- Details
- Published on Thursday, 25 August 2011 14:18
သေႃးလႃႉပွႆႇဢွၼ်ႁူဝ်တပ်ႉသိုၵ်းယၢင်းပုတ်ႉ Democratic Karen Buddhist Army (DKBA) ၽူႈၵွၼ်းတပ်ႉၸုမ်း 5 လႆႈပၢၵ်ႈပႅတ်ႈၶေႃႈၽိတ်ႈႁွင်ႉ ၵိုတ်းသိုၵ်း ငမ်းယဵၼ် ဢၼ်ၸွမ်ၸိုင်ႈဢူး တဵင်းသဵင်ႇ ပိုတ်ႇၽၵ်းပၼ်၊ ၼွၵ်ႈသေၼၼ်ႉတုၵ်းယွၼ်းႁႂ်ႈတပ်ႉသိုၵ်းမၢၼ်ႈၸိူဝ်းပၵ်းတပ်ႉယူႇ ၼႂ်း ၸေႈမိူင်းၸၢဝ်းၶိူဝ်းတင်းမူတ်း ထွၼ်ဢွၵ်ႇ။
သေႃးလႃႉပွႆႇ ၽူႈၵွၼ်းတပ်ႉၸုမ်း 5 DKBA လၢတ်ႈတၢင်းၶၢဝ်ႇ ဢီႊရႃႊဝတီႊ ဝႃႈဢမ်ႇၸၢင်ႈ ႁဵတ်းၸွမ်း ၶေႃႈႁိၵ်ႈႁွင်ႉ ၵိုတ်းသိုၵ်းဢၼ်လူင်ပွင်ၸိုင်ႈမၢၼ်ႈၽိတ်ႈႁွင်ႉၵွပ်ႈဝႃႈပဵၼ်ဢၼ်တု ဢၼ်ပွမ်ၵူၺ်း ဝႃႈၼႆ။
မၼ်းၸဝ်ႈလၢတ်ႈဝႃႈ “ ၸဝ်ႈၼႃႈတီႈလူင်ပွင်ၸိုင်ႈမၢၼ်ႈၶဝ်လႆႈၽၢၵ်ႇၶေႃႈၵႂၢမ်းၽၢၼ်ႇသင်ႇၶႃႇ မႃး ၸူးႁဝ်းဝႃႈ ၶဝ်ၶႂ်ႈလႆႈလွင်ႈငမ်းယဵၼ်ၸွမ်းႁဝ်း။ လွင်ႈၼႆႉမၼ်းပဵၼ်ၽႅၼ်ၵၢၼ်လၢႆးလိင်း ၵဝ်ႇ ဢၼ် ၶဝ်ယၢမ်ႈၸႂ်ႉမႃးၼၼ်ႉၵူၺ်း၊ ပေႃးၶဝ်မီးၸႂ်ၸိုၼ်ႈၸၢင်ႇသိုဝ်ႈယူဝ်းတေႉၸိုင်ၶဝ် တၵ်းလႆႈၸႂ်တႃႇၵိုတ်း သိုၵ်းတင်းၸိုင်ႈမိူင်းပတ်းပိုၼ်ႉ” ဝႃႈၼႆ။
မိူဝ်ႈဝၼ်းထိ 18.8.2011 ပူၼ်ႉမႃးၸုမ်းသိုၵ်းမၢၼ်ႈလႆႈသူင်ႇဢူးပၺႃသႃမိ သင်ႇၶႃႇၸဝ်ႈ တူၼ်ၼိုင်ႈ ၸဝ်ႈၵွၼ်းဝတ်ႉ တွင်ႇၵလေး ၼႂ်းဝဵင်းပႃးဢၢၼ်ႊ မိူင်းယၢင်းပိူဝ်ႈတႃႇပဵၼ်တူဝ်ၵၢင် ၽၢႆႇ သိုၵ်းမၢၼ်ႈ သေၶဝ်ႈၸူးၸုမ်း DKBA တပ်ႉၸုမ်း 5 ႁႃတၢင်းၵိုတ်းသိုၵ်း ငမ်းယဵၼ် ဝႃႈၼႆ။
DKBA တပ်ႉၸုမ်း 5 ၼႆႉပဵၼ်ၸုမ်းဢၼ်သၢၼ်ၶတ်းၽႅၼ်ၵၢၼ်တပ်ႉပႂ်ႉလႅၼ်လိၼ်သိုၵ်းမၢၼ်ႈ သေ တႅၵ်ႇဢွၵ်ႇ DKBA ၸိူဝ်းယွမ်းႁပ်ႉႁဵတ်းၸွမ်းသိုၵ်းမၢၼ်ႈမိူဝ်ႈလိူၼ် November 2010။ ဝၢႆးၼၼ်ႉ လႆႈ သိုပ်ႇပဵၼ်ပၢင်တိုၵ်းၵၼ်တင်းသိုၵ်းမၢၼ်ႈမႃးဢမ်ႇယဝ်ႉဢမ်ႇဝၢႆးသေလႆႈႁူမ်ႈ ၵၼ်တင်း Karen National Union (KUN) ဢၼ်ယၢမ်ႈတႅၵ်ႇဢွၵ်ႇၵၼ်မႃးမိူဝ်ႈပီ 1995 ၼၼ်ႉၶိုၼ်းယူႇယဝ်ႉ။
