joomla templates Youth Power Media

ၵူၼ်း​ၼုမ်ႇ​ၼၢင်း​ယိင်း​တႆး​ၵေႃႉ​ၼိုင်ႈ​လႆႈ​ႁပ်ႉ​သူး ၵွပ်ႈ​တၢင်း​ၶတ်းၸႂ်​တူင်ႉ​ၼိုင်​တႃႇ​ၵၢၼ် ၸိူဝ်ႉ​ၶိူဝ်း ႁဵတ်း​ၽွၼ်း​လီ တႃႇ​ၵူၼ်း​မိူင်း​လႄႈ လႆႈ​ႁပ်ႉ​သူး​တီႈ​ၸဝ်ႈ​ၼၢင်း​သု​ၸၼ်ႇ​တီႇ မိူဝ်ႈ​ဝၼ်း​ထိ 19.12.2010 တီႈ​ၵဵင်း​မႆႇ​ၸိုင်ႈ​ထႆး​တီႈ ၼိုင်ႈ။


ဝၼ်း​ထီႉ 19.12.2010 ၶၢဝ်း​ယၢမ်း 6:႐​႐ မူင်း​ထိုင် 9:႐​႐ မူင်း မိူဝ်ႈ​ဝႃး​ၼႆႉ ၼၢင်း​မွၼ်း​ၵဵင် ၽူႈ​ႁၢပ်ႇ​တီႈ​ၸုမ်း ၵပ်း သၢၼ်​လွင်ႈ​ၼၢင်း​ယိင်း​တႆး (SWAN) ႁပ်ႉ​ပုၼ်ႈ​ၽွၼ်း​ၽၢႆႇ ပၢႆး​ပ​ၺႃႇ လႆႈ​ႁပ်ႉ​သူး(လင်ႊ​ဝၼ်ႊ)တီႈ​ၸဝ်ႈ ၼၢင်း​သု​ၸၼ်ႇ​တီႇ ၼၢင်း​ၾႃႉ မိူင်း​သီႇ​ပေႃႉ​ဢၼ်​ၵူပ်ႉ​ၵူႈ ၵၼ်​တင်း​ၸဝ်ႈ​ၵျုႇ​သႅင် ၸဝ်ႈ​ၾႃႉ​သီႇ​ပေႃႉ။

ၼၢင်း​မွၼ်း​ၵဵင်​မွၵ်ႇ​လၢတ်ႈ​ဝႃႈ “ ငိၼ်း​ၸူမ်း​ထိုင် ၸုမ်း Burma Lifeline လႄႈ ၸဝ်ႈ​မေႈ Inge တီႈ​လႆႈ​ပၼ်​သူး တွၼ်ႈ​တႃႇ ၵူၼ်း​ၼုမ်ႇ ဢၼ်​ႁဵတ်း​ၵၢၼ်​တႃႇ​ၵူၼ်း​တင်း​ၼမ် လႄႈ တႃႇ​တူင်ႇ​ဝူင်း​ႁဝ်း။ သူး​ဢၼ်​ၼႆႉ​ႁဵတ်းႁႂ်ႈ​ၶႃႈ မီး​ႁႅင်းၸႂ် တွၼ်ႈ​တႃႇ​ႁဵတ်း​ၵၢၼ်​ၵႂႃႇ​ထႅင်ႈ မိူဝ်း​ၼႃႈ လႄႈ ၵူၼ်း​တင်း​ၼမ်​ၵေႃႈ​ပၼ်​ႁႅင်း​ၶႃႈ။ၵၢၼ်​ဢၼ်​ၶႃႈ​ႁဵတ်း ၼႆႉ​ၵေႃႈ​ၶႃႈ​ယုမ်ႇ​ယမ် ဝႃႈ မီး ၽွၼ်း​လီ​တႃႇ​တူင်ႇ​ဝူင်း​ၵူၼ်း။ သူး​ဢၼ်​ၼႆႉ​ၵေႃႈ ဢမ်ႇၸႂ်ႈ​တႃႇ​ၶႃႈ​ၵေႃႉ​လဵဝ်​ပဵၼ် တွၼ်ႈ​တႃႇ​တူင်ႇ​ဝူင်း​ႁဝ်း​ၵူႈ​ၵေႃႉ လႄႈ တႃႇ​ၵူၼ်း​တင်း​ၼမ်​ဢၼ်​ႁဵတ်း​သၢင်ႈ​ပုၼ်ႈ​တႃႇ ၵူၼ်း​တင်း​ၼမ်” ဝႃႈ​ၼႆ။

လင်ႊ​ဝၼ်ႊ ဢၼ်​ၸဝ်ႈ​ၼၢင်း​သု​ၸၼ်ႇ​တီႇ မွပ်ႇ​ယိုၼ်ႈ​ၼႆႉ​တေႇ​ပၼ်​မႃး​ၵူၼ်း​ၼုမ်ႇ​ၸိူဝ်း​ၶတ်းၸႂ်​ႁဵတ်း​ၵၢၼ်​တႃႇ ၸိူဝ်ႉ​ၶိူဝ်း။ တင်ႈ​တႄႇ​ပီ 2008 မႃး​ၸဝ်ႈ​ၼၢင်း​လႆႈ​မွပ်ႇ​ယိုၼ်ႈ​ပၼ် လင်ႊ​ဝၼ်ႊ ၵူၼ်း​ၼုမ်ႇ​ၵႂႃႇ​သၢမ်​ၵေႃႉ​ယဝ်ႉ။ ၼၢင်း​မွၼ်း​ၵဵင် ပဵၼ်​ၵေႃႉ ထီႉ​သၢမ် သေ​ပဵၼ် ၼၢင်း​ယိင်း​ၵေႃႉ​ဢွၼ်​တၢင်း​သုတ်း​ဢၼ်​လႆႈ​ႁပ်ႉ​သူး​တီႈ​ၸဝ်ႈ​ၼၢင်း သု​ၸၼ်ႇ​တီႇ ၼႆ​ယဝ်ႉ။

ၼၢင်း​မွၼ်ႈ​ၵဵင် ၽၢၵ်ႇ​ၶေႃႈ​ၵႂၢမ်း​ထိုင်​ၵူၼ်း​ၼုမ်ႇ​ဝႃႈ “ ႁႂ်ႈ​ၵူႈ​ၵေႃႉ​သိုပ်ႇ​ၶတ်းၸႂ်​ႁဵတ်း​ၵၢၼ်​ၵႂႃႇ​လွင်ႈ​ဢၼ်​ႁဝ်း​ယုမ်ႇ ယမ်၊ သင်​ၸိူဝ်ႉ​ဝႃႈ​ႁဝ်း​ႁဵတ်း​ၽိတ်း​ၵႂႃႇ လူမ်ႉ​ၵႂႃႇ​ၸိူဝ်း​ၼႆႉႁႂ်ႈ​ၶိုၼ်း​လုၵ်ႉ ၶိုၼ်း​သေ သိုပ်ႇ​ပႆ​ယၢင်ႈ​ႁဵတ်း​သၢင်ႈ​ၵႂႃႇ” ဝႃႈ​ၼႆ။

ၸဝ်ႈ​ၼၢင်း​သု​သၼ်ႇ​တီႇ ၸိုဝ်ႈ​တႄႉ​ပဵၼ် Inge Eberhard ၸၢဝ်း​ဢေႃႊ​ၸ​တေး​ရီး​ယႃး ၵိူတ်ႇ​ပီ 1932။ ၵူပ်ႉ​ၵူႈ ၸွမ်း ၸဝ်ႈ​ၵျႃႇ​သႅင် ၸဝ်ႈ​ၾႃႉ​သီႇ​ပေႃႉ​မိူဝ်ႈ​ပီ 1953 ။