မၢၵ်ႇၼင်

ၽူႈတႅၼ်းၶိုၵ်ႉတွၼ်း ၽၢႆႇသုၼ်ႇလႆႈၵူၼ်း တေၵႂႃႇမိူင်းမၢၼ်ႈ

တေႃႊမတ်ႊ ၶိၼ်ႊတႃႊၼႃႊ ၽူႈတႅၼ်းၶိုၵ်ႉတွၼ်းၽၢႆႇသုၼ်ႇလႆႈသုၼ်ႇပဵၼ်ၵူၼ်း ၸၢတ်ႈၸိုင်ႈလုမ်ႈ ၾႃႉၵပ်းသၢၼ်လွင်ႈ မိူင်းမၢၼ်ႈ တေၵႂႃႇမိူင်းမၢၼ်ႈၼႂ်းလိူၼ်ၼႆႉၼႆ။

ၶၢဝ်ႇ RFA ဢၢင်ႈဢိင်ၵႂၢမ်းလၢတ်ႈမၼ်းၸဝ်ႈသေလၢႆးငၢၼ်းဝႃႈ မိတ်ႊသတိူဝ်ႊၶိၼ်ႊ တႃႊၼႃႊ တေၵႂႃႇ မိူင်းမၢၼ်ႈၼၼ်ႉ ၼႄႉၼွၼ်းယဝ်ႉ၊ ဝီႊသႃႊၵေႃႈလႆႈယဝ်ႉ၊ တေပဵၼ် ၵႂႃႇမိူင်းမၢၼ်ႈၼႂ်းဝူင်ႈထိသၢမ် လိူၼ်ၼႆႉယူႇ ဝႃႈၼႆယဝ်ႉ။

လွင်ႈတေၵႂႃႇမိူင်းမၢၼ်ႈၼၼ်ႉပဵၵ်ႉသမ်ႉ မိတ်ႊသတိူဝ်ႊၶိၼ်ႊတႃႊၼႃႊ ပႆႇလၢတ်ႈလၢႆး ႁူဝ်ယွႆႈမၼ်းသေ တႃႉမၼ်းၸဝ်ႈ ယိူင်းဢၢၼ်းတေႁူပ်ႉထူပ်းၸုမ်းၽူႈမီးၸၼ်ႉလူင်ပွင် ၸိုင်ႈမိူင်းမၢၼ်ႈ၊ ၸုမ်းၸိူဝ်း တူင်ႉၼိုင်ၽၢႆႇသုၼ်ႇလႆႈသုၼ်ႇပဵၼ်ၵူၼ်း လႄႈၼၢင်းဢွင်ႇ သၢၼ်းသုၵျီႇ ၸိူဝ်းၼႆႉၼႆယဝ်ႉ။

သိုပ်ႇလၢတ်ႈဝႃႈ ၵွပ်ႈၼၢင်းဢွင်ႇသၢၼ်းသုၵျီႇ ပဵၼ်ၽူႈၵူၼ်းဢၼ်လမ်ႇလွင်ႈလႄႈတေ ၶတ်းၸႂ် ႁႂ်ႈလႆႈႁူပ်ႉထူပ်းမၼ်းၼၢင်း ဝႃႈၼႆယဝ်ႉ။

မိတ်ႊသတိူဝ်ႊၶိၼ်ႊတႃႊၼႃႊ ၼႆႉဝၢႆးမၼ်းၸဝ်ႈၶဝ်ႈမိူဝ်းၼႂ်းမိူင်းမၢၼ်ႈမိူဝ်ႈလိူၼ် February 2010 ပူၼ်ႉမႃးၼႆႉယဝ်ႉၸုမ်း လူင်ပွင်ၸိုင်ႈသိုၵ်းမၢၼ်ႈႁႃလိူင်ႈႁႃတၢင်း သေလွင်ႈလွင်ႈသေ ဢမ်ႇပၼ်ဝီႊသႃႊ မၼ်းၸဝ်ႈသိုပ်ႇၶဝ်ႈမိူဝ်းထႅင်ႈလႄႈတွပ်ႇ ထဵင် မႃး တႃႇသေႇသေႁဵတ်းႁႂ်ႈၶၢဝ်းတၢင်းမၼ်းၸဝ်ႈတႃႇမိူဝ်း မိူင်းမၢၼ်ႈႁိုင်မႃးၶၢဝ်းတၢင်းၼိုင်ႈ ပီပၢႆ။ ဝၢႆးလူင်ပွင်ၸိုင်ႈမႂ်ႇ မိူင်းမၢၼ်ႈၶိုၼ်ႈမႃးယဝ်ႉ လူင်ပွင်ၸိုင်ႈမႂ်ႇမၢၼ်ႈသိုပ်ႇပိုတ်ႇ ပၼ်တိုဝ်ႉတၢင်းမၼ်းၸဝ်ႈၶဝ်ႈမိူဝ်းမိူင်းမၢၼ်ႈထႅင်ႈလႄႈၶၢဝ်း တၢင်းဢၼ်ၼႆႉၵေႃႈလႆႈ ဝႃႈပဵၼ်လွင်ႈလမ်ႇလွင်ႈတေႉတေႉ ဝႃႈၼႆယဝ်ႉ။

ၶၢဝ်းတၢင်းပွၵ်ႈၼႆႉပဵၼ်ပွၵ်ႈထူၼ်ႈ 4 တႃႇမၼ်းၸဝ်ႈဝၢႆးလႆႈႁပ်ႉတၼ်းႁဵင်းၽူႈတႅၼ်း ၶိုၵ်ႉတွၼ်းၸၢတ်ႈ ၸိုင်ႈလုမ်ႈၾႃႉၽၢႆႇသုၼ်ႇလႆႈသုၼ်ႇပဵၼ်ၵူၼ်းၵပ်းသၢၼ်လွင်ႈမိူင်း မၢၼ်ႈမိူဝ်ႈဝၼ်းထိ 1 လိူၼ်မေႊ ပီ 2008 မႃးဝႃႈၼႆယဝ်ႉ။