joomla templates Youth Power Media

မိူဝ်ႈဝၼ်းထိ 3.8.2011 မိူဝ်ႈဝႃးပူၼ်ႉမႃးၼႆႉ ၸုမ်းဢူၺ်းလီ ပႃႇတီႇၸၢဝ်းၶိူဝ်း 5 ၸုမ်းၸိူဝ်းပဵၼ် ယၢင်း၊ ၶျၢင်း၊ မွၼ်း၊ ရၶႅင်ႇ လႄႈတႆးႁူမ်ႈၵၼ်ဢွၵ်ႇလိၵ်ႈပိုၼ်ၽၢဝ်ႇ ၽိုၼ်ၼိုင်ႈသေ တုၵ်းယွၼ်းထိုင်လူင်ပွင်ၸိုင်ႈ မၢၼ်ႈဝႃႈ ႁႂ်ႈၵိုတ်းယိုတ်းပၢင်တိုၵ်း ၼႂ်းၸေႈမိူင်းၸၢဝ်းၶိူဝ်းလႄႈ ပိုၼ်ၽၢဝ်ႇၵိုတ်းသိုၵ်းဝႆးဝႆး ၼႆ။

ၼၢႆႊငူၺ်ႊတဵင်း ႁူဝ်ပဝ်ႈပႃႇတီႇတီႊမူဝ်ႊၶရေႊသီႊ ၽႅၼ်ႇလိၼ်မွၼ်းလၢတ်ႈတၢင်းၶၢဝ်ႇ RFA ဝႃႈ လႆႈဢုပ်ႇဢူဝ်းႁူမ်ႈၵၼ် ၶၢဝ်းတၢင်းသွင်ဝၼ်း ၼႂ်းတႃႈၵုင်ႈသေဢွၵ်ႇၶေႃႈ တႅပ်းတတ်းဢၼ်ၼႆႉမႃး ဝႃႈၼႆယဝ်ႉ။

“ ၼိုင်ႈၵမ်ႉထႅမ်လွင်ႈၶိုၼ်ႈပၼ်ငိုၼ်းၶႃႈႁၢပ်ႇၵၢၼ်(Pension) ၸိူဝ်းၵိုတ်းလိုဝ်ႈ၊ သွင် တုၵ်းယွၼ်းႁႂ်ႈ လူင်ပွင်ၸိုင်ႈပိုၼ် ၽၢဝ်ႇၵိုတ်းသိုၵ်း။ ဝၢႆးၵိုတ်းသိုၵ်းယဝ်ႉႁႂ်ႈႁူမ်ႈတင်း ၸုမ်းၸၢဝ်းၶိူဝ်းသေၶွတ်ႇၽွတ်ႈၸုမ်း ငမ်းယဵၼ်။ ႁႂ်ႈၸွႆႈၵမ်ႉထႅမ်ပီႈ ၼွင်ႉၵူၼ်းမိူင်း ၸိူဝ်းပၢႆႈၽေးသိုၵ်းသိူဝ်။ ႁႂ်ႈပၼ်တိုဝ်ႉတၢင်းၸၢဝ်းၶိူဝ်းႁဝ်းၸွႆႈထႅမ်ၵူၼ်းမိူင်းၸိူဝ်း ၼႆႉယဝ်ႉ” ၼႆ။

လွင်ႈဢၼ်ၸုမ်းၸၢဝ်းၶိူဝ်း 5 ၸုမ်းၶဝ်တုၵ်းယွၼ်းၸိူဝ်းၼႆႉတေဢဝ်တၢင်ႇလၢတ်ႈ ၼႄၼႂ်းပၢင်ၵုမ်သၽႃး ဢၼ်တေ ၸတ်း ၼႂ်းဝၼ်းထိ 22.8.2011 သေတုၵ်းယွၼ်း ႁႂ်ႈမီးၵေႃႊမတီႊ ၵိုတ်းသိုၵ်း ငမ်း ယဵၼ်မႃး ဝႃႈၼႆယဝ်ႉ။ ပၢင်ၵုမ်ၸုမ်း ဢူၺ်း လီ 5 ၸုမ်းဢၼ်ၸတ်းတီႈတႃႈၵုင်ႈၼႆႉၸုမ်းၸၢဝ်းၶိူဝ်းၵယၢင်း ဢၼ်တၢင်ႇမၢႆၽၢင်ၶဝ်ႈႁူမ်ႈလိူၵ်ႈတင်ႈမႃးၼၼ်ႉ ၵေႃႈၶဝ်ႈႁူမ်ႈလဵပ်ႈႁဵၼ်းၸွမ်းယူႇ ၼႆယဝ်ႉ။

ၼွၵ်ႈသေၼၼ်ႉၸုမ်း သင်ၶ ၸဝ်ႈၼႂ်းမိူင်းၵေႃႈၵမ်ႉထႅမ်ႁူမ်ၸူမ်းၸွမ်းလွင်ႈဢၼ် ၼၢင်းဢွင်ႇသၢၼ်း သုၵျီႇၽူႈၼမ်းတီႊ မူဝ်ႊၶရေႊသီႊ ၽၢႆႇသၢၼ်ၶတ်းတႅမ်ႈလိၵ်ႈ တုၵ်းယွၼ်းထိုင်ၸွမ်ၸိုင်ႈဢူးတဵင်းသဵင်ႇ ႁႂ်ႈၵိုတ်းသိုၵ်းတင်းမိူင်းၼၼ်ႉယူႇ။