DKBA တပ်ႉၸုမ်း 5 ၼႆႉလႆႈတုၵ်းယွၼ်းထိုင်လူင်ပွင်ၸိုင်ႈသိုၵ်းမၢၼ်ႈႁႂ်ႈပိုၼ်ၽၢဝ်ႇၵိုတ်းသိုၵ်း တင်းၸိုင်ႈမိူင်း ပတ်းပိုၼ်ႉပဵၼ်တၢင်းၵၢၼ်ဢိၵ်ႇတင်းႁႂ်ႈထွၼ်တပ်ႉသိုၵ်းမၢၼ်ႈၸိူဝ်းပၵ်းတပ်ႉ ယူႇ ၼႂ်းၸေႈမိူင်း ၸၢဝ်းၶိူဝ်းတင်းမူတ်း လႄႈပွႆႇၵူၼ်းတူၵ်းၶွၵ်ႈၵၢၼ်မိူင်းတင်းသဵင်ႈသေပိုတ်ႇ တိုဝ်ႉတၢင်းပၼ် ၶဝ်ႈႁူမ်ႈ သဵၼ်ႈတၢင်းၵၢၼ်မိူင်း ၼႆယဝ်ႉ။
ၶၢဝ်ႇတၢင်းၽူႈၸမ်ၸႂ် DKBA လၢတ်ႈဝႃႈ ပၢင်ဢုပ်ႇဢူဝ်းတၵ်းပႃးလူင်ပွင်ၸိုင်ႈ၊ ၸုမ်းၸၢဝ်းၶိူဝ်း၊ ၼၢင်းဢွင်ႇသၢၼ်းသုၵျီႇလႄႈ ၸုမ်းၵၢၼ်မိူင်းတင်းမူတ်း ဝႃႈၼႆယဝ်ႉ။
ဝၢႆးၽူႈၵွၼ်းတပ်ႉၸုမ်း 5 သေႃးလႃႉပွႆႇ ၶဝ်ႈႁူမ်ႈပၢင်ၵုမ်ၵၼ်တင်းၸဝ်ႈသိုၵ်းလူင် ၵျေႃႇတႅတ်ႉ လႄႈၸဝ်ႈႁၢၼ် သၢၼ်းဢွင်ႇယဝ်ႉ လႆႈႁူမ်ႈၵၼ်ဢွၵ်ႇၶေႃႈပိုၼ်ၽၢဝ်ႇၽိုၼ်ၼိုင်ႈဝႃႈ သင် DKBA ၸုမ်းလဵဝ်ၵူၺ်းဢဝ်ငမ်းယဵၼ်ၸွမ်းလူင်ပွင်ၸိုင်ႈၸိုင်လွင်ႈငမ်းယဵၼ်ၸႅတ်ႈၸၢင်ႇတၵ်းဢမ်ႇ ၵိူတ်ႇ ၶိုၼ်ႈမီးမႃးလႆႈ။ ၵွပ်ႈၼၼ် DKBA တပ်ႉၸုမ်း 5 တၵ်းတေၶဝ်ႈပွႆးတိုၵ်းတေႃႇပေႃးမီးလွင်ႈ ငမ်းယဵၼ် ၸိုၼ်ႈၸၢင်ႇလႄႈတီႊမူဝ်ႊၶရေႊသီႊ ဝႃႈၼႆယဝ်ႉ။
ဝူင်ႈပူၼ်ႉမႃးလူင်ပွင်ၸိုင်ႈဢၼ်ဢူးတဵင်းသဵင်ႇဢွၼ်ႁူဝ်လႆႈပိုၼ်ၽၢဝ်ႇဝႃႈပိုတ်ႇၽၵ်းတူပၼ် ၸုမ်း ၸၢဝ်းၶိူဝ်း ၸိူဝ်းယိပ်းၵွင်ႈၵၢင်ႇလႄႈၸိူဝ်းၶႂ်ႈလႆႈလွင်ႈၵတ်းယဵၼ် ႁႂ်ႈၵပ်းသိုပ်ႇတင်း လူင်ပွင်ၸိုင်ႈ ၸေႈမိူင်းပဵၼ်ၶၵ်ႉတွၼ်ႈဢွၼ်တၢင်းသေ ၸင်ႇၵွႆႈဢုပ်ႇတင်းလူင်ပွင်ၸိုင်ႈၵၢင်(လူင်ပွင်ၸိုင်ႈ မိူင်းႁူမ်ႈတုမ်) ဝႃႈၼႆယဝ်ႉ။
ၸိူင်ႉႁိုဝ်ၵေႃႈလီၽၢႆႇၸၢဝ်းၶိူဝ်းဢမ်ႇၽွမ်ႉလႆႈၸႂ်ၶေႃႈၽိတ်ႈႁွင်ႉဢၼ်ၼႆႉယွၼ်ႉၸႅၵ်ႇၽေ ပဵၼ် ၸုမ်း ပဵၼ်ၸုမ်း။ ၽၢႆႇၸၢဝ်းၶိူဝ်းႁၼ်လီၵမ်ႉထႅမ်ၸွမ်းသင်လူင်ပွင်ၸိုင်ႈသိုၵ်းမၢၼ်ႈဢုပ်ႇဢူဝ်း ၸွမ်း ၶွင်ႊသီႊၾႅတ်ႊတိူဝ်ႊ ရိူဝ်ႊ ႁူမ်ႈတုမ်ၵူႈၸၢဝ်းၶိူဝ်း United Nationalities Federal Council (UNFC) ဢၼ်တၢင်တူဝ်ၸၢဝ်းၶိူဝ်းၸိူဝ်းယိပ်းၵွင်ႈၵၢင်ႇတင်းမူတ်း ဝႃႈၼႆယဝ်ႉ။
