- Details
- Published on Friday, 28 May 2010 15:02
လွင်ႈဢၼ်ပၢင်မၢၵ်ႇၼင်ယူႇၾႃႉသျႅမ်ႇပျဵၼ်ႇလိၵ်ႉ ယဝ်ႉတူဝ်ႈလူင်းၵႂႃႇၼၼ်ႉ ပွင်ႇဝႃႈပၢင်မၢၵ်ႇၼင်ၼႂ်းၵုၼ်ယုရူပ်ႇ ၼၼ်ႉၵေႃႈယဝ်ႉတူဝ်ႈလူင်းၵႂႃႇလီငၢမ်းယဝ်ႉ။
ပုၼ်ႈတႃႇႁူဝ်ႁုပ်ႈ ၸုမ်းဢၼ်ပဵၼ်သျႅမ်ႇၼၼ်ႉၵေႃႈ လႆႈဝႃႈလီသူၼ်ၸႂ် ဝႆႉယွၼ်ႉလူၺ်ႈ ပီၼႆႉၸမ်ၵူႈမိူင်းဢၼ်မီး
လိၵ်ႉယႂ်ႇမၼ်း ၶတ်းၸႂ်ႁိမ်သျႅမ်ႇၵၼ်ထိုင်ပၢင်လိုၼ်းသုတ်း ယွၼ်ႉပိူဝ်ႈၼၼ်ႁဝ်းဢွၼ်ၵၼ်မႃး လဵပ်ႈႁဵၼ်းတူၺ်း ႁူဝ်ႁုပ်ႈၶွင်သျႅမ်ႇၼႂ်းၸိုင်ႈမိူင်းယႂ်ႇယႂ်ႇၸွမ်းၼင်ႇပႃႈတႂ်ႈၼႆႉ-
တႄႇၸႃႉဢဝ်ပၢင်မၢၵ်ႇၼင်ၽရီႇမျႃႇလိၵ်ႉၼၼ်ႉ ၸုမ်းဢၼ်ပဵၼ်သျႅမ်ႇၵႂႃႇၼၼ်ႉၵေႃႈပဵၼ်ၸုမ်းသျဵဝ်းသီးဢၼ်မီး မၢၵ်ႇၼမ်လိူဝ်ထီႉသွင် မိူၼ်ၼင်ႇမႅၼ်ႇယူႇ 1 မၢၵ်ႈ။ ဝၢႆးၼၼ်ႉ သျဵဝ်းသီး ၵေႃႈလႆႈသျႅမ်ႇဢဵပ်ႉဢေႇၶပ်ႉ လင်ဢဝ် ပႄႉလႆႈၸုမ်း ၽွတ်ႇသ်မတ်ႉၵႂႃႇ 1 ၽၵ်းတူတေႃႇ0 ၼႂ်းႁွပ်ႈၾႆႇၼိူဝ်ႇၼၼ်ႉယဝ်ႉ။
ပုၼ်ႈတႃႇၶႃႇလိင်ႇၶပ်ႉၼၼ်ႉၵေႃႈပဵၼ်တၢင်းၸုမ်း မႅၼ်ႇယူႇလႆႈၵႂႃႇဝၢႆးသေဢဝ်ပႄႉၸုမ်း ဝိၼ်ႇလႃႇၵႂႃႇလႆႈ 2 ၽၵ်း တူ တေႃႇၼိုင်ႈၼႂ်းႁွပ်ႈၾႆႇၼိူဝ်ႇၼၼ်ႉယဝ်ႉ။
သိုပ်ႇမႃးပဵၼ်ပၢင်မၢၵ်ႇၼင်လႃႇလီႇၵႃႇ သပဵၼ်ႇ ၸုမ်းဢၼ်လႆႈပဵၼ်သျႅမ်ႇၼၼ်ႉ ပဵၼ်ပႃႇသေႇလူဝ်ႇၼႃႇ၊ လႄႈပၢင် သပႄႇၼိတ်ႉသ်ၶိင်းၶပ်ႉ ၼၼ်ႉၵေႃႈပဵၼ်ၸုမ်းသေႇပီႇယႃႇဢၼ်ဢဝ်ပႄႉၸုမ်း ဢႅတ်ႇလႄႇတီႇၵူဝ်ႇ မႃႇတရိတ်ႇၼႂ်း ႁွပ်ႈၾႆႇၼိူဝ်ႇ ၼၼ်ႉယဝ်ႉ။
ၶၢမ်ႈမႃးတၢင်းၸိုင်ႈမိူင်းၸိူဝ်ႇမႅၼ်ႇၼီႇ (Germany) ဢၼ်မီး ပုၼ်ႇတေႇလီႇၵႃႇ ၸိူဝ်ႇမႅၼ်ႇၼီႇၼၼ်ႉ ပဵၼ်ၸုမ်း ပႃႇယိူၼ်ႇ မိဝ်ႇၼိၵ်ႉ ဢၼ်လႆႈသွင်သျႅမ်ႇၵႂႃႇတင်းသျႅမ်ႇ ပုၼ်ႇတေႇလီႇၵႃႇ ၸိူဝ်ႇမႅၼ်ႇၼီႇလႄႈ တေႇ ဢဵပ်ႇၽေး ၽူဝ်ႇလ်ၶႃႇၼၼ်ႉယဝ်ႉ။
ပုၼ်ႈတႃႇၵဝ်ႇလ်သူဝ်ႉ သီႇရေႇဢႃႇ လႄႈ ၶူဝ်ႇပႃႇဢီႇတႃႇရေႇၼၼ်ႉၵေႃႈ ပဵၼ်ၸုမ်း ဢိၼ်ႇတိူဝ်ႇ မိလၢၼ်ႇ ဢၼ် လႆႈသျႅမ်ႇၵႂႃႇ ၼၼ်ႉယဝ်ႉ။
လိူဝ်သေၼႆႉ တႃႇပၢင်မၢၵ်ႇၼင်ဢၼ်သွၼ်ႇဝႃႈယႂ်ႇတီႈသုတ်း မိူၼ်ၼင်ႇယူႇၾႃႉသျႅမ်ႇပျဵၼ်ႇလိၵ်ႉၼၼ်ႉပဵၼ်ၸုမ်း ဢိၼ်ႇတိူဝ်ႇမိလၢၼ်ႇလႆႈသျႅမ်ႇၵႂႃႇ ဝၢႆးသေဢဝ်ပႄႉပႃႇယိူၼ်ႇၵႂႃႇလႆႈ 2-0 ၽၵ်းတူသေ ပဵၼ်သျႅမ်ႇ ထိသၢမ်ၶွင်ၸုမ်း ဢိၼ်ႇတိူဝ်ႇၼႂ်းပီၼႆႉယဝ်ႉ။
လိုၼ်းသုတ်း ပုၼ်ႈတႃႇသျႅမ်ႇယူႇရႍဝ်ႇပႃႉလိၵ်ႉၼၼ်ႉၵေႃႈ ပဵၼ်ၸုမ်း ဢႅတ်ႇလႄႇတီႇၵူဝ်ႇ မႃႇတရိတ်ႇလႆႈသျႅမ်ႇၵႂႃႇ ဝၢႆးသေဢဝ်ပႄႉ ၼိူဝ်ၾူႇလႅမ်ႇ 2-1 ၽၵ်းတူ ၼႆယူႇယဝ်ႉ။
