ဝွၵ်းသွၼ်ႈၸႂ်

ပၢင်မၢၵ်ႇၼင် FA Cup ႁွတ်ႈၽႅဝ် ႁွပ်ႈ လိုၼ်းသုတ်းယဝ်ႉ

တႃႇၼႂ်းပၢင်လိုၼ်းသုတ်း (Final) ပီၼႆႉပဵၼ်ၸုမ်း ႁိူဝ်းဝႂ်သီၾႃႉ မၢၼ်ႊၶျႅတ်ႊ သ်တိူဝ်ႊ သီႊတီႊ (Manchester City) ထူပ်း၊ ၸၢင်ႈပၼ်ႈမေႃႈ (Stoke City) ၼၼ်ႉ ၼႆယဝ်ႉ။

တႃႇတေႁွတ်ႈထိုင်သဵၼ်ႈတၢင်းႁွပ်ႈလိုၼ်းသုတ်း (Final)လႆႈၼၼ်ႉတၢင်းသွင် ၸုမ်းလႆႈထူပ်း လွင်ႈယၢပ်ႇၼၵ်းၸႂ်မႃးလၢႆႁွပ်ႈ ပိူဝ်ႈတႃႇတေမႃးႁွတ်ႈၽႅဝ် ဢွင်ႈတီႈလိုၼ်းသုတ်း။ တေႇဢဝ်ၸုမ်းဢၼ်ၼႂ်း ၽရီႊမီႊယိူဝ်ႊ လိၵ်ႊ (Premierleague )လူင်းလဵၼ်ႈပၢင် FA Cup ႁွပ်ႈ 3 ၼၼ်ႉ Manchester City လႆႈထူပ်းၵူႈၶဵင်ႇတႃႉမိူၼ်ၼင်ႇ လီႊသဵတ်ႊသ်တိူဝ်ႊ သီႊတီႊ (Leicester City) သေဢဝ် ပေႉၵႂႃႇလႆႈ 4 ၽၵ်းတူတေႃႇ 2။ ၼႂ်းႁွပ်ႈသီႇၵေႃႈဢဝ်ပေႉ ၸုမ်း ၼွတ်ႊထ်သ် ၶွၼ်ႊတီႊ (Notts County) 5 ၽၵ်းတူတေႃႇ 0၊ ၼႂ်းႁွပ်ႈ ႁႃႈၵေႃႈဢဝ်ပေႉၸုမ်း ဢႅတ်ႊသ်တွၼ်ႊ ဝီႊလႃႊ (Aston Villa) ၵႂႃႇ 3 ၽၵ်းတ ူတေႃႇ 0၊ ၼႂ်းႁွပ်ႈ 6 ၵေႃႈဢဝ်ပေႉၸုမ်း ရိတ်ႊတိင်ႊ (Reading) ၵႂႃႇၼိုင်ႈၽၵ်းတူတေႃႇ 0 လႄႈၼႂ်းႁွပ်ႈ သီႊမီႊ ၾၢႆႊၼိူဝ်ႊ (Semi Final) ၵေႃႈလႆႈမႃးလဵၼ်ႈၸွမ်းၸုမ်းၶဵၼ်ႁူမ်ႈမိူင်းမိူၼ်ၼင်ႇ မၢၼ်ႊၶျႅတ်ႊသ် တိူဝ်ႊ ယူႊၼၢႆႊတဵတ်ႊ (Manchester United) တီႈဝႅမ်ႊပလီႊ သတႃႊတီႊယမ်ႊ (Wembley Stadium) သေပွၵ်ႈၵမ်းၼႆႉပဵၼ်ၽၢႆႉပေႉၵႂႃႇ 1 ၽၵ်းတူတေႃႇ 0 ယဝ်ႉပဵၼ်ၸုမ်းဢွၼ်တၢင်း သုတ်းဢၼ်ၶဝ်ႈ ၵႂႃႇပႂ်ႉ ၼႂ်းႁွပ်ႈလိုၼ်းသုတ်း (Final) ၼၼ်ႉယဝ်ႉ။

တႃႇၸုပ်ႈဢၼ်တေမႃးတႃႉၶဵင်ႇၸုမ်း Manchester City ၼၼ်ႉၵေႃႈပဵၼ် ၸုမ်းၸၢင်ႈပၼ်ႈမေႃႈ Stoke City ဢၼ်ဢဝ်ပေႉၸုမ်း ၶႃႊတိပ်ႊၾ် သီႊတီႊ (Cardiff City) 2 ၽၵ်းတူတေႃႇ 0 ၼႂ်းႁွပ်ႈ 3၊ ဢဝ်ပေႉၸုမ်း ဝွပ်ႊဝိူဝ်ႊႁႅမ်ႊ တၼ်ႊ ဝႅၼ်ႊတိူဝ်ႊရိူဝ်ႊသ် (Wolverhampton Wanderers) လႆႈ 1 ၽၵ်းတူတေႃႇ 0 ၼႂ်းႁွပ်ႈ 4၊ ဢဝ်ပေႉၸုမ်း ဝႅတ်ႊႁႅမ်ႊ ယူႇၼၢႆႊတႅတ်ႊတ် (West Ham United) ၵႂႃႇ 2 ၽၵ်းတူတေႃႇ 1 ၼႂ်းႁွပ်ႈ6 လႄႈ ဢဝ်ပေႉၸုမ်း ပွတ်ႊလ်တၼ်ႊ ဝႅၼ်ႊတိူဝ်ႊရိူဝ်ႊသ် (Bolton Wanderers) 5 ၽၵ်းတူတေႃႇ 0 သေပဵၼ်သဵၼ်ႈတၢင်းဢၼ်ဢွၼ်ၵႂႃႇတီႈ ၵႂၢင်း Wembley Stadium ဢွင်ႈတီႈဢၼ်တေႁိမ်သျႅမ်ႇၵၼ်တၢင်း Manchester City ၼႂ်းဝၼ်းထီႉ 14 လိူၼ် 5 ပီ 2011 ၼၼ်ႉယဝ်ႉ။

ထိုင်ဝၼ်းၼၼ်ႉမႃးႁႂ်ႈဢွၼ်ၵၼ်ပႂ်ႉမုင်ႈမွင်းတူၺ်းဝႃႈ ႁိူဝ်းတေၸူမ်ၸုမ်း ၸၢင်ႈပၼ်ႈမေႃႈႁိုဝ် ဢမ်ႇၼၼ် တေပဵၼ်ၸုမ်းၸၢင်ႈပၼ်ႈမေႃႈတေသိုပ်ႇပိုၼ်း ၸႅၵ်ႉ ႁႅမ်ၽီလူး (Jack the Giant Killer) ထႅင်ႈၼႆတီႈ Wembley Stadium တေမီးၶေႃႈတွပ်ႇပၼ်ၼႂ်းဝၼ်းထီႉ 14 လိူၼ် 5 ပီ 2011ဢၼ်ပဵၼ် ဝၼ်းလဵၼ်ႈပၢင် လိုၼ်းသုတ်း (Final) ၼၼ်ႉယဝ်ႉ။