မၢၵ်ႇၼင်
Manchester City လွင်ႈလူႉသုမ်း ပၢင်ဢွၼ်တၢင်းသုတ်း
- Details
- Published on Friday, 16 December 2011 19:33
- Written by ၶီႈၾုၼ်ႇ
ဝၢႆးသေၸုမ်းဢၼ်မီးငိုၼ်းၼမ်သုတ်းလႄႈ ၽူႈလဵၼ်ႈၶိုၵ်ႉလိုၵ်ႉလိူဝ်ပိူၼ်ႈမိူၼ်ၼင်ႇ Manchester City ၵေႃႈလႆႈ လူင်းလဵၼ်ႈပၢင်မၢၵ်ႇၼင် Premierleague ၵႂႃႇတင်းမူတ်း 15 ပၢင်လႄႈ တႄႇဢဝ်ပၢင်ဢွၼ်တၢင်းတေႃႇႁွတ်ႈ ထိုင်ပၢင်ထီႉ 14 ၼၼ်ႉ ဢမ်ႇထုၵ်ႇလႆႈသုမ်းသေပၢင်ဢမ်ႇၵႃး ယင်းသိုပ်ႇပဵၼ်ၸုမ်းၼမ်းမႃး တေႃႇထိုင်ယၢမ်းလဵဝ် လႄႈ ၼႂ်းပၢင်ထီႉ 15 ၼၼ်ႉၵေႃႈလႆႈၶၢမ်ႇသုမ်းပဵၼ်ပၢင်ဢွၼ်တၢင်းသုတ်းယဝ်ႉ။
သင်မႃးတူၺ်းၶိုၼ်းလွင်ႈလႆႈလူႉသုမ်းပွၵ်ႈၵမ်းၼႆႉၼႆၸိုင် ၸင်ႈတေဝႃႈလႆႈယွၼ်ႉလူၺ်ႈလႆႈ ထူပ်းၸုမ်းယႂ်ႇၼင်ႇ ၵၼ်မိူၼ်ၼင်ႇ Chelsea ၼႆသေတႃႉၵူၺ်းပေႃးမႃးတူၺ်းၶိုၼ်းၼႆၸိုင် ၼႂ်းပၢင်ပူၼ်ႉမႃးၼၼ်ႉၵေႃႈသွၼ်ႇလႆႈဝႃႈ မီးတိုဝ်ႉ တၢင်းၼမ်တႃႇတေပဵၼ်ၽူႈပေႉယူႇ ယွၼ်ႉၸုမ်း Manchester City ၵေႃႈလႆႈၽၵ်းတူၵမ်းဢွၼ်တၢင်း သုတ်းၵူၺ်း ၵႃႈယွၼ်ႉလႆႈထုၵ်ႇသွင်းၶိုၼ်းၼိုင်ႈလုၵ်ႈသေဢမ်ႇၵႃး ယင်းမႃးလိူဝ်ၽူႈလဵၼ်ႈ 10 ၵေႃႉၵူၺ်းသေ ၽွင်းပၢင်တေယဝ်ႉ လူင်းၵႂႃႇထႅင်ႈ 7 ၼႃးထီး Chelsea ၵေႃႈလႆႈ Penalty သေ Lampard ၵေႃႈသႂၢင်းပၼ် Chelsea ပေႉၵႂႃႇ 2 ၽၵ်း တူတေႃႇ 1 ယဝ်ႉ။
ဢိင်ၼိူဝ်လွင်ႈလူႉသုမ်းပွၵ်ႈၵမ်းဢွၼ်တၢင်းသုတ်း ၶွင်ၸုမ်း Manchester City ၵူၺ်းဢမ်ႇၸႂ်ႈ ယွၼ်ႉလူၺ်ႈ ၽွင်းမိူဝ်ႈလဵဝ် ၸုမ်းဢၼ်လႆႈထုၵ်ႇပၵ်းတႃတူၺ်းၸုမ်းၼိုင်ႈ ဝၢႆးသေလႆႈၸႂ်ႉငိုၼ်းၵႂႃႇတင်းၼမ် ၼႂ်းၵၢၼ်သိုဝ်ႉတူဝ် ၽူႈလဵၼ်ႈ၊ ၽူႈလဵၼ်ႈဢၼ်သိုဝ်ႉမႃးၼၼ်ႉၵေႃႈပဵၼ်ဢၼ်ၶိုၵ်ႉၵျႃႉမၼ်းလႄႈ ပုၼ်ႈတႃႇပုတ်ႈတႅၼ်းၵၼ်လူင်း လဵၼ်ႈၼၼ်ႉဢမ်ႇ ၸႂ်ႈပၼ်ႁႃပိူင်လူင်မၼ်းယဝ်ႉ။ ၵူၺ်းဢိင်ၼိူဝ်လွင်ႈဢၼ်မီးၽူႈလဵၼ်ႈၶိုၵ်ႉၵျႃႉၼမ်သေ ပဵၼ်တီႈဢၼ်သိုဝ်ႇလႄႈ ၵူၼ်းသူင်ၵျိူၵ်ႈၶဝ်မီးၶေႃႈထၢမ်လႄႈပၵ်းတႃတူၺ်းဝႃႈ တေႁၵ်ႉသႃၸၼ်ႉထၢၼ်ၸဝ်ႈၵဝ်ႇ ဝႆႉလႆႈၵႂႃႇမွၵ်ႈႁိုဝ် ၸွင်ႇတေ ပဵၼ်ၸုမ်းဢၼ်လႆႈသျႅမ်ႇဝၢႆးသေပၢင်ယဝ်ႉတူဝ်ႈလူင်းၵႂႃႇတင်း 38 ပၢင်ဢၼ်တေလႆႈ လူင်းလဵၼ်ႈၼၼ်ႉယဝ်ႉ။
ၽွင်းမိူဝ်ႈလဵဝ်ဢၼ်မီးတိုဝ်ႉတၢင်းတီႈယင်းသိုပ်ႇမုင်ႈႁၼ်သျႅမ်ႇလႆႈယူႇၵေႃႈၵိုတ်း Europa (လႆႈထီႉသၢမ်ၼႂ်းပၢင် Uefa Champions Leagues သေလႆႈလူင်းမႃးလဵၼ်ႈ), FA Cup, Carling Cup လႄႈ ယိူင်းမၢႆဢၼ်သုင် သုတ်း မိူၼ် ၼင်ႇသျႅမ်ႇ Premierleague ၼၼ်ႉၵူၺ်းယဝ်ႉ။
ထႅင်ႈတၢင်းၼိုင်ႈၵေႃႈယင်းသွၼ်ႇလႆႈဝႃႈတိုဝ်ႉတၢင်းၼမ်မိူၼ်ၸုမ်း ယႂ်ႇၵူႈၸုမ်းယူႇ ၵူၺ်းတႄႇဢဝ်မႃးၼႂ်းသွင်ဝူင်ႈ ၼၼ်ႉၵေႃႈတိုၵ်ႉလႆႈတူၵ်းႁွပ်ႈ UCL ၵူၺ်းသေ ယင်းသိုပ်ႇမႃးသုမ်းၸုမ်း Chelsea ထႅင်ႈသေဢမ်ႇၵႃး ၼႂ်းပၢင် သိုပ်ႇမႃးၵေႃႈတေလႆႈထူပ်းၸုမ်းယႂ်ႇမိူၼ်ၼင်ႇ Arsenal ဢၼ်ၼိုင်ႈလဵၼ်ႈၵေႃႈ ၼိုင်ႈၶိုၵ်ႉမႃးသေ သင် Man- chester City လႆႈသုမ်းထႅင်ႈၼႆၸိုင်ၸင်ႈတေထူပ်းတိုဝ်ႉတၢင်းယၢပ်ႇၶိုၼ်ႈထႅင်ႈ လိူဝ် သေၵဝ်ႇယွၼ်ႉယင်းမီး ပၢင် Boxing Days ၵိုတ်းဝႆႉယူႇထႅင်ႈၼၼ်ႉယဝ်ႉ။
သိုပ်ႇဢဝ်ၼႆႉၵႂႃႇၵေႃႈ ဢွၼ်ၵၼ်ပႂ်ႉတူၺ်းလႄႈတိတ်းတၢမ်းဝႃႈ Manchester City ၸွင်ႇတေၶၢမ်ႈပူၼ်ႉလႆႈ ပၢင် ဢၼ်ၵိုတ်းဝႆႉၸိူဝ်းၼႆႉသေတေပဵၼ်သျႅမ်ႇၸွမ်းၼင်ႇဢၢၼ်းဝႆႉၼၼ်ႉပႂ်ႉတိတ်းတၢမ်းၸွမ်း ပၢင်ထူပ်း Arsenal ၼႂ်း ဝၼ်းထီႉ 18 လိူၼ် 12 သေသိုပ်ႇၵႂႃႇတေႃႇႁွတ်ႈထိုင် ပၢင် Boxing days ဢၼ်တေလႆႈလဵၼ်ႈထပ်းၵၼ် 3 ထိုင် 4 ပၢင်သေလႆႈလိုဝ်ႈ 2 ထိုင် 3 ဝၼ်းတေႃႇပၢင်ၵူၺ်းၼႆ သင် Manchester City လဵၼ်ႈလႆႈၶိုၵ်ႉၶႅမ်ႉၸွမ်း ၼင်ႇပူၼ်ႉမႃး ၼၼ်ႉလႆႈဝႃႈ ပၢင်ဢၼ်ႁိမ်သျႅမ်ႇၵၼ်လၢႆၸုမ်းၼၼ်ႉၵေႃႈ တေၶိုၵ်ႉၶႅမ်ႉလႄႈၼႃႈလီသူၼ်ၸႂ် တိတ်းတၢမ်းၸွမ်းတႄႉတႄႉ။