းပိူင်တီႊမူဝ်ႊၶရေႊသီႊ ပေႉ ၵႂႃႇယဝ်ႉ။ ၵူၺ်း တႃႇတေၸတ်းပၢင်ႁူမ်ၸူမ်းၼၼ်ႉတေလႆႈပႂ်ႉတူၺ်းတေႃႇထိုင် သၢႆမၢႆ ဢၼ်လႆႈၵမ်းလိုၼ်းသုတ်းၵွၼ်ႇ” ဝႃႈၼႆ။

မိတ်ႊသ်တိူဝ်ႊ Mr Komorowski ၼႆႉ ပဵၼ်ၽူႈတႅၼ်း ၼႂ်းၸုမ်းပႃႇတီႇ (Civic Platform Party) သေ မၼ်း ၼႆႉပဵၼ် ၽူႈဢၼ်ပၼ်ႁႅင်း တႃႇလႅၵ်ႈလၢႆလွၵ်းၵၢတ်ႇ လႄႈ ယင်းပဵၼ် ၽူႈၶဝ်ႈၸုမ်းဢူၺ်းလီၸွမ် ၸိုင်ႈမိူင်းပူဝ်ႊလၢၼ်ႊသေမေႃၶဝ်ႈဢွၵ်ႇၵူႈၽၢႆႇ ၼႆယဝ်ႉ။

Jaroslaw Kaczynski တႄႉမုင်ႈမွင်းတႃႇတေတႅၼ်းတီႈ ၸွမ်ၸိုင်ႈၵေႃႉၵဝ်ႇ Lech Kaczynski ဢၼ်ပဵၼ် ပီႈၼွင်ႉမၼ်းသေသဵင်ႈၵၢမ်ႇၵႂႃႇယွၼ်ႉ ၶိူင်ႈမိၼ်တူၵ်းၼၼ်ႉ ဝႃႈၼႆ။

ပၢင်လိူၵ်ႈတင်ႈမိူဝ်ႈပွၵ်ႈဢွၼ်တၢင်း ဢၼ်ၸတ်းၵႂႃႇၼႂ်းလိူၼ် June ပီၼႆႉၼၼ်ႉ ၽႂ်ၵေႃႈဢမ်ႇလႆႈမၢႆၵၢင် ၸႂ်ပူၼ်ႉ 50% လႄႈ ၸင်ႇလႆႈၸတ်းပၢင်လိူၵ်ႈတင်ႈ ထႅင်ႈၵမ်းၼႆႉ ၼႆယဝ်ႉ။