- Details
- Published on Thursday, 21 April 2011 13:13
ၸဝ်ႈၼႃႈတီႈၽၢႆႇၾႃႉၽူၼ်လူမ်း ပိုၼ်ၽၢဝ်ႇ လၢတ်ႈႁႂ်ႈၵူၼ်းမိူင်းထႆးၽၢင်ႉ သတိ လူမ်းလူင်၊ ၵွပ်ႈဝႃႈ ၸၢင်ႈပတ်ႉၶဝ်ႈ မိူင်းထႆး ထႅင်ႈၼႆ။
ၸဝ်ႈၼႃႈတီႈၽၢႆႇၾႃႉၽူၼ်လူမ်း လႄႈ ၸဝ်ႈတၢင်းမေႃၾၢႆႇ ပေႇတၢင်ႇၵႃႇလႃး ၶဝ်ပၼ်သတိၵူၼ်းမိူင်း မိူဝ်ႈဝၼ်းထိ 19-20.4.2011 ၼႆႉဝႃႈတင်းမိူင်းထႆး ပွတ်းဢွၵ်ႇ၊ ပွတ်းၵၢင် လႄႈၸဵင်ႇႁွင်ႇဝၼ်းဢွၵ်ႇ တေၸၢင်ႈမီးၽူၼ်လူင်လူမ်း လူင်ပတ်ႉၶဝ်ႈမိူင်းထႆး ၼႆယဝ်ႉ။
ၽၢႆႇၵုမ်းထိင်းၸေႈတွၼ်ႈၵဵင်းမႆႇ ပိုၼ်ၽၢဝ်ႇတီႈ သိုဝ်ႇၶၢဝ်ႇဝႃႈ ႁႂ်ႈၵူၼ်းမိူင်း ၽၢင်ႉသတိၸွမ်း ၵၢၼ်ႁေႃႈလူတ်ႉ လႄႈၶိူင်ႈၾႆးၽႃႉ ၵွပ်ႈဝႃႈ ၸၢင်ႈပဵၼ်ၽေး ၼႆ။
မိူဝ်ႈပူၼ်ႉမႃးဝၼ်းထိ 17.4.2011 ၵၢင်ၶမ်ႈလူမ်းလူင်ထူဝ်းပတ်ႉၶဝ်ႈၼႂ်း ၸေႈဝဵင်းၽႄႉ လႄႈၸေႈဝဵင်း သၼ်ပႃတွင်း ၸိုင်ႈထႆးပွတ်းႁွင်ႇ ။
ၽိုၼ်ၶၢဝ်ႇၼိဝ်ႊ ဢွၵ်ႇမိူဝ်ႈဝၼ်းထိ 20.4.2011 ၼႆႉဝႃႈတီႈၸေႈဝဵင်းၽႄႉလင် ႁိူၼ်း 1130 ပၢႆ၊ သၼ်ပႃတွင်း လင်ႁိူၼ်း 2330 လႄႈ မႄႉဝၢင်း 39 မူႇဝၢၼ်ႈ ၸိူဝ်းၼၼ်ႉထုၵ်ႇ လူမ်းလူင်ၽတ်ႉပဝ်ႇ ဢဝ်လင်ၶႃးႁိူၼ်းဢွၵ်ႇပိဝ်ၸွမ်း လူမ်း၊ ၵူၺ်းဢမ်ႇမီးၵူၼ်းမၢတ်ႇၸဵပ်း လုႁၢႆသင်ၼင်ႇၵဝ်ႇ ၼႆယဝ်ႉ။
ၵူၼ်းၼႂ်းပိုၼ်ႉတီႈ သၼ်ပႃတွင်းၵေႃႉၼိုင်ႈလၢတ်ႈဝႃႈ “လူမ်းလူင်မိူၼ်ၸိူင်ႉၼႆ ၶႃႈၶဝ်ဢမ်ႇတွၼ်ႉ ထူပ်းသေပွၵ်ႈ၊ မိူဝ်ႈလူမ်းလူင်ပႆႇထူဝ်းၽတ်ႉၶဝ်ႈမႃးၼၼ်ႉ ၸုမ်းၽၢႆႇၾႃႉၽူၼ်ၶဝ်ပိုၼ်ၽၢဝ်ႇ ဝႃႈတေ မီးလူမ်းလူင် ၽူၼ်လူင်ၼႆသေတႃႉ၊ ၵူၺ်းမၼ်းဢမ်ႇၸႅင်ႈလႅင်းဝႃႈတေပဵၼ်တီႈလႂ်၊ ပွၵ်ႉလႂ် ၼႆလႄႈၶႃႈၶဝ်ၵေႃႈ ဢမ်ႇလႆႈၽၢင်ႉသတိဝႆႉ” ၼႆယဝ်ႉ။
ၵူၼ်းမိူင်းမၢၼ်ႈဢၼ်ႁဵတ်းၵၢၼ်တမ်ငႃႈတီႈ မႁၢတ်ႊၶျႆး မိူင်းၵွၵ်ႇလၢတ်ႈဝႃႈ ဢမ်ႇမီးလွင်ႈ ပၼ်သတိ ႁႅင်းၵၢၼ်ၶႃႈၶဝ်တႄႉတႄႉ ၵႃႈႁိုဝ်ၼႆယဝ်ႉ။
“တီႈမႁၢတ်ႊၶျႆးၼႆႉမီးၵူၼ်းႁဵတ်းၵၢၼ်တမ်ငႃႈၼမ်ၼႃႇ။ ၵွပ်ႈၼႆလႄႈပေႃး ၵူၼ်းႁဵတ်းၵၢၼ် တေဢွၵ်ႇ ၵႂႃႇၼႂ်းၼမ်ႉၸိုင်မီးၵၢၼ်လဵပ်ႈႁဵၼ်းတူၺ်းသၢႆငၢႆ ၾႃႉၽူၼ်ယူႇ” ဝႃႈၼႆယဝ်ႉ။
ၵူၼ်းႁဵတ်းၵၢၼ်တမ်ငႃႈ၊ ၵၢၼ်ၽုၵ်ႇသွမ်ႈ လႄႈ ၵၢၼ်မေႈဝၢၼ်ႈ(ႁိူၼ်း)ၸိူဝ်း ၼႆႉ ၵမ်ႈၼမ်ပဵၼ်ႁႅင်းၵၢၼ် မိူင်းႁူမ်ႈတုမ်မိူင်ႈမၢၼ်ႈ ၼႆယဝ်ႉ။