သြႃႇၸဝ်ႈ ဢူးထမ်မ သီရိ ၽူႈၶၢၼ်ပၢၵ်ႇၸုမ်းတပ်ႉႁူမ်ႈသင်ၶၸဝ်ႈၼႂ်းမိူင်းလၢတ်ႈဝႃႈ “ ၸုမ်းၸၢဝ်းၶိူဝ်း ၸိူဝ်းယိပ်းၵွင်ႈ ၵၢင်ႇလႄႈ ပႃႇတီႇ ၵၢၼ်မိူင်းလၢႆပႃႇတီႇၵေႃႈၼပ်ႉထိုဝ် ၼၢင်းဢွင်ႇသၢၼ်းသုၵျီႇယူႇ။ ၵွပ်ႈၼၼ်လႄႈတိုၵ်းသူၼ်းႁႂ်ႈတေႃႇ ဢွင်ႇသၢၼ်းသုၵျီႇ ႁဵတ်းသၢင်ႈ။ ပေႃးဢဝ်တၢင်းႁၼ်ထိုင်ၽၢႆႇသင်ၶ ႁဝ်းဝႃႈၸိုင်မိူဝ်ႈလဵဝ်ၼႆႉမီးၽၢႆႇ လူင်ပွင်ၸိုင်ႈၵူၺ်း ဢၼ်ၶဵင်ႈၶႅင်ယူႇ။ သင်ဝႃႈၽၢႆႇလူင်ပွင် ၸိုင်ႈယွမ်းႁပ်ႉ ယဝ်ႉၸိုင် ပၼ်ႁႃၸိူဝ်းၼႆႉၵေႃႈတေၵႄႈၶႆၵႂႃႇလူၺ်ႈလၢႆးၵတ်းၵတ်း ယဵၼ်ယဵၼ်ၵူၺ်း။ ပၢင်တိုၵ်း ဢၼ် ပဵၼ်ယူႇမိူဝ်ႈလဵဝ်ၼႆႉ တေလႆႈဝႃႈပဵၼ်ၽၢႆႇလူင်ပွင်ၸိုင်ႈၵူၺ်း ဢၼ်ၶဵင်ႈၶႅင်ယူႇ” ဝႃႈၼႆယဝ်ႉ။

ဢၼ်ၼၢင်းဢွင်ႇသၢၼ်းသုၵျီႇ တုၵ်းယွၼ်းၵိုတ်းသိုၵ်းမိူဝ်ႈလဵဝ်ၼႆႉလုမ်ႈၾႃႉၵေႃႈ ၵမ်ႉထႅမ်။ ၸုမ်းၸၢဝ်းၶိူဝ်းၸိူဝ်းယိပ်း ၵွင်ႈၵၢင်ႇၵေႃႈႁၼ်လီၸွမ်း။ လူဝ်ႇႁႂ်ႈတင်းၽၢႆႇ လူင်ပွင်ၸိုင်ႈမၢၼ်ႈလႆႈၸႂ်ၸွမ်းၵူၺ်းယဝ်ႉ။ ၵွပ်ႈၼၼ်သင်ဝႃႈလူင်ပွင်ၸိုင်ႈ ၶႂ်ႈႁႂ်ႈ ဝၢၼ်ႈမိူင်းမီးလွင်ႈငမ်းယဵၼ် ၶိုၼ်ႈယႂ်ႇမႂ်ႇသုင်ယူႇၸိုင် ႁဝ်းသင်ၶ ၶႂ်ႈတိုၵ်းသူၼ်း ဝႃႈႁႂ်ႈဝၢႆႇၼႃႈၸူးဢၼ်ၵူႈၽၢႆႇ ၵူႈတၢင်း ႁၼ်လီ ၵမ်ႉထႅမ် ၶႂ်ႈလႆႈ ၶႂ်ႈပဵၼ်ၼၼ်ႉတႃႉ။ လူင်ပွင်ၸိုင်ႈဢၼ်ဢုပ်ႉပိူင်ႇၽွင်းငမ်းဝၢၼ်ႈမိူင်းၼႆႉထုၵ်ႇလႆႈၶဝ်ႈၸႂ် ဝႃႈဢၼ်ၼၢင်း ဢွင်ႇသၢၼ်းသုၵျီႇ လၢတ်ႈတုၵ်းယွၼ်းၼၼ်ႉမၼ်းပဵၼ်ၸေႇတႃၼႃႇ။ ၶႂ်ႈႁႂ်ႈႁၼ်ထိုင် ဝႃႈ မၼ်းၼၢင်း မီးၼမ်ႉၸႂ်ၶႂ်ႈႁႂ်ႈ ဝၢၼ်ႈမိူင်းမီးလွင်ႈၶိုၼ်ႈယႂ်ႇ မႂ်ႇသုင်သေလၢတ်ႈၵွပ်ႈ ၼၼ်ႁႂ်ႈပွင်ႇၸႂ်သေႁူမ်ႈ ၵၼ်ၵေႃႇသၢင်ႈလွင်ႈငမ်း ယဵၼ်ၵႂႃႇ ဝႃႈၼႆယဝ်ႉ။